Mar 26, 2026 | Fréttir
Leit er hafin að nýjum framkvæmdastjóra Eignaumsjónar hf. þar sem Daníel Árnason hefur ákveðið að láta af störfum á árinu. Starfið hefur þegar verið auglýst.
Framkvæmdastjórinn, sem gegnt hefur stöðunni í tæpa tvo áratugi, segir ýmsar ástæður liggja að baki þessari ákvörðun sinni.
„Ég verð 67 ára á þessu ári og tel tíma kominn til að sinna mér sjálfum og mínum nánustu í auknum mæli. Þegar ég var ráðinn til félagsins árið 2007 var þjónusta af þessu tagi lítt þekkt. Viðskiptavinir voru þá á bilinu 40-50 húsfélög og starfsmennirnir fjórir talsins. Síðan er mikið vatn til sjávar runnið, hús- og rekstrarfélög um fasteignir í þjónustu hjá Eignaumsjónar eru orðin um 1.350 talsins og fastir starfsmenn 65,“ segir Daníel.
Aukin áhersla á stafrænar þjónustulausnir og nýsköpun
Mikill vöxtur hefur verið í starfsemi Eignaumsjónar undanfarin ár, fjárhagsleg staða félagsins er traust, samtímis því sem kröfur hafa aukist um nýjar útfærslur á þjónustu og nýsköpun með enn meiri tæknivæðingu og stafrænum lausnum.
„Með hliðsjón af þessu tel ég tímabært að ég stígi til hliðar og við finnum yngri leiðtoga í brúna hjá Eignaumsjón, nýjan framkvæmdastjóra sem fái tækifæri til að leiða farsællega þessa framtíðarvegferð félagsins,“ bætir Daníel við, en tekur jafnframt fram að hann muni sitja áfram í stjórn félagsins og standa þar vörð um það góða starf sem unnið hefur verið og þarf að vinna.
Hlekkur á starfslýsingu og umsókn um starf framkvæmdastjóra Eignaumsjónar
Mar 25, 2026 | Fréttir
Búið er að halda 60% af þeim 1.250 aðalfundum húsfélaga sem eru á dagskrá hjá Eignaumsjón á aðalfundatíðinni 2026, sem hófst í byrjun janúar og lýkur í maílok. Jafnframt er nú búið að halda ríflega helming húsfunda sem áætlað er að halda á aðalfundatímabilinu.
Ef horft er til fjölda fundavikna er fundatíðin hálfnuð, þar sem 10 fundavikur af 20 eru búnar. Staðan er heldur betri ef horft er til fjölda funda því það eru bara eftir um 40% af þeim aðalfundum og húsfundum sem eru á áætlun fram til 28, maí næstkomandi.
Lykillinn er gott skipulag og sveigjanlegir verkferlar
„Fundir hafa almennt gengið vel miðað við umfang verkefnisins í kjölfar fjölgunar nýrra húsfélaga hjá okkur og aukins flækjustigs sem fylgir því að skipuleggja fundarhöld á tveimur starfsstöðvum, á Suðurlandsbraut 30 í Reykjavík og í Bæjarhrauni 6 í Hafnarfirði, ásamt fjölda funda sem haldnir eru ýmist í sameignum húsfélaga eða í sölum í þeirra nærumhverfi,“ segir Þór Gíslason, ráðgjafi í fundarteymi Eignaumsjónar.
„Verkefni sem þetta gæti ekki með nokkru móti gengið upp nema með góðu starfsfólki, sveigjanlegu skipulagi og verkferlum sem eru í stöðugri þróun,“ segir Þór, aðspurður um hvernig hafi gengið að púsla þessu öllu saman. Hann áréttar jafnframt að stöðugt sé verið að nýta tæknina til að einfalda og stytta verkferla og bæta upplýsingamiðlun, bæði til eigenda í þeim hús- og rekstrarfélögum sem eru í þjónustu hjá Eignaumsjón, sem og til allra þeirra sem koma að undirbúningi og stýra fundunum.
