Nov 4, 2025 | Fréttir
Uppbygging nýrrar íbúðarbyggðar á Traðarreitnum við Digranesveg í Kópavogi er óðum að taka á sig mynd. Fyrstu íbúarnir fluttu inn síðsumars og deildaskipt heildarhúsfélag er tekið til starfa fyrir reitinn og verður starfsemi félagsins virkjuð í takt við uppbyggingu og afhendingu eigna.
Íbúðirnar á reitnum verða samtals 180 talsins í tveimur byggingum, fjögurra og fimm hæða háum. Undir húsunum er samtengdur bílakjallari, bílastæði fylgir öllum íbúðum og mögulegt er að kaupa viðbótarstæði. Sólríkur og skjólgóður inngarður er á milli húsanna með leiktækjum, gróðri og aðstöðu fyrir iðandi mannlíf. Þá er öll þjónusta í seilingarfjarlægð, bæði skólar, verslun, sundlaug, menning og almenningssamgöngur.
Allar íbúðir verða tilbúnar til afhendingar í desember
Byggingarframkvæmdir fóru af stað sumarið 2022 eftir langan og góðan undirbúning. Fyrstu íbúarnir byrjuðu að flytja inn síðsumars í fyrra húsið, við Álftröð 1-7 og Háveg 2-4, þar sem eru samtals 118 íbúðir. Framkvæmdir eru á lokametrunum við seinna húsið, sem stendur við Skólatröð 2-8. Þar eru 62 íbúðir og byrjaði afhending fyrstu íbúðanna nú um mánaðamótin. Þá er bílakjallarinn kominn í gagnið og frágangi að mestu lokið á inngarðinum. Allar íbúðir á reitnum verða tilbúnar til afhendingar í desember á þessu ári og framkvæmdum þá lokið.
JÁVERK annast byggingarframkvæmdir og er lóðarhafi og er nánari upplýsingar um verkefnið að finna á heimasíðunni https://digranes.is/.
Markmiðið að búa til gott samfélag
„Það er vel að verki staðið á Traðarreitnum að mínu mati, íbúðirnar eru svansvottaðar, staðsetningin góð, bílastæði eru með hverri íbúð og hægt að kaupa viðbótarstæði ef þess er þörf, sem ætti að henta mörgum,“ segir Hallur Guðjónsson, á sölu- og samskiptasviði Eignaumsjónar, sem aðstoðaði JÁVERK og aðra eigendur við að stofna húsfélag fyrir Traðarreitinn.
„Húsin þarna eru skilgreind sem eitt mannvirki í eignaskiptasamningi með fjórum matshlutum; húsin tvö, bílakjallarinn og djúpgámar, á sameiginlegri lóð og því var best að okkar mati að stofna þarna eitt deildaskipt heildarhúsfélag með það að markmiði að búa til gott og farsælt samfélag, í stað þess að vera með þrjú húsfélög með tilheyrandi fjölda stjórnarmanna og meiri kostnaði fyrir eigendur. Heildarfélagið heldur þá utan um hagsmuni heildarinnar; ytra byrði, lóðina og bílakjallarann, en deildirnar gæta hagsmuna eigenda og notenda í hvoru húsanna,“ segir Hallur og bætir við að þannig eigi hagsmunir allra viðkomandi að vera tryggðir.
Húsfélagið, Traðarreitur 1, er í þjónustuleið Þ-2; fjármál og fundir hjá Eignaumsjón og það verður einnig í vikulegri Húsumsjón, þegar byggingarframkvæmdum er lokið.
Oct 30, 2025 | Fréttir
Eignaumsjón er meðal þeirra tveggja prósenta íslenskra fyrirtækja sem teljast Framúrskarandi fyrirtæki árið 2025. Þetta er í annað sinn sem félagið hlýtur þessa viðurkenningu en framúrskarandi fyrirtæki eiga það sameiginlegt að mati Creditinfo að byggja rekstur sinn á sterkum stoðum og vera í hópi þeirra fyrirtækja sem er best treystandi í viðskiptum á Íslandi.
