May 24, 2024 | Fréttir
Ríflega 100 gestir, 66 í sal og 41 á Teams, mættu á vorfund Eignaumsjónar í gær með stjórnendum hús- og rekstrarfélaga sem eru í þjónustu hjá fyrirtækinu. Tilefni fundarins var fara yfir rekstur húsfélaga og þjónustuna og samstarfið við Eignaumsjón, nú þegar aðalfundum er nú að mestu lokið á yfirstandandi fundartíð og nýjar stjórnir hafa tekið til starfa, eða sitjandi stjórnir fengið endurnýjað umboð.
Ágústa Katrín Auðunsdóttir, forstöðumaður fjármálasviðs, kynnti vörhús gagna; greiningarvinnu sem er hafin á rekstrarkostnaði fjöleignarhúsa en hvergi hérlendis er að finna jafn stórt gagnasafn um rekstur fjöleignarhúsa og hjá Eignaumsjón. Nefndi hún t.d. að bæði HMS og Grænni byggð hafi sýnt því áhuga að fá aðgang að slíkum upplýsingum.
Mestu viðhaldsútgjöldin í 21-40 ára húsum
Niðurstöður úr greiningunni sem Ágústa fór yfir á fundinum sýna m.a. að almennt er ekki safnað í mikla framkvæmdasjóði í nýrri fjöleignarhúsum. Hins vegar, þegar hús eru orðin 21-40 ára er oft kominn tími á stærri viðhaldsframkvæmdir og þá er jafnan meiri söfnun í gangi. Þá sýna gögnin að fjölbýlishús sem eru eldri en 41 árs, hafa mörg hver farið í gegnum miklar viðhaldsframkvæmdir og þá fari söfnun í framkvæmdasjóð aftur minnkandi, samanborið við söfnun í framkvæmdasjóð fyrir 21-40 ára gömul hús.
Fram kom einnig hjá Ágústu að þegar horft er á aðra stóra þætti húsgjalda, eins og tryggingar og hita, sjáist m.a. að viðmið í reiknilíkönum tryggingarfélaga hækki í takt við aldur húsa því líkur á tjóni séu taldar meiri í eldri húsum en nýrri. Hitatölur eru hins vegar hærri í nýjum húsum, sem kunni að skýrast af flóknari hitakerfum og snjóbræðslukerfum, sem og jafnvel stærri gluggum. Benti Ágústa á ýmis ráð til að lækka kostnað húsfélaga, fór yfir mismunandi sjóðstöðu húsfélaga og umræðu um samanburð á gjöldum húsfélaga. Þar er oft um að ræða þætti sem viðskiptavinir telja samanburðarhæfa en eru það ekki þegar betur er að gáð! Glærur Ágústu má skoða hér.
90% viðskiptavina í þjónustuleiðum Þ2 og Þ3
Fram kom í kynningu Páls Þórs Ármann, sem starfar við sölu og samskipti hjá Eignaumsjón, að um 90% allra hús- og rekstrarfélaga sem eru í þjónustu hjá Eignaumsjón nýti sér þjónustuleiðir Þ-2 eða Þ-3 í grunnþjónustu Eignaumsjónar. Til viðbótar við fjármálaþjónustu, sem er þjónustuleið Þ-1 og um 10% viðskiptavina nýta sér eingöngu, fela þjónustuleiðir Þ-2 og Þ-3 annars vegar í sér fjármála- og fundaþjónustu og hins vegar fjármála-, funda- og ráðgjafarþjónustu.
Hertar reglur banka gegn peningaþvætti hafa lagt verulega auknar kröfur á húsfélög um gagnaskil og staðfestingu stjórnarkjörs á aðalfundum húsfélaga og sagði Páll að fyrir vikið hafi fleiri félög verið að færa sig úr þjónustuleið Þ-1 í þjónustuleið Þ-2, til að auðvelda sér gagnaskil til banka, sem Eignaumsjón sér þá um.
Sérþjónusta Eignaumsjónar
Páll kynnti einnig Húsumsjón, Eignavöktun og Bílastuð, viðbótarþjónustuleiðir sem Eignaumsjón býður hús- og rekstrarfélögum, ef þörf er fyrir þannig þjónustu.
