Sep 7, 2026 | Fréttir
Húsbók Eignaumsjónar hefur verið hluti af þjónustu fyrirtækisins við eigendur og stjórnir húsfélaga frá árinu 2020. Hún hefur nú verið uppfærð með ýmsum nýjum möguleikum, einkum fyrir stjórnir húsfélaga.
„Við kynntum Húsbókina til sögunnar árið 2020 með það að markmiði að gera eigendum og stjórnum húsfélaga auðveldara að nálgast upplýsingar um húsfélagið sitt” segir Gunnþór S. Jónsson, forstöðumann þjónustusviðs Eignaumsjónar, um tilurð Húsbókarinnar.
“Við vildum færa upplýsingarnar nær notendum og skapa einn sameiginlegan aðgangsstað þar sem hægt væri að nálgast gögn og upplýsingar um húsfélagið á einfaldan og öruggan hátt. Síðan þá hefur Húsbókin þróast töluvert og við höfum smám saman bætt við nýjum upplýsingum og möguleikum.“
Áhersla á að bæta frekar upplýsingagjöf til stjórna
„Húsbókin er fyrst og fremst upplýsingavefur fyrir eigendur og stjórnir. Eigendur geta þar nálgast upplýsingar og gögn sem tengjast sínu húsfélagi, en stjórnir hafa jafnframt aðgang að ítarlegri upplýsingum sem tengjast stjórnun og rekstri,” segir Gunnþór. Hann bætir við að áhersla er lögð á að Húsbókin sé ekki bara geymslustaður fyrir gögn heldur gagnlegt verkfæri sem auðveldar fólki að finna þær upplýsingar sem það þarf.
“Í uppfærslunni núna var lögð áhersla á að bæta aðgengi stjórna að upplýsingum um fjármál og önnur gögn húsfélagsins. Helstu nýjungarnar fela í sér skýrari aðgreiningu á fjármálaupplýsingum frá öðrum gögnum húsfélagsins til að gera aðgang stjórna bæði skýrari og einfaldari. Meðal annars hefur flipanum „Stjórnargögn“ verið skipt upp í annars vegar „Stjórn – fjármál“ og hins vegar „Stjórn – gögn“.
Dagleg uppfærsla á stöðu bankareikninga
„Stjórnir geta nú svo til í rauntíma fylgst með stöðu bankareikninga húsfélagsins, sem uppfærast sjálfkrafa daglega. Einnig er hægt að skoða hvern bankareikning fyrir sig og sjá hreyfingar á reikningnum. Stjórnir geta líka skoðað kröfur á húsfélagið, bæði greiddar og ógreiddar, og nálgast reikninga, viðhengi og samþykktir sem tengjast greiddum kröfum,” bætir Gunnþór við og áréttar að þessar nýjungar veiti stjórnum einfaldlega betri yfirsýn yfir fjármál húsfélaga og auðveldi stjórnum að nálgast þær upplýsingar sem þær þurfa.“
Betri aðgangur að eigandalista og húsfélagsyfirlýsingum
„Undir flipanum “Stjórn-gögn” geta stjórnir nú meðal annars nálgast upplýsingar Eignaumsjónar um eigendur í húsfélaginu. Stjórnir geta nú líka sjálfar uppfært eigendalistann í Húsbókinni, ” segir Gunnþór.
“Við höfum líka gert húsfélagsyfirlýsingar aðgengilegri. Eignaumsjón útbýr slíkar yfirlýsingar meðal annars við sölu eigna og nú eru allar útgefnar húsfélagsyfirlýsingar aðgengilegar stjórn á einum stað í Húsbókinni. Þar koma fram upplýsingar um greiðslustöðu hússjóðs, væntanlegar framkvæmdir og fleira.“
Húsbókin – upplýsingar þegar þeirra er þörf
Húsbókin er ekki bara staður þar sem upplýsingar eru geymdar – hún er leið Eignaumsjónar til að gera upplýsingar aðgengilegri og þjónustuna betri. “Tölfræði, sem sýnir notkun Húsbókarinnar í hverju félagi, er því áhugaverð nýjung sem við höfum mikinn áhuga á. Þar er meðal annars hægt að sjá fjölda heimsókna og notenda á tilteknu tímabili og hvaða síður og efnisþættir eru mest skoðaðir,” segir Gunnþór og áréttar að Húsbókin er verkefni sem lýkur í raun aldrei.
