Feb 18, 2022 | Fréttir, Greinar
Á annað ár er liðið frá því að mínar síður Eignaumsjónar, þjónustusíður fyrir eigendur og stjórnir húsfélaga sem eru í þjónustu hjá félaginu, gengu í endurnýjun lífdaga með nýju vefviðmóti og breyttu útliti. Til frekari aðgreiningar fengu þjónustusíðurnar einnig nýtt nafn: Húsbókin – mínar síður eigenda.
Húsbókin hefur mælst vel fyrir hjá viðskiptavinum okkar sem farnir eru að nýta sér þessa rafrænu þjónustu- og upplýsingagátt. Þar geta bæði eigendur og stjórnir í húsfélögum og rekstrarfélögum atvinnuhúsa nálgast upplýsingar um málefni síns húsfélags á einfaldan hátt og fylgst rafrænt með greiðslustöðu og verkefnum, hvar og hvenær sem þeim hentar, í tölvu, spjaldtölvu eða snjallsíma.
Hvað gögn er hægt að skoða?
Segja má að notendur geti nú með einum „smelli“ skoðað rauntímaupplýsingar um sína eign því leitast hefur verið við að hafa allt notendaviðmót Húsbókarinnar sem fljótvirkast og þægilegast. Við fyrstu innskráningu þarf notandi að skrá sig inn með kennitölu greiðanda og/eða eiganda og samþykkja skilmála Húsbókarinnar með netfangi sínu.
- Húsbókin er upplýsingagátt fyrir eigendur og stjórnir húsfélaga í þjónustu hjá Eignaumsjón. Í aðdraganda aðalfunda eru t.d. öll fundargögn aðgengileg í húsbókinni. Þar er enn fremur hægt að nálgast fundargerðir, ársreikninga, kostnaðaráætlanir, tryggingarskírteini og ýmis gögn sem snúa að viðhaldi og framkvæmdum viðkomandi húsfélags.
- Eigendur/íbúar hafa ávallt aðgang að nýjustu upplýsingum um húsgjöldin sín í Húsbókinni, s.s. greiðsluseðla og kröfusögu.
- Stjórnarmenn sjá daglega fjárhagsstöðu húsfélagsins, stöðu bankareikninga, útistandandi húsgjöld/framkvæmdagjöld og stöðu innheimtukrafna allra greiðenda. Eftirlitsskýrslur húsumsjónar eru einnig aðgengilegar stjórnarmönnum í Húsbókinni, ef við á, sem og önnur gögn sem snúa að stjórn húsfélagsins.
Rafrænar þjónustubeiðnir og afslættir
Ný þjónusta bættist nýlega við Húsbókina sem eru rafrænar þjónustubeiðnir. Undir flipanum „Þjónustuleiðir“ er hægt að framkvæma nafnabreytingar, eigendaskipti og breytingar á heimilisfangi. Jafnframt er hægt að óska eftir yfirlýsingu húsfélags vegna sölu á fasteignum og senda beiðnir vegna útlagðs kostnaðar o.fl.
Undir flipanum „Afslættir“, hafa viðskiptavinir aðgang að afsláttartilboðum sem Eignaumsjón hefur samið um við nokkur fyrirtæki. Má þar nefna mjög góð sérkjör á rafmagni hjá HS Orku fyrir bæði húsfélög og eigendur séreigna í húsfélögum. Góð afsláttarkjör eru einnig í boði af öryggisþjónustu og búnaði hjá Securitas og af þjónustu hjá Lögborg lögfræðiþjónustu, vegna mála sem tengjast húsfélögum.
Örugg gagnageymsla
Til að tryggja sem best öryggi gagna er innskráning í Húsbókina aðgangsstýrð gegnum island.is með rafrænum skilríkjum í snjallsíma eða íslykli, þannig að einungis þeir sem eiga rétt á að skoða umrædd gögn hafi aðgang að þeim.
Til hagræðis helst aðgangur virkur í 30 daga í viðkomandi tæki eða tölvu en notandi þarf ávallt að skrá sig inn á ný, þegar farið er inn í Húsbókina úr nýju tæki eða tölvu.
Aðgengilegar upplýsingar auka gagnsæi og virði eigna
Húsbókin er stórt skref í átt að enn betri þjónustu við eigendur fasteigna sem eru í viðskiptum við Eignaumsjón og markmiðið er að efla hana enn frekar í framtíðinni. Greinargóðar og aðgengilegar upplýsingar auka virði eigna og við viljum að eigendur í hús- og rekstrarfélögum sem eru í þjónustu Eignaumsjónar, njóti þess.