Húsumsjón, sem um 40 húsfélög eru þegar að nýta sér, snýr að reglubundnu eftirliti og umsjón með sameign húsfélags. Eignavöktun, sérþjónusta um aðgangsstýringar og öryggismál, var kynnt til sögunnar í mars á þessu ári og hefur hlotið góðar viðtökur að sögn Páls. Bílastuð, aðstoð við húsfélög sem vilja setja upp grunnkerfi fyrir rafbílahleðslu, hefur einnig mælst vel fyrir. Páll upplýsti að búið væri að vinna um 150 úttektir og verðkannanir, auk þess sem yfir 50 húsfélög hafi þegar gert samninga við Eignaumsjón um sjálfvirka innheimtu rafhleðslunotkunar með húsgjöldum viðkomandi notenda. Glærur Páls má skoða hér.
Samskipti við stjórnir og Húsbókin
Gunnþór S. Jónsson, forstöðumaður þjónustusviðs Eignaumsjónar, stiklaði á stóru um hlutverk Eignaumsjónar sem er í raun skrifstofa húsfélaga og sér um dagleg samskipti við félagsmenn, þjónustuaðila og banka, í samræmi við þá þjónustuleið sem viðkomandi húsfélag er í. Hann ítrekaði mikilvægi skilvirkra samskipta milli Eignaumsjónar og stjórna – og að fylgt væri reglum um samþykkt reikninga og greiðslu útgjalda, svo dæmi séu nefnd. Gunnþór fór enn fremur lauslega yfir hlutverk húsfélags, stjórna fjöleignarhúsa og formanns, upplýsingaskyldu stjórna gagnvart eigendum og hlutverk skoðunarmanna ársreikninga, samkvæmt skilgreiningu lagagreina 66-73 í fjöleignarhúsalögunum.
Gunnþór kynnti einnig Húsbókina – mínar síður eigenda, sem fór í loftið í október 2020 og hefur síðan verið í stöðugri þróun. Farið er inn í Húsbókina með því að smella á flipa uppi til hægri á heimasíðu Eignaumsjónar og skrá sig inn með rafrænum skilríkjum. Sýnt var hvernig Húsbókin er aðgengileg bæði stjórnum húsfélaga og eigendum, sem og þeim sem eigendur veita umboð til að fara inn með sínum aðgangi.
Vinna áfram tölfræði tengda fjöleignarhúsum
Framsöguerindin sem flutt voru á fundinum hafa nú verið gerð aðgengileg öllum sem hafa aðgang að Húsbókinni. Að lokinni framsögu urðu líflegar umræður þegar opnað var fyrir fyrirspurnir og ábendingar, undir stjórn Höllu Mjallar Stefánsdóttur fundarstjóra.
Lokaorðin á fundinum átti framkvæmdastjóri Eignaumsjónar, Daníel Árnason. Hann sagði tilgang samkomunnar að efla upplýsingaflæði til stjórnenda húsfélaga, ekki síst þeirra sem eru að sinna stjórnarsetu í fyrsta sinn. „Við viljum halda áfram þessum hádegisfundum með stjórnum og vona ég fundurinn í dag hafi gagnast þeim sem mættu,“ sagði Daníel og áréttaði að stefnt væri að því að vinna áfram kostnaðartölfræði tengda fjöleignarhúsum og nýta til gagns fyrir viðskiptavini Eignaumsjónar.
Jun 26, 2023 | Fréttir
RÚV greinir frá því í dag að Orkustofnun telji mæla í hleðslustöðvum Orku náttúrunnar standast kröfur og því hafi langvarandi réttaróvissu verið eytt um hvaða kröfur sölumælar í hleðslustöðvum skuli uppfylla, í það minnsta í bili.
Forsaga málsin er að fyrirtækið Ísorka, sem selur hleðslulausnir, kvartaði formlega til Orkustofnunar og óskaði eftir að stofnunin rannsakaði búnað hleðslustöðva sem samkeppnisaðili þess, Orka náttúrunnar, notar. Taldi Ísorka að mælar í hleðslustöðvum þyrftu að hafa svokallaða gerðarviðurkenningu, samkvæmt evrópskum stöðlum.
Krafa um gerðarviðurkenningu tekur bara til mælabúnaðar í dreifiveitum
Orkustofnun tók í fyrstu undir túlkun Ísorku og spurningar vöknuðu um hvort stór hluti hleðslustöðva á íslandi kynni að vera ólöglegur en samkvæmt frétt RÚV hefur Orkustofnun nú komist að þeirri niðurstöðu að mælar ON uppfylli lög. Er það mat stofnunarinnar að kröfur um gerðarviðurkenningu taki einungis til mælabúnaðar í dreifiveitum og ekki sé þörf á að mælibúnaður í hleðslustöðvum þjónustuveitenda uppfylli umræddar kröfur.