“Við teljum að gott aðgengi að upplýsingum sé mikilvægur þáttur í góðri þjónustu við húsfélög. Stjórnir eru að sinna mikilvægu hlutverki og þurfa oft að taka ákvarðanir sem byggja á upplýsingum um fjármál, eigendur, framkvæmdir og rekstur húsfélagsins. Þá skiptir máli að upplýsingarnar séu aðgengilegar þegar þeirra er þörf.
Húsbókin á að einfalda þetta – bæði fyrir stjórnir og eigendur. Með nýju tölfræðinni fáum við líka betri upplýsingar um hvernig Húsbókin er notuð og það mun hjálpa okkur að taka næstu skref,” segir Gunnþór S. Jónsson, forstöðumaður þjónustusviðs Eignaumsjónar að lokum.
Sjá nánar um Húsbók Eignaumsjónar
Sjá nánar um nýjungar í Húsbókinni
Dec 12, 2025 | Fréttir, Greinar
Hjá Eignaumsjón er mikið er lagt upp úr réttri boðun aðalfunda til að tryggja að fundir húsféalga verði löglegir, en boða skal til aðalfunda með sannanlegum hætti með minnst átta og mest 20 daga fyrirvarai. Fyrstu aðalfundirnir hefjast 12. janúar nk. en alls verða ríflega 1.200 aðalfundir húsfélaga og rekstrarfélaga á dagskrá fram til maíloka 2026.
Að öllu jöfnu verða aðalfundirnir haldnir frá mánudegi til fimmtudags og á laugardögum í fundarsölum Eignaumsjónar á Suðurlandsbraut 30 í Reykjavík og Bæjarhrauni 6 í Hafnarfirði, en einnig í sameignum húsfélaga og fundarsölum í þeirra nærumhverfi, s.s. í skólum, safnaðarheimilum og hjá íþróttafélögum.
Rafræn boðun funda í Húsbókinni er öruggust
Öruggasta og skilvirkasta boðunarleið aðalfundar er með tölvupósti til eiganda sem skráður er í Húsbókina á heimasíðunni okkar. Við hvetjum því alla eigendur, sem hafa ekki virkjað Húsbókina til að gera það strax. Það er ekki flókið. Viðkomandi skráir sig inn í fyrsta sinn með því að smella á Húsbókarhnappinn efst til hægri á www.eignaumsjon.is, auðkennir sig með rafrænum skilríkjum og skráir inn netfang. Nánari upplýsingar um Húsbókina, innskráningu og notendastillingar er að finna hér.
Aðalfundarboð eru send í bréfapósti á eigendur sem eru með lögheimili utan viðkomandi fasteignar og jafnframt sjá stjórnir um að hengja aðalfundarboð upp í sameign. Það má ekki gleymast – þá telst fundurinn ekki löglega boðaður.
Aðalfundargögn aðgengileg í Húsbókinni
Tímanlega fyrir aðalfund geta íbúðareigendur nálgast aðalfundargögnin í Húsbókinni. Þar verður líka hægt að skoða ársreikning viðkomandi hús- eða rekstrarfélags, kostnaðar- og húsgjaldaáætlun fyrir árið 2026, aðalfundarboðið og önnur gögn sem leggja á fyrir aðalfund. Í Húsbókinni er einnig hægt að skoða húsgjaldaseðla, fundargerðir og fleiri upplýsingar sem tengjast rekstri viðkomandi húsfélags og kynna sér vildarkjör og afslætti, sem bjóðast öllum viðskiptavinum Eignaumsjónar.
Að lokum skal áréttað að fundargögn eru ekki lengur prentuð út fyrir aðalfundi sem eru haldnir í fundarsölum Eignaumsjónar, heldur varpað upp á skjá, en það er liður í viðleitni Eignaumsjónar að sýna samfélagslega ábyrgð með því að draga úr pappírsnotkun.