Meðal skilyrða sem fyrirmyndarfyrirtæki þurfa að uppfylla er að þau hafi náð rekstrarhagnaði yfir þriggja ára tímabil, rekstrarhagnaður (EBIT) og ársniðurstaða hafi verið jákvæð reikningsárin 2022-2024, ársreikningi hafi verið skilað á tilskyldum tíma lögum samkvæmt og að eiginfjárhlutfall sé að minnsta kosti 20%.
Áherslur okkar að skila árangri
„Það er sannarlega ánægjulegt fyrir okkur að hljóta þessa viðurkenningu aftur og undirstrikar að rekstraráherslur okkar eru að skila árangri,“ segir Daníel Árnason, framkvæmdastjóri Eignaumsjónar.
„Reksturinn er krefjandi og við höfum verið í töluverðum umbreytingum, sem taka auðvitað aðeins í, en styrk afkoma tryggir að félagið hefur tök á að vaxa og þroskast,“ segir Daníel og vísar m.a. til þess að Eignaumsjón er að stækka töluvert með sameiningu við fyrirtækið Rekstrarumsjón nú um mánaðamótin.
Vel í stakk búin að takast á við áskoranir
„Við teljum okkur vel í stakk búin að takast á við áskoranir sem því fylgja, verandi á liðnum misserum búin að auka tæknilega getu okkar með öflugri tölvukerfum til að geta haldið enn betur utan um þjónustu í kringum bakvinnslu, greiðslukerfi, bókhald og önnur verkefni fyrir okkar viðskiptavini, segir Daníel. Hann áréttar líka að það sé gæfa fyrirtækisins að hafa tekist að laða til sín hæfileikaríkt og gott starfsfólk sem hafi skilað sér í jákvæðum og góðum starfsanda.
Listinn yfir Framúrskarandi fyrirtæki 2025 var gerður opinber á sérstökum vef á visir.is í dag og viðurkenningarnar voru afhentar síðdegis við athöfn í Laugardalshöll.
Sep 5, 2025 | Fréttir
Uppbygging Vesturvinar, nýrrar íbúðarbyggðar á gamla Héðinsreitnum í Vesturbæ Reykjavíkur, er óðum að taka á sig mynd. Fyrstu íbúarnir fluttu inn haustið 2024 og samtímis tók til starfa deildaskipt heildarhúsfélag fyrir Vesturvin, sem verður virkjað í takt við uppbyggingu og afhendingu eigna.
Alls verða 210 íbúðir og fimm atvinnurými í húsunum sex, sem rísa í Vesturvin. Undir húsunum er sameiginlegur bílakjallari og ofan á honum verður glæsilegur inngarður með torgum, göngustígum og aðgengi að verslunar- og veitingarýmum.
Fyrstu tvö húsin, með samtals 95 íbúðum, eru þegar risin við Mýrargötu 41-43 og Ánanaust 1-3. Framkvæmdir hófust síðla árs 2021 og nú er annar áfangi verkefnisins, bygging 57 íbúða húss við Ánanaust 5 og Vesturgötu 66, vel á veg kominn. Fram undan er svo vinna við byggingu 58 íbúða í þremur húsum við Vesturgötu 60-64. Það er Fasteignaþróunarfélagið Festir sem er lóðarhafi og er nánari upplýsingar um verkefnið að finna á heimasíðunni www.vesturvin.is.
Markmiðið að búa til gott og farsælt samfélag
„Það var gaman að geta lagt lóðarhafanum lið við undirbúning og útfærslu samþykkta fyrir húsfélag, með það að markmiði að búa til gott og farsælt samfélag íbúa og atvinnustarfsemi í Vesturvin, sem verður sannkallað kennileiti til framtíðar í Vesturbæ Reykjavíkur,“ segir Páll Þór Ármann, sem til fjölda ára hefur annast stofnun og innleiðingu nýrra húsfélaga hjá Eignaumsjón.