Bent er á í lok fréttar RÚV að ákvörðun Orkustofnunar megi kæra til úrskurðarnefndar raforkumála og að kærufrestur er 30 dagar. Nánar má lesa um niðurstöðu Orkustofnunar hér.
Sep 16, 2022 | Fréttir, Greinar
Hröð þróun hefur verið í þjónustu tengdri rafbílum á síðustu misserum. Sú þróun mun halda áfram hvað sem líður afnámi tolla og upptöku kílómetragjalds og vegtolla. Þjónusta tengd hleðslustöðvum í fjölbýlishúsum snýst annars vegar um útfærslu hleðslukerfa og kaup á hleðslustöðvum og hins vegar um rekstur rafhleðslukerfa, þ.e. umsjón með kerfunum og innheimtu raforkunotkunar.
Tilboð frá seljendum rafhleðslustöðva eru oftar en ekki ósamræmd og byggja á forsendum og útfærslum tilboðsgjafa. Fyrir leikmenn getur verið snúið að bera þau saman og átta sig á hvaða útfærsla er skynsamleg og hvaða tilboð er hagstæðast.
Í nýlegum ákvæðum í lögum um fjöleignarhús um uppbyggingu rafhleðslukerfa eru skýr ákvæði um að hússtjórnir skuli láta fara fram úttekt og greiningu á aðstæðum og leggja fram tillögur um útfærslu kerfa. Algengt er að hússtjórnir líti fram hjá þessari lagaskyldu og kalli þess í stað strax eftir tilboðum söluaðila, sem er miður því slík úttekt auðveldar öflun samræmdra útboðsgagna og sparar húsfélögum fjármuni þegar upp er staðið.
Þetta getum við fullyrt eftir greiningu á fjölda úttekta sem við höfum unnið fyrir stjórnir húsfélaga á hleðslukerfum fjöleignarhúsa, sem og þeim útboðum og verðkönnunum sem við höfum gert að beiðni húsfélagastjórna hjá þjónustuaðilum rafhleðslukerfa. Við könnum einnig verð hjá seljendum hleðslustöðva og gerum verðsamanburð, sjáum um umsóknir fyrir húsfélög ef hleðslukerfi eru styrkhæf, sækjum um VSK-endurgreiðslur og skilum stjórn viðkomandi húsfélags minnisblaði með mati og ráðleggingum sérfræðings.
Óháð ráðgjöf mikils virði
Greiningar okkar sýna að full ástæða er fyrir stjórnir húsfélaga að afla sambærilegra tilboða í rafhleðslukerfi húsfélaga. Niðurstöðurnar sýna líka að meðalkostnaður við gott kerfi, fyrir bæði bílastæði í séreign og sameign, hefur verið um 100 þúsund krónur á hverja eign og fer heldur lækkandi. Þá vekur það athygli að munur á hæstu og lægstu tilboðum í sambærilegar útfærslur hleðslukerfa var mjög mikill í fyrstu en hefur farið minnkandi, sem gefur vísbendingu um að þessi markaður sé að ná meira jafnvægi. Við horfum einnig til kostnaðar við uppsetningu stöðva, eftir að grunnkerfið hefur verið sett upp, en umtalsverður munur getur verið á gjaldskrá þjónustufyrirtækja vegna uppsetningar viðbótarstöðva.
Það er ótvírætt að ofangreint verklag skilar húsfélögum bæði betri kjörum og markvissari verkáætlunum um uppsetningu rafhleðslukerfa. Það er líka umhugsunarefni að lausnir fyrirtækja sem farið hafa mikinn undanfarið á auglýsingamarkaði hafa í fæstum tilfellum verið metnar hagstæðastar fyrir húsfélögin.
Umsjón rafhleðslukerfa í fjölbýli
Samhliða því að stjórn húsfélags tekur ákvörðun um kaup á rafhleðslukerfi og búnaði á hún að okkar mati að taka líka ákvörðun um umsýslu kerfisins. Í grunninn felst hún í að tryggja virkni kerfisins í heild, bæði uppitíma, álagsstýringu, aðgangsréttindi og mælingu á raforkunotkun hleðslustöðva notenda.