„Þar vil ég hrósa sérstaklega öflugum 30 manna hópi fundarstjóra, sem samanstendur af 19 verktökum hjá okkur og 11 starfsmönnum, sem gegna lykilhlutverki í því að fundirnir gangi vel hjá okkur.“
Tímanleg svör og greinargóðar upplýsingar skipta sköpum
Aðkoma stjórna húsfélaga að undirbúningi og skipulagi aðalfunda er einnig mjög mikilvæg,“ segir Þór. „Tímanleg svör og upplýsingar frá stjórnum um tímasetningu og dagskrá aðalfundar skipta sköpum í að tryggja löglega boðun aðalfunda og að dagskrá aðalfundarboðs sé lýsandi, þannig að eigendur átti sig á umfangi og kostnaði við þau verkefni og framkvæmdir sem taka á til umfjöllunar og afgreiðslu á fundum. Þar gildir að því ýtarlegri sem upplýsingarnar eru frá stjórn, því betur náum við að stilla upp dagskrá aðalfundar.“
Að lokum minnir Þór á mikilvægi þess að stjórnir yfirfari bæði ársreikning og tillögur að kostnaðar- og húsgjaldaáætlun frá Eignaumsjón „og komi athugasemdum, spurningum og breytingum á framfæri við okkur tímanlega fyrir fund svo hægt sé að gera leiðréttingar og breytingar á fundargögnum fyrir fund. Það leiðir til mun skilvirkari aðalfunda og hjálpar til við að svara spurningum eigenda á aðalfundum,“ segir ráðgjafinn Þór Gíslason hjá Eignaumsjón að lokum.
Mar 24, 2026 | Fréttir
Við kynnum nýtt starfsfólk sem er nýlega komið til starfa hjá Eignaumsjón til að mæta sívaxandi umsvifum í starfsemi fyrirtækisins. Þetta eru þau Gyða Björg Jóhannsdóttir og Ormur Karlsson á þjónustusviði og Esther Ýr Kjartansdóttir, Sara Rós Waltersdóttir og Sveinn Ingi Einarsson á fjármálasviði.
Sveinn Ingi Einarsson starfar í fjármálateymi fjármálasviðs Eignaumsjónar. Sveinn er með BS gráðu í viðskiptafræði frá Háskólanum á Akureyri og meistaragráðu í fjármálum frá Háskóla Íslands. Sveinn starfaði hjá Origo, áður en hann kom til starfa hjá Eignaumsjón. Þar áður starfaði hann hjá Ls Retail og sem viðskiptastjóri hjá Símanum.
Sara Rós Waltersdóttir starfar í innheimtuteymi fjármálasviðs Eignaumsjónar. Hún er með BS gráðu í viðskiptafræði frá Háskólanum í Stokkhólmi og hefur m.a. unnið sem fjármála- og skuldaráðgjafi í Stokkhólmi, innheimtufulltrúi hjá Skattinum í Svíþjóð, fulltrúi fógeta í Stokkhólmi og viðskiptastjóri hjá Intrum í Stokkhólmi.
Esther Ýr Kjartansdóttir starfar í gjaldkerateymi fjármálasviðs Eignaumsjónar. Hún hefur lagt stund á íþrótta- og heilsufræði við Háskóla Íslands og er með stúdentspróf frá Fjölbrautaskólanum í Breiðholti. Esther starfaði hjá fyrirtækinu SalesCloud/Noona Iceland, áður en hún kom til starfa hjá Eignaumsjón. Þar áður starfaði hún sem þjónustufulltrúi/markaðsfulltrúi hjá Alvotech/Alvogen.
Ormur Karlsson er fulltrúi á þjónustusviði Eignaumsjónar. Ormur starfaði hjá Icelandair, m.a. við þjónustutengd störf og þjónustueftirlit, áður en hann kom til Eignaumsjónar. Þar á undan vann hann m.a. hjá Símanum sem sérfræðingur í fræðslu til viðskiptavina og viðskiptavernd. Ormur er með próf í markaðs- og sölumálum frá Viðskipta- og tölvuskólanum og stundaði nám á hagfræðibraut Fjölbrautaskólans í Breiðholti.
Gyða Björg Jóhannsdóttir er fulltrúi á þjónustusviði Eignaumsjónar. Hún starfaði í 21 ár hjá Símanum, áður en hún kom til Eignaumsjónar, bæði sem þjónustufulltrúi í þjónustuveri og í reikningaþjónustu og síðar sem ráðgjafi og skráningarfulltrúi á fyrirtækjasviði. Gyða er með stúdentspróf frá Kvennaskólanum í Reykjavík og hefur einnig lokið margskonar starfstengdum námskeiðum.