„Húsin þarna eru skilgreind sem eitt mannvirki í eignaskiptasamningi með sjö matshlutum á sameiginlegri lóð ofan á sameiginlegum bílakjallara og því var best að okkar mati að stofna þarna deildaskipt heildarhúsfélag, í stað sjö húsfélaga með tilheyrandi fjölda stjórnarmanna og meiri kostnaði fyrir eigendur. Eitt félag heldur þá utan um hagsmuni heildarinnar; ytra byrði, lóðina og bílakjallarann, og deildirnar gæta hagsmuna eigenda og notenda í hverju húsi. Í húsfélagsdeildunum eru bæði íbúðir og atvinnustarfsemi, sem ramma þarf inn með bæði skýrum samþykktum og uppgjörsreglum,“ segir Páll og bætir við að þannig verði hagsmunir allra viðkomandi tryggðir.
Húsfélagsdeildir virkjaðar í takt við innflutning íbúa
Húsfélagið Vesturvin er í Þjónustuleið Þ-3; fjármál, fundir og þjónusta hjá Eignaumsjón, ásamt Húsumsjón, sem tryggir reglubundna umsjón með sameign húsfélagsins. Húsfélagsdeildin í Ánanaustum 1-3 hóf starfsemi í nóvember 2024 og deildin í Mýrargötu 41-43 fór í gang í maí á þessu ári. Deildir í húsunum fjórum, sem ekki er lokið við að byggja, verða síðan virkjaðar í takt við uppbyggingu þeirra og innflutning íbúa.
„Það er okkar reynsla að deildaskipt heildarfélög í stærri fjöleignarhúsum skapi aukna samstöðu og samheldni, tryggi betra jafnvægi í rekstri til lengri tíma, samræmt utanumhald eigna og auðveldi hagræðingu; í innheimtu, öflun þjónustu og fleiru,“ áréttar Páll Þór Ármann að lokum.
Sep 3, 2025 | Fréttir
„Brunavarnir eru lykilatriði í öryggi allra húsa og við vöktum þær og yfirförum í hverri heimsókn til viðskiptavina okkar sem eru í Húsumsjón,“ segir Sigurður Lárus Fossberg, umsjónarmaður fasteigna hjá Eignaumsjón.
„Það sem við skoðum, samkvæmt lista frá Slökkviliði höfuðborgarsvæðisins, er að allar flóttaleiðir séu greiðfærar og að öll öryggisljós, svokölluð útljós, séu í lagi og sýnileg. Við tékkum einnig hvort hurðarpumpur virki, brunadyr lokist hindrunarlaust og að dyr og björgunarop geti opnast innan frá án lykils eða verkfæra,“ segir reynsluboltinn Sigurður Lárus, sem starfaði hjá Slökkviliði Akureyrar og Slökkviliði höfuðborgarsvæðisins í 35 ár, áður en hann kom til starfa hjá Eignaumsjón.
Slökkvitæki er ekki hurðastoppari
Alltaf er líka tékkað hvort slökkvitæki, eldvarnateppi og brunaslöngur séu aðgengileg og í lagi, að reykskynjarar virki og að brunaviðvörunarkerfi sýni að allt sé í lagi.
„Það hefur sýnt sig í þessum heimsóknum að allur gangur er á uppsetningu og frágangi slökkvitækja, sem hefur kallað á úrbætur af okkar hálfu.“ Nefnir Sigurður að slökkvitæki eru oft frístandandi, ekki veggföst, og jafnvel notuð sem hurðastoppar. Einnig eru dæmi um að slökkvitæki hafi verið fest hátt upp á veggi, svo illmöguleg hefði verið að ná til þeirra ef þess hefði þurft!
Greiðar flóttaleiðir geta skipt sköpum
„Við fylgjumst líka vel með því að umgengni sé góð, bæði innan húss og utan, í sameign í húsfélögum sem eru í Húsumsjón hjá okkur, enda getur það skipt sköpum að flóttaleiðir séu greiðar ef eldsvoðar verða,“ bætir Sigurður við. Það eigi við um bæði stiga- og geymsluganga, bílageymslur og önnur sameignarrými.