Í dag er umsýsla hleðslukerfa rafbíla mjög mismunandi. Víða hafa hússtjórnarmenn tekið að sér að sjá um kerfið og innheimtu vegna notkunar, einnig bjóða þjónustufyrirtæki upp á umsjón með sínum kerfum gegn gjaldi. Dæmi eru um að þjónustuaðilar innheimti bæði mánaðargjald og síðan viðbótargjald miðað við notkun. Einnig hafa sum húsfélög lagt umtalsvert álag á kostnaðarverð raforku sem brýtur í bága við lög um fjöleignarhús. Samkvæmt lögunum er húsfélögum einungis ætlað að innheimta beinan útlagðan kostnað og umsýslukostnað vegna reksturs rafhleðslukerfa.
Rafrænn aflestur og gjaldfærsla með húsgjöldum
Það er skoðun okkar hjá Eignaumsjón að til framtíðar færi best á því fyrir húsfélög að hleðslukerfi rafbíla uppfylltu kröfur um fjartengingu og vefþjónustu, þ.e. séu að fullu snjallvædd og uppfylli staðla um samhæfingu. Þá er hægt að koma aflestri og reikningsgerð yfir í sjálfvirkt fyrirkomulag og gjaldfæra kostnað rafrænt á húsfélagsreikning viðkomandi notanda/rafbílaeiganda með öðrum húsgjöldum, eins og kveðið er á um í fjöleignarhúsalögunum.
Að lokum skal áréttað að æskilegt er að okkar mati að umsýslusamningar með hleðslukerfum fjöleignarhúsa feli í sér vöktun vegna bilana, eftirlit með gæðum og afköstum kerfisins ásamt vöktun á orkuverði hjá smásölum, til að tryggja besta orkuverð á hverjum tíma.
Grein eftir Daníel Árnason, framkvæmdastjóra Eignaumsjónar, sem birtist 16. september 2022 á visir.is/skoðun
Aug 11, 2022 | Fréttir
Bílastuð er tvískipt þjónustuleið Eignaumsjónar vegna uppsetningar rafhleðslukerfa í fjöleignarhúsum. Þjónustan uppfyllir lagalegar skyldur húsfélaga um úttekt á framtíðarþörf fyrir hleðslukerfi rafbíla og tryggir skiptingu kostnaðar milli húsfélaga og notenda með hagsmuni húsfélaga að leiðarljósi.
Að beiðni stjórna húsfélaga gerir Eignaumsjón í fyrsta lagi úttekt á hleðsluaðstöðu húsfélags sem tryggir hagkvæma framtíðarlausn og uppfyllir kröfur um framkvæmdaáætlun fyrir uppsetningu rafhleðslukerfis. Kerfið verður eitt af grunnkerfum fjöleignarhússins, eins og t.d. heitt og kalt vatn og eykur þannig bæði virði fasteigna í húsinu og sölulíkur. Að beiðni stjórna húsfélaga kannar Eignaumsjón einnig verð hjá seljendum rafhleðslukerfa og gerir verðsamanburð, sér um umsóknir fyrir húsfélög ef rafhleðslukerfi eru styrkhæf, sækir um VSK-endurgreiðslur og skilar stjórn minnisblaði með mati og ráðleggingum sérfræðings.
Gjaldfærsla beint á húsfélagsreikning notanda
Eignaumsjón býður húsfélögum einnig upp á séhæfða innheimtu gjalda vegna hleðslu rafbíla þara sem rétt skipting kostnaðar er tryggð. Þá færist dagleg ábyrgð húsfélags á rafhleðslukerfinu, s.s. aflestur og reikningsgerð, yfir í sjálfvirkt fyrirkomulag og gjaldfærist rafrænt á húsfélagsreikning viðkomandi notanda/rafbílaeiganda. Rétt er að benda á að þetta greiðslufyrirkomulag getur einnig nýst félögum sem eru ekki í húsfélagsþjónustu hjá Eignaumsjón og fara færslur þá í greiðsluþjónustu hjá banka viðkomandi notanda.