Dec 3, 2025 | Fréttir
Með gangsetningu sjöunda áfanga Orkuversins Svartsengis þann 1. desember sl. vex rafmagnsframleiðsla þar um þriðjung, úr 63 í 85 megawött. Eignaumsjón óskar HS Orku til hamingju með þennan merka áfanga en um átta ár eru nú frá því að fyrirtækin gerðu með sér samkomulag um raforkuviðskipti, sem hefur skilað viðskiptavinum Eignaumsjónar umtalsverðum afslætti af smásöluverði við kaup af raforku frá HS Orku.
Nýja orkuverið, Orkuver 7, leysir af hólmi tvö af eldri orkuverum HS Orku í Svartsengi, auk þess sem framkvæmdin felur í sér umtalsverðar endurbætur á ýmsum búnaði sem tengist heitavatnsframleiðslu fyrirtækisins. Stækkunin eykur framleiðslugetu á raforku í Svartsengi um allt að þriðjung en framleiðslugetan er nú um 63MW, að því er fram kemur á heimasíðu HS Orku, og Tómas Már Sigurðsson, forstjóri HS Orku, er að vonum ánægður:
„Í ljósi náttúruhamfaranna sem gengið hafa yfir Reykjanes á framkvæmdatímanum, er það einstakt afrek að byggja þessa nýjustu virkjun Íslands þannig að allar áætlanir hafi staðist. Allir sem að verkefninu hafa komið eiga mikið hrós skilið, jafnt verktakar og ráðgjafar sem starfsfólk HS Orku.“ Sjá nánari umfjöllun í frétt á heimasíðu HS Orku.
Bestu kjör á markaði fyrir viðskiptavini Eignaumsjónar
Með samningi sínum við HS Orku getur Eignaumsjón boðið viðskiptavinum sínum upp á bestu kjör á rafmagni á markaði. Afsláttarkjör Eignaumsjónar hjá HS orku gilda um kaup á almennri, óskerðanlegri raforku en ná ekki til raforkuflutnings eða mælagjalds. Afsláttarkjörin gilda fyrir húsfélög og rekstrarfélög sem eru í þjónustu hjá Eignaumsjón. Afsláttarkjörin standa einnig til boða öllum eigendum fasteigna í húsfélögum sem eru í þjónustu hjá Eignaumsjón og eigendur/íbúar, sem vilja nýta sér afsláttarkjörin, geta skráð sig í viðskipti við HS Orku á Húsbókinni, mínum síðum eigenda á www.eignaumsjon.is.
Í ljósi verðhækkana á raforku undanfarið, er ljóst að það er ávinningur fyrir viðskiptavini Eignaumsjónar að nýta sér þessi kjör.
May 23, 2025 | Fréttir
Á hádegisfund Eignaumsjónar í dag með stjórnendum hús- og rekstrarfélaga sem eru í þjónustu hjá fyrirtækinu var farið yfir hlutverk og ábyrgð stjórna hús- og rekstrarfélaga, þjónustu Eignaumsjónar og samstarfið fram undan.
Ríflega 100 gestir mættu á vorfundinn sem haldinn hefur verið sl. þrjá ár, til upplýsingar fyrir nýjar stjórnir sem kosnar voru til starfa á nýlega afstöðnum aðalfundum.
Fyrstu á mælendaskrá var Páll Þór Ármann, sérfræðingur hjá sölu- og samskiptum, sem kynnti helstu niðurstöður nýrrar þjónustukönnunar sem félagið gerði í tengslum við aðalfundina. Almennt má segja að niðurstöður könnunarinnar hafi verið jákvæðar og muni hjálpa félaginu að bæta þjónustuna. Fram kom einnig að innan tíðar verður send almenn þjónustukönnun á alla formenn og meðstjórnendur hús- og rekstrarfélaga sem eru í þjónustu hjá félaginu og hvatt til þátttöku. Sjá kynningu hér.
Þjónusta og samskipti
Forstöðumaður þjónustusvið Eignaumsjónar, Gunnþór Steinar Jónsson, fór m.a. yfir hlutverk og samskiptaleiðir stjórna við Eignaumsjón, sem er í raun skrifstofa húsfélagsins og sér um dagleg samskipti við félagsmenn, þjónustuaðila og banka, í samræmi við þá þjónustuleið sem viðkomandi félag er í. Hann kynnti einnig sérþjónustu eða viðbótarþjónustu sem hús- og rekstrarfélögum standa til boða, s.s. Húsumsjón, Hitavaktin, þjónusta vegna rafhleðslumála og úttektir á öryggismálum og aðgangsstýringum o.fl. Sjá kynningu hér.