Jan 27, 2022 | Fréttir
Kristín Helga Björnsdóttir kom nýlega til starfa í þjónustuveri Eignaumsjónar. Þjónustuverið sinnir erindum frá stjórnum hús- og rekstrarfélaga, annast samskipti við þjónustu- og fagaðila og svarar almennum erindum sem berast félaginu.
Kristin Helga starfaði við móttöku viðskiptavina hjá Terra, áður en hún kom til starfa hjá Eignaumsjón í nóvember 2021. Þar á undan starfaði hún hjá Kletti leigufélagi og Íbúðalánasjóði, við afgreiðslu og upplýsingamiðlun til viðskiptavina. Kristín Helga er með próf sem viðurkenndur bókari frá Háskólanum í Reykjavík, stúdentspróf frá Keili og leggur stund á viðskiptalögfræði við Háskólann á Bifröst.
Um Eignaumsjón
Eignaumsjón býr að yfir 20 ára þekkingu og reynslu í þjónustu við húsfélög og rekstrarfélög atvinnuhúsnæðis. Markmið félagsins er að gera rekstur fasteigna bæði markvissari og ódýrari, auka upplýsingaflæði til eigenda og auðvelda störf stjórna hús- og atvinnufélaga.
Dec 22, 2021 | Fréttir
Skrifstofa Eignaumsjónar er lokuð á aðfangadag og gamlársdag en opið er á hefðbundnum skrifstofutíma virka daga milli jóla og áramóta.
Vegna hertra COVID-19 sóttvarnaraðgerða hefur að nýju verið tekið upp það verklag á skrifstofu Eignaumsjónar að hluti starfsfólks er með viðveru á Suðurlandsbraut 30 og hluti er heima í fjarvinnslu.
Þá er þess farið á leit við viðskiptavini að þeir takmarki eins og hægt er heimsóknir í þjónustuverið og skrifstofuna á Suðurlandsbraut 30. Þar er eigi að síður tekið á móti gögnum á skrifstofutíma og gögn afhent viðskiptavinum en hvatt er til þess að almennar fyrirspurnir og samskipti fari sem mest fram rafrænt.
Hægt er að senda tölvupóst á þjónustuverið á netfangið thjonusta@eignaumsjon.is, hafa samband í netspjalli á heimasíðunni, www.eignaumsjon.is eða hringja í síma 585-4800. Þá geta þeir sem það kjósa skilað inn gögnum í póstkassa Eignaumsjónar, sem er við inngang á suðurhlið/bakhlið hússins að Suðurlandsbraut 30.
Þrátt fyrir samkomutakmarkanir og ýmsa erfiðleika á árinu sem er að líða hefur starfsemi Eignaumsjónar gengið vel og tókst að ljúka meginhluta allra aðalfunda ársins 2021 og undirbúningur vegna aðalfunda árið 2022 er vel á veg kominn.
Starfsfólk Eignaumsjónar óskar viðskiptavinum og landsmönnum öllum gleðilegra jóla og farsældar á komandi ári og þakkar ánægjuleg samskipti á árinu sem er að ljúka!
Sep 15, 2021 | Fréttir
Tæpum þremur árum eftir að þjónustuver Eignaumsjónar var sett á laggirnar standa þar nú átta starfsmenn vaktina við að svara og sinna erindum frá stjórnum hús- og rekstrarfélaga sem eru í þjónustu hjá Eignaumsjón. Þjónustuverið annast líka öll samskipti við þjónustu- og fagaðila og svarar öllum almennum erindum sem berast, hvort sem það er í tölvupósti, netspjalli, símtölum og heimsóknum á skrifstofu félagsins á Suðurlandsbraut 30.
„Þjónustuverið hefur heldur betur sannað sig frá því að það var sett á laggirnar og eru öll samskipi við viðskiptavini okkar mun markvissari eftir að það tók til starfa,“ segir Páll Þór Ármann, forstöðumaður þjónustusviðs Eignaumsjónar.
Fljótari og skilvirkari svörun og betri miðlun upplýsinga
„Viðskiptavinum hefur fjölgað jafnt og þétt og nú eru yfir 700 hús- og rekstrarfélög með um 15.500 íbúðir/eignir í þjónustu hjá okkur. Eðlilega er rík krafa um svör og aðgerðir án verulegra tafa. Þær væntingar reynum við sannarlega að uppfylla en ég held að það hefði verið okkur þungt í skauti að sinna öllum okkar viðskiptavinum ef við hefðum ekki lagt umtalsverðan tíma og fjármuni í að tölvuvæða og þróa sem mest af okkar starfsemi, þar á meðal allt fyrirkomulag svörunar og samskipta,“ bætir Páll við.