„Það er allt of algengt að íbúar séu með skófatnað, reiðhjól og jafnvel plöntur við sinn inngang á stigagöngum, sem er alls ekki heimilt. Ef eldur kemur upp er hver sekúnda dýrmæt og hlutir í gangvegi geta hægt á fólki og jafnvel lokað fyrir leiðir slökkviliðs.“
Sama gildir um geymsluganga og þvottahús í sameign. Þar má ekkert hindra aðgengi eða loka fyrir neyðarútganga. Í þvottahúsum þurfi líka að passa að mögulegur eldsmatur, s.s. hreinsiefni eða gamall fatnaður, safnist ekki þar upp. Ekkert dót á að vera á geymslugöngum og eldvarnahurðir lokaðar, því eldur í slíku rými geti dreifst ótrúlega hratt.
„Öll ruslsöfnun í sameign stóreykur hættu á íkveikjum og því göngum við hart eftir því að íbúðar fjarlægi dót sem skilið hefur verið eftir í sameign, ella förgum við því,“ segir Sigurður.
Bara skráð ökutæki og bílatengdir aukahlutir
Bílageymslur eru sérstök brunahólf og samkvæmt byggingarreglugerð er einungis heimilt að geyma þar skráð ökutæki og bílatengda aukahluti. Almennt er miðað við að þar megi þá geyma bíla og mótorhjól og smávegis af öðru bílatengdu dóti.
Samkvæmt sömu reglugerð er óheimilt að geyma í bílageymslum húsgögn, búslóð, barnavagna, raftæki, fatapokar o.fl., sem getur flýtt fyrir bruna, truflað öryggis- og slökkvikerfi og valdið þar með hættu fyrir alla íbúa. Þá er almennt bannað að geyma þar eldfim efni, s.s. bensín, gasílát, spreybrúsa eða önnur eldfim efni. Ofangreindar takmarkanir byggja fyrst og fremst á öryggissjónarmiðum, einkum brunavörnum og má líka minna á að rafmagnshlaupahjól, rafmagnshjól o.fl. má ekki hlaða í sameiginlegum bílakjöllurum, nema sérútbúin hleðslusvæði séu til staðar.
Bílar ekki brunatryggðir í sameiginlegri húseigendatryggingu
„Það er ekki til neinn tæmandi listi yfir hvað má eða má ekki geyma í bílageymslum, en þær reglur sem gilda eru byggingar- og brunavarnareglugerðir og reglur viðkomandi húsfélags, sem oft eru strangari en almennar reglur, ,“ segir Sigurður og bætir við að tryggingarfélög geti líka sett skilyrði fyrir tryggingargildi, ef geymsla er óviðeigandi.
„Við ráðleggjum því fólki að kynna sér vel bæði húsreglur, brunavarnaáætlun og tryggingaskilmála, áður en það geymir eitthvað annað en ökutæki í bílageymslu. Við viljum líka benda íbúum á að brunatryggja bílana sína. Það vita ekki allir að bílar eru ekki brunatryggðir í bílageymslum, nema að þeir séu kaskótryggðir eða brunatryggðir sérstaklega,“ segir Sigurður Lárus Fossberg að lokum, slökkviliðsmaður til áratuga og umsjónarmaður fasteigna hjá Eignaumsjón.
Jul 4, 2025 | Fréttir
Rífandi gangur er í uppbyggingu Orkureitsins við Suðurlandsbraut þar sem er að rísa ný 436 íbúða byggð rétt við Laugardalinn. Svæðið er jafnframt í miðpunkti fjölbreyttrar verslunar og þjónustu og gert er ráð fyrir að fyrsti áfangi Borgarlínu muni fara þar fram hjá.