Heildarumsjón með rafhleðslukerfi húsfélagsins
Ef rafhleðslukerfi húsfélaga eru að fullu snjallvædd og uppfylla staðla – eru OCPP 1.6J samhæfð – getur Eignaumsjón boðið húsfélögum upp á heildarumsjón með rekstri og viðhaldi hleðslukerfisins. Heildarumsjón felur m.a. í sér að Eignaumsjón uppfærir notendaskrá og notkun, sem er forsenda réttrar innheimtu og birtast öll gögnin í húsbók viðkomandi notanda á heimasíðu Eignaumsjónar; www.eignaumsjon.is. Þjónustuvakt er vegna bilana og þjónustubeiðna, reglulegt mat fer fram á afköstum og gæðum kerfisins og orkuverð er vaktað hjá smásölum og borið saman við opinberar upplýsingar sem birtast á www.aurbjorg.is.
Jun 3, 2022 | Fréttir
Öllum fjármunum hefur verið úthlutað úr 120 milljóna króna sjóði sem Reykjavíkurborg og OR stofnuðu árið 2019 til að styðja húsfélög fjölbýlishúsa í borginni við að setja upp hleðslubúnað fyrir rafbíla á sínum lóðum. Ekki hefur verið tekin ákvörðun um framhald eða aukið fé í sjóðinn, samkvæmt upplýsingum á heimasíðu Reykjavíkurborgar.
Ákvörðun um framhald sjóðsins og aukið fjármagn til styrkveitinga til húsfélaga fjölbýlishúsa vegna uppsetningar hleðslubúnaðar fyrir rafbíla er eitt fjölmargra úrlausnarmála sem bíður nýs meirihluta í borginn en vilji var til þess hjá fráfarandi meirihluti að framlengja átakið.
Úthlutunarreglur sjóðsins voru samþykktar af borgarráði í júlí 2019, í framhaldi af samkomulagi borgarinnar og OR í apríl á sama ári þess efnis að báðir aðilar skuli leggja árlega 20 milljónir króna hvor í þrjú ár til sjóðsins, eða samtals 120 milljónum króna. Hámarks styrkupphæð til hvers húsfélags hefur verið ein og hálf milljón króna en þó aldrei meira en sem nemur 67% af heildarkostnaði verks með virðisaukaskatti, sjá nánar hér.
Hvetur til áframhaldandi stuðnings borgaryfirvalda
Það er reynsla sérfræðinga Eignaumsjónar, sem hafa á undanförnum misserum lagt sig í framkróka um að aðstoða húsfélög við úttektir á bestu kostum við útfærslu og uppsetningu hleðslubúnaðar fyrir rafbíla, að umræddir styrkir borgarinnar og OR, hafa skipt sköpum fyrir fjölmörg húsfélög í þessum efnum.
„Við hjá Eignaumsjón hvetjum meirihlutann sem tekur við völdum í borginni til að framlengja starfsemi styrktarsjóðsins og tryggja honum fjármagn. Stuðningur sjóðsins hefur bæði létt undir fjármögnun rafhleðslukerfa í húsfélögum og hraðað ákvarðanatöku og framkvæmdum, segir Bjarni G. Hjarðar, sérfræðingur á fasteignasviði hjá Eignaumsjón.
Verklag Eignaumsjónar skilar umtalsverðum sparnaði
Að sögn Bjarna hefur Eignaumsjón þegar gert fjölda úttekta fyrir húsfélög, sem eru að bregðast við beiðnum um aðgang að hleðslukerfi fjöleignarhúss í samræmi við nýleg ákvæði fjöleignarhúsalaganna. Í framhaldi af úttektunum hafa sérfræðingar Eignaumsjónar aðstoðað stjórnir húsfélaga, sem þess hafa óskað, við að útvega tilboð miðað við fyrirliggjandi verkáætlanir.
„Samanburður okkar á 14 nýlegum tilboðum sýnir að næst hagstæðustu tilboðin í rafhleðslukerfi húsfélaga eru að meðaltali um 28% hærri en hagstæðustu tilboðin,“ segir Bjarni og því sé ljóst að verklag Eignaumsjónar skili húsfélögum umtalsverðum sparnaði.
„Dæmin sýna að í stærri verkefnum eru stjórnir húsfélaga að spara sem nemur ígildi þeirrar hámarksstyrkupphæðar sem borgin hefur verið að úthluta, með því að vanda verklag við undirbúning með aðstoð okkar hjá Eignaumsjón.“
Nánari upplýsingar um Bílastuð – þjónustu Eignaumsjónar við húsfélög vegna hleðslu rafbíla – er að finna hér.