„Tilkoma þjónustuversins hefur bæði skilað fljótari og skilvirkari svörun erinda og markvissari og betri miðlun upplýsinga til viðskiptavina og þjónustuaðila. Um leið og þjónustuverið tók til starfa var líka tekið í notkun sérhannað verkbókhald og öflugt upplýsingakerfi sem tryggir að allar verkbeiðnir og erindi sem berast til okkur eru bókfærð og þeim svarað innan ásættanlegs tíma.“
Nýr liðsmaður í þjónustuverinu
Nýlega bættist áttundi starfsmaðurinn í hópinn í þjónustuverinu þegar Þórhallur Sveinsson kom til liðs við Eignaumsjón. Þórhallur starfaði áður hjá Eignarekstri í tvö ár og þar áður var hann lagerstjóri í 21 ár hjá Opnum kerfum.
„Við fögnum komu Þórhalls til okkar og erum sannfærð um að hann muni efla starfsemi þjónustuversins enn frekar,“ segir Páll.
Auk almennrar ráðgjafar til eigenda fasteigna og hússtjórna mun Þórhallur sinna þjónustu við húsfélög vegna framkvæmda af ýmsum toga, s.s. að útvega þjónustuaðila, verktaka og tilboð.
Um Eignaumsjón
Eignaumsjón sérhæfir sig í þjónustu við húsfélög og rekstrarfélög atvinnuhúsnæðis með það að markmiði að gera rekstur fasteigna bæði markvissari og hagkvæmari, auka upplýsingaflæði til eigenda og hússtjórna og auðvelda störf þeirra.
Jul 8, 2021 | Fréttir
Það er ekkert einhlýtt svar þegar spurt er hvenær eigi að byrja að huga að viðhaldi fasteigna en það er reynsla okkar hjá Eignumsjón, sem höfum yfir 20 ára þekkingu og reynslu í þessum efnum, að haustið sé kjörinn tími til að byrja að huga að viðhaldsframkvæmdum næsta sumars.
Undirbúningur og ákvarðanir um stærri viðhaldsframkvæmda hjá húsfélögum taka alla jafnan nokkurn tíma. Eigendur þurfa bæði að vega og meta viðhaldsþörf, forgangsröðun og eigin fjárhagsgetu en gott samráð og húsfundir eru lykill að farsælli niðurstöðu. Oftar en ekki þarf líka að halda nokkra húsfundi, áður en endanleg niðurstaða og ákvörðun liggur fyrir.
Horfum til lengri tíma
„Íslenska aðferðin“ hefur lengi verið sú að bíða með viðhald og viðgerðir þar til í óefni er komið, með tilheyrandi aukakostnaði. Þessu höfum við reynt að breyta hjá húsfélögum sem eru í þjónustu hjá okkur en þá reynir á eigendur í viðkomandi fjölbýli, sem þurfa að ná samstöðu um málið.
Það sem við ráðleggjum stjórnum húsfélaga sem hyggjast fara í umfangsmeiri viðhaldsframkvæmdir er að boða til löglegs fundar með eigendum þar sem ástand eignar og viðhald næstu ára er fundarefnið. Fyrsta skref er alla jafnan að veita stjórn heimild til að ráða sérfróðan aðila til að gera ástandsskýrslu og kostnaðarmat vegna viðgerða og viðhalds sem kynntar eru á húsfundi þar sem ákvörðun er tekin um forgang viðhaldsverkefna og stjórn veitt heimild til að afla tilboða í verkið. Tilboð eru kynnt á húsfundi með sundurliðun á aðgerðum og kostnaði, ákveðið hvaða tilboði skuli taka og samið í framhaldinu við viðkomandi verktaka.
Betri yfirsýn yfir rekstur og kostnað
Með þessu verklagi eru minni líkur á óvæntum kostnaði vegna viðhaldsverkefna að okkar mati. Jafnframt fæst betri heildarmynd á allan rekstur og viðhald húsfélagsins og greiðsludreifing í framkvæmdasjóð húsfélagsins verður jafnari fyrir eigendur.
Eignaumsjón leggur að sjálfsögðu húsfélögum, sem eru í þjónustu hjá félaginu, lið við undirbúning viðhaldsframkvæmda. Hægt er að senda erindi á þjónustuverið á netfangið thjonusta@eignaumsjon.is, hafa samband á netspallinu á www.eignaumsjon.is eða hringa í síma 585-4800 með ósk um tilboð frá fagaðilum í ástandsmat vegna viðhaldsframkvæmda.