Uppbyggingu Orkureitsins er skipt upp í fjóra megináfanga og er uppbyggingu fyrsta áfangans, 68 íbúða í húsi A við Dalsmúla 1-3, þegar lokið og voru fyrstu íbúðirnar afhentar eigendum haustið 2024. Þá eru framkvæmdir við annan áfanga, byggingu 133 íbúða í húsi D við Suðurlandsbraut og Grensásveg, vel á veg komnar. Þær eignir eru þegar komnar í sölu og áformað að byrja að afhenda íbúðir haustið 2025. Tveir aðrir áfangar, hús B og C, bætast við á næstu árum en áætlað er að afhenda íbúðir í húsi B haustið 2026 og haustið 2027 í lokaáfanganum, húsi C.
Svansvottun og BREEAM-umhverfisvottun
Íbúðirnar á Orkureitnum eru af ýmsum stærðum og henta bæði einstaklingum og fjölskyldum. Stórt bílastæðahús verður tengt öllum byggingunum neðanjarðar og í Orkuhúsinu sjálfu, sem staðsett er miðsvæðis á reitnum er 4.600 m² atvinnuhúsnæði sem er þegar búið að leigja út. Á jarðhæðum íbúðarhúsanna verða einnig verslunar- og þjónusturými með fjölbreyttum rekstri.
SAFÍR byggingar annast framkvæmdina á Orkureitnum, sem er fyrsti íbúðareitur á Íslandi sem hlýtur alþjóðlegu umhverfisvottunina BREEAM Excellent.
„Orkureiturinn á að vera góður staður að búa á. Áhersla er lögð á að íbúðir séu bjartar með góðum loftgæðum og vönduðum og umhverfisprófuðum byggingarefnum auk þess að lóðin sé falleg og þjónusti íbúana vel,“ segir m.a. annars á heimasíðu verkefnisins. Þar kemur líka fram að stefnt sé að því að íbúðirnar á Orkureitnum verði Svansvottaðar.
Sameiginlegt lóðarfélag og deildaskipt húsfélög
„Við vorum í samskiptum við Safír um undirbúning samþykkta og útfærslu stofnunar húsfélaga og samþykkta, nokkru áður en byggingarframkvæmdir hófust, með það að markmiði að móta bæði gott og farsælt samfélag á byggingarreitnum,“ segir Páll Þór Ármann, sem til fjölda ára hefur annast stofnun og innleiðingu nýrra húsfélaga hjá Eignaumsjón.
„Í nýjum og stærri fjölbýlishúsum leggjum við alla jafnan til að stofna deildaskipt heildarhúsfélag til að halda utan um fasteignir, sem samkvæmt skilgreiningu fjöleignarhúsalaga og eignaskiptalýsingu eru eitt hús og mynda þannig saman eitt húsfélag. En vegna fjölbreytni og umfangs uppbyggingarinnar á Orkureitnum var hins vegar lokaniðurstaðan þar að stofna deildaskipt húsfélag fyrir hvert nýju húsanna og tengja þau félög síðan saman, ásamt bílakjallaranum og Orkuhúsinu, í sameiginlegu lóðarfélagi fyrir allan Orkureitinn.“ Páll áréttar að í samþykktum félaganna sé öll starfsemi sem tengist húsfélögunum römmuð inn með skýrum samþykktum og uppgjörsreglum, bæði fyrir lóðarfélagið og hvert húsfélag á reitnum.
„Íbúar eru fluttir inn í fyrsta húsið á Orkureitnum, Dalsmúla 1-3, sem er blandað húsnæði með íbúðum og verslunarrými vestast á reitnum við samnefnda nýja götu sem tengir saman Suðurlandsbraut og Ármúla. Þar er húsfélag, sem er í þjónustu hjá okkur, tekið til starfa og heldur utan um daglegan rekstur sameignarinnar,“ segir Páll og bætir við að lóðarfélagið fyrir Orkureitinn hafi einnig tekið nýlega til starfa.
„Það er jákvætt að sjá hversu mikil áhersla er lögð á að standsetja strax lóðina í kringum Dalsmúlann og gamla Orkuhúsið, þó svo framkvæmdir séu í fullum gangi á örðum hlutum byggingarreitsins,“ segir Páll að lokum.