Fjármál húsfélaga og öryggi
Framkvæmdastjóri Eignaumsjónar, Daníel Árnason, kynnti hvernig Eignaumsjón heldur utan um fjármál hús- og rekstrarfélaga. Fór hann bæði yfir reynslu, þekkingu og lög sem grundvalla verklag Eignaumsjónar þegar kemur að innheimtu, bókhaldi, uppgjöri, kostnaðarskiptingu, áætlanagerð og kostnaðarsamanburði/aðhaldi. Hann fjallaði einnig um það sem gert hefur verið til að tryggja öryggi, s.s. með aðgangsstýringum, reglubundnu eftirliti og úttektum. Þá væri félagið með jákvæða eiginfjárstöðu og starfsábyrgðartryggingu til að geta mætt skakkaföllum. Þá hefði tæknisvið félagsins verið eflt umtalsvert á liðnum misserum, m.a. til að styrkja tæknilegar öryggislausnir, bæði vegna tölvu- og tæknibúnaðar, afritunar gagna og til að efla varnir gegn ytri árásum. Áréttaði framkvæmdastjórinn að mikið væri lagt upp úr upplýsingagjöf til stjórnarmanna og eigenda/greiðenda í Húsbókinni – mínum síðum, til að efla og veita öryggi og traust. Sjá kynningu hér.
Húsbókin
Forstöðumaður tæknisviðs, Sigurður Gauti Hauksson, fór yfir hvar er að finna leiðbeiningar um hvernig á að skrá sig inn í Húsbókina með rafrænum skilríkjum og veita öðrum umboð ef þess gerist þörf. Hann kynnti einnig þrjá meginflokka Húsbókarinnar:
- Göng sem almennur innskráður notandi hefur aðgang að.
- Skjalasafnið, þar sem húsreglur, fundargerðir/fundargögn, ársreikningar og fleira tengt húsfélaginu er gert aðgengilegt.
- Stjórnaraðgangur, þar sem stjórnarfólk sér nýjustu tilkynningar sem tengjast rekstri húsfélagsins, þjónustubeiðnir, innheimtuyfirlit yfir ógreidda reikninga, fjárhagsyfirlit og hefur aðgang að lista yfir eigendur eigna í viðkomandi húsfélagi.
Fimm ár eru um þessar mundir frá því að Húsbókin var tekin í gagnið. Hún hefur verið í stöðugri þróun frá þeim tíma og kom fram hjá Sigurði að nú stæði m.a. til að gera stjórnum kleift að sjá tölfræði yfir heimsóknir á Húsbók síns húsfélags. Einnig væri unnið að því að gera gjaldareikninga aðgengilega fyrir stjórnir, sem og bankahreyfingar, til að auðvelda stjórn að fylgjast með fjármálum síns húsfélags. Sjá kynningu hér.
Ingibjörg Anna Björnsdóttir, þjónustufulltrúi í þjónustuveri Eignaumsjónar, stýrði fundinum og að loknum framsöguerindum var opnað fyrir fyrirspurnir og ábendingar um hvað betur mætti gera í þjónustunni. Einnig gafst fundargestum tækifæri að loknum fundi til að ræða við starfsfólk Eignaumsjónar um málefni síns félags.
Feb 14, 2025 | Fréttir
Ný og glæsileg fundaraðstaða Eignaumsjónar á Suðurlandsbraut 30 hefur fengið afar jákvæðar viðtökur meðal viðskiptavina, að sögn forstöðumanns þjónustusviðs fyrirtækisins. Sérstök áhersla var lögð á þægindi og aðstöðu fundargesta, sem endurspeglast í rúmgóðu skipulagi, fullkomnum tæknibúnaði og faglegri umgjörð fundarsalanna. Aðgengi er til fyrirmyndar með nægum bílastæðum.