Um Eignaumsjón
Eignaumsjón býr að 25 ára þekkingu og reynslu í þjónustu við húsfélög og rekstrarfélög atvinnuhúsnæðis og er umsvifamesta fyrirtæki landsins á þessu sviði. Áhersla er lögð á hlutlausa nálgun, öryggi, gæðamál og skýra verkferla til að gera rekstur fasteigna markvissari og ódýrari, auka upplýsingaflæði til eigenda og auðvelda störf stjórna.
Dec 23, 2025 | Fréttir
Starfsfólk Eignaumsjónar óskar viðskiptavinum og landsmönnum öllum gleðilegra jóla og farsældar á komandi ári og þakkar ánægjuleg samskipti á liðnum árum.
Skrifstofa Eignaumsjónar er lokuð á aðfangadag, jóladag og annan í jólum. Mánudaginn 29. og þriðjudaginn 30. desember er skrifstofan opin á milli kl. 9 og 16. Lokað er á gamlársdag og nýársdag en frá og með föstudeginum 2. janúar er opið á hefðbundnum skrifstofutíma, milli klukkan 9 og 16 mánudaga til fimmtudaga og milli klukkan 9 og 15 á föstudögum.
Við minnum líka á að hægt er að senda tölvupóst á þjónustuver Eignaumsjónar á netfangið thjonusta@eignaumsjon.is, hafa samband í netspjalli á heimasíðunni, www.eignaumsjon.is. Símatími er milli kl. 10 og 15 alla virka daga í síma 585-4800.
Viðskiptavinir sem það kjósa geta líka skilað inn gögnum í póstkassa Eignaumsjónar við aðalinngang á suðurhlið/bakhlið Suðurlandsbrautar 30, 108 Reykjavík.
Dec 19, 2025 | Fréttir
Með innleiðingu á nýju flokkunarkerfi úrgangs á höfuðborgarsvæðinu haustið 2023 hafa fjölmörg húsfélög þurft að grípa til aðgerða og endurbóta á fyrirkomulagi sorpmála. Eignaumsjón aðstoðar húsfélög, bæði sem eru í þjónustu hjá félaginu sem önnur, við að leysa fyrirkomulag sorpgeymslna og sorpgerða á skynsamlegan og hagkvæman hátt.
Breytingar á fyrirkomulagi sorpmála hjá húsfélaginu Sólheimum 27 í Reykjavík, sem verið hefur í húsfélagsþjónustu hjá Eignaumsjón í um áratug, er dæmi um ráðgjöf og aðstoð sem skilaði húsfélaginu um 10 milljóna króna sparnaði frá upphaflegum áformum.
Hótað sektum ef ekki yrðu gerðar úrbætur
Eftir tunnuskiptin haustið 2023 var staða sorpmála í ólestri hjá umræddu húsfélagi. Tunnum og kerjum hafi verið komið fyrir undir svölum á fyrstu hæð með tilheyrandi brunahættu og hótaði byggingafulltrúinn í Reykjavík sektum, ef ekki yrði brugðist við. Þegar Eignaumsjón kom til aðstoðar í málinu var húsfélagið þegar komið með í hendurnar teikningu af stórri ruslageymslu á lóðinni og tilboð í verkið, sem hljóðaði upp á um 14 milljónir króna.
Sparaði húsfélaginu 10 milljónir króna
Eftir að hafa skoðað málið og m.a. borið saman fjölda sorpíláta sem húsfélagið var með og þörfina, með því að setja þessar tölur inn í svokallaðan „ruslareikni“ sem ráðgjafar Eignaumsjónar hafa þróað, var sett fram ný tillaga um hvernig best væri að leysa málið. Hún fólst í því að setja upp netta sorpgerðislausn frá BM Vallá, sem uppsett kostaði húsfélagið um fjórar milljónir króna, og var það samþykkt og gert. Kostnaðarlækkun húsfélagsins vegna verkefnisins er því rétt ríflega 70%.
„Það er okkar mat að vel hafi tekist til með þetta verkefni, það fór vissulega mikil vinna í þetta hjá okkur, sérstaklega að finna rétta staðsetningu fyrir skýlin og útkoman er góð kostnaðurinn við verkefnið umtalsvert lægri en útlit var fyrir í byrjun,“ segir Jóhanna Magnúsdóttir, formaður húsfélagsins Sólheimar 27.