„Viðtökurnar hafa farið fram úr okkar björtustu vonum. Frá áramótum erum við búin að halda hátt á þriðja hundrað af þeim ríflega þúsund hús- og aðalfundum sem eru á döfinni fram á vor og hafa þeir almennt gengið mjög vel,“ segir Gunnþór S. Jónsson, forstöðumaður þjónustusviðs.
Aukin þjónusta til að mæta þörfum húsfélaga
Fundartímabilið frá janúar til maí kallar á gott skipulag, fagleg vinnubrögð og vandaða framkvæmd. Eignaumsjón byggir á yfir 20 ára reynslu, sterku teymi sérfræðinga og þessari nýju fundaraðstöðu sem gerir fyrirtækinu kleift að takast á við verkefnið á farsælan og árangursríkan hátt. Lögð er rík áhersla á að aðalfundir húsfélaga fari fram á skilvirkan og árangursríkan hátt, með aukinni áherslu á undirbúning, framkvæmd og fyrirkomulag funda, sem og vandaðan frágang fundargerða og fylgigagna.
„Sú nýjung að vera almennt ekki með prentuð fundargögn til að draga úr pappírsnotkun er að mælast vel fyrir en hægt er að kynna sér fundargögnin á Húsbókinni fyrir fund og eins eru gögnin kynnt vel á fundunum. Þá eru fundargerðir alla jafnan aðgengilegar á Húsbókinni nokkrum dögum eftir aðalfund og mörg húsfélög eru líka að nýta sér það að halda aðalfundi á laugardögum.
„Laugardagsfundir eru nýjung hjá okkur sem er að skapa eigendum meiri sveigjanleika og auðveldar mörgum að mæta á aðalfund,“ segir Gunnþór og áréttar jafnframt mikilvægi þess að stjórnir yfirfari með góðum fyrirvara þau gögn sem leggja á fram á aðalfundi og gleymi ekki að hengja upp aðalfundarboð í sameign húsfélagsins. Aðeins þannig sé boðun aðalfundar löglega framkvæmd og því má alls ekki gleymast að hengja fundarboð upp í sameign!
-Það er augljóslega mikil áhersla hjá ykkur á að bæta þjónustuna. Hvernig eruð þið að safna ábendingum frá viðskiptavinum?
„Við viljum alltaf bæta okkur og tökum fagnandi á móti öllum ábendingum, hvort sem er í tölvupósti, síma eða á netspjalli. Þá erum við nú að gera þjónustukönnun meðal stjórna húsfélaga eftir aðalfundi til að heyra hvernig þeim líður. Við hlökkum til að sjá niðurstöðurnar og nýta þær til að bæta þjónustu okkar enn frekar.“
Öflug teymisvinna og fagmennska í fyrirrúmi
Öll þjónusta Eignaumsjónar miðar að því að mæta auknum óskum viðskiptavina, létta störf stjórna húsfélaga og veita þeim sem víðtækastan stuðning í sínum störfum. Lykilþáttur í góðri þjónustu eru skilvirk samskipti og góð upplýsingagjöf og þar spilar Húsbókin – mínar síður eigenda sífellt stærra hlutverk.
„Við hvetjum alla okkar viðskiptavini til að skrá sig í Húsbókina, ekki bara til að fá fundarboð send rafrænt heldur líka til að geta fylgst með öllu sem snýr að starfsemi húsfélagsins og hafa á hverjum tíma yfirsýn yfir stöðu sinna mála, segir Gunnþór.“
„Að baki þjónustunni stendur reynt og sérhæft starfsfólk okkar. Fundarstjórar, fjármálaráðgjafar, bókarar, gjaldkerar og öflugt þjónustuver vinna saman að því að tryggja trausta og faglega þjónustu, svo stjórnir húsfélaganna geti einbeitt sér að stefnumótandi ákvörðunum á meðan við sjáum um daglegan rekstur og höldum utan um starfsemina,“ segir forstöðumaður þjónustusviðs Eignaumsjónar og horfir björtum augum til framtíðar.
„Með því að sameina framúrskarandi þjónustu, nýja fundaraðstöðu og aukinn stuðning við húsfélög er Eignaumsjón sterkari en nokkru sinni fyrr til að mæta þörfum viðskiptavina.“
