Mar 26, 2026 | Fréttir
Leit er hafin að nýjum framkvæmdastjóra Eignaumsjónar hf. þar sem Daníel Árnason hefur ákveðið að láta af störfum á árinu. Starfið hefur þegar verið auglýst.
Framkvæmdastjórinn, sem gegnt hefur stöðunni í tæpa tvo áratugi, segir ýmsar ástæður liggja að baki þessari ákvörðun sinni.
„Ég verð 67 ára á þessu ári og tel tíma kominn til að sinna mér sjálfum og mínum nánustu í auknum mæli. Þegar ég var ráðinn til félagsins árið 2007 var þjónusta af þessu tagi lítt þekkt. Viðskiptavinir voru þá á bilinu 40-50 húsfélög og starfsmennirnir fjórir talsins. Síðan er mikið vatn til sjávar runnið, hús- og rekstrarfélög um fasteignir í þjónustu hjá Eignaumsjónar eru orðin um 1.350 talsins og fastir starfsmenn 65,“ segir Daníel.
Aukin áhersla á stafrænar þjónustulausnir og nýsköpun
Mikill vöxtur hefur verið í starfsemi Eignaumsjónar undanfarin ár, fjárhagsleg staða félagsins er traust, samtímis því sem kröfur hafa aukist um nýjar útfærslur á þjónustu og nýsköpun með enn meiri tæknivæðingu og stafrænum lausnum.
„Með hliðsjón af þessu tel ég tímabært að ég stígi til hliðar og við finnum yngri leiðtoga í brúna hjá Eignaumsjón, nýjan framkvæmdastjóra sem fái tækifæri til að leiða farsællega þessa framtíðarvegferð félagsins,“ bætir Daníel við, en tekur jafnframt fram að hann muni sitja áfram í stjórn félagsins og standa þar vörð um það góða starf sem unnið hefur verið og þarf að vinna.
Hlekkur á starfslýsingu og umsókn um starf framkvæmdastjóra Eignaumsjónar
Mar 25, 2026 | Fréttir
Búið er að halda 60% af þeim 1.250 aðalfundum húsfélaga sem eru á dagskrá hjá Eignaumsjón á aðalfundatíðinni 2026, sem hófst í byrjun janúar og lýkur í maílok. Jafnframt er nú búið að halda ríflega helming húsfunda sem áætlað er að halda á aðalfundatímabilinu.
Ef horft er til fjölda fundavikna er fundatíðin hálfnuð, þar sem 10 fundavikur af 20 eru búnar. Staðan er heldur betri ef horft er til fjölda funda því það eru bara eftir um 40% af þeim aðalfundum og húsfundum sem eru á áætlun fram til 28, maí næstkomandi.
Lykillinn er gott skipulag og sveigjanlegir verkferlar
„Fundir hafa almennt gengið vel miðað við umfang verkefnisins í kjölfar fjölgunar nýrra húsfélaga hjá okkur og aukins flækjustigs sem fylgir því að skipuleggja fundarhöld á tveimur starfsstöðvum, á Suðurlandsbraut 30 í Reykjavík og í Bæjarhrauni 6 í Hafnarfirði, ásamt fjölda funda sem haldnir eru ýmist í sameignum húsfélaga eða í sölum í þeirra nærumhverfi,“ segir Þór Gíslason, ráðgjafi í fundarteymi Eignaumsjónar.
„Verkefni sem þetta gæti ekki með nokkru móti gengið upp nema með góðu starfsfólki, sveigjanlegu skipulagi og verkferlum sem eru í stöðugri þróun,“ segir Þór, aðspurður um hvernig hafi gengið að púsla þessu öllu saman. Hann áréttar jafnframt að stöðugt sé verið að nýta tæknina til að einfalda og stytta verkferla og bæta upplýsingamiðlun, bæði til eigenda í þeim hús- og rekstrarfélögum sem eru í þjónustu hjá Eignaumsjón, sem og til allra þeirra sem koma að undirbúningi og stýra fundunum.
„Þar vil ég hrósa sérstaklega öflugum 30 manna hópi fundarstjóra, sem samanstendur af 19 verktökum hjá okkur og 11 starfsmönnum, sem gegna lykilhlutverki í því að fundirnir gangi vel hjá okkur.“
Tímanleg svör og greinargóðar upplýsingar skipta sköpum
Aðkoma stjórna húsfélaga að undirbúningi og skipulagi aðalfunda er einnig mjög mikilvæg,“ segir Þór. „Tímanleg svör og upplýsingar frá stjórnum um tímasetningu og dagskrá aðalfundar skipta sköpum í að tryggja löglega boðun aðalfunda og að dagskrá aðalfundarboðs sé lýsandi, þannig að eigendur átti sig á umfangi og kostnaði við þau verkefni og framkvæmdir sem taka á til umfjöllunar og afgreiðslu á fundum. Þar gildir að því ýtarlegri sem upplýsingarnar eru frá stjórn, því betur náum við að stilla upp dagskrá aðalfundar.“
Að lokum minnir Þór á mikilvægi þess að stjórnir yfirfari bæði ársreikning og tillögur að kostnaðar- og húsgjaldaáætlun frá Eignaumsjón „og komi athugasemdum, spurningum og breytingum á framfæri við okkur tímanlega fyrir fund svo hægt sé að gera leiðréttingar og breytingar á fundargögnum fyrir fund. Það leiðir til mun skilvirkari aðalfunda og hjálpar til við að svara spurningum eigenda á aðalfundum,“ segir ráðgjafinn Þór Gíslason hjá Eignaumsjón að lokum.
Feb 16, 2026 | Fréttir
Það var í mörg horn að líta hjá starfsfólki Eignaumsjónar og fundarstjórum félagsins í nýliðinni viku, sem var stærsta fundavika félagsins á yfirstandandi aðalfundatíð með alls 92 aðalfundum.
Alls hafa nú verið haldnir 377 aðalfundir á vegum Eignaumsjónar á þessu ári, sem lætur nærri að vera þriðjungur þeirra aðalfunda sem ráðgert er að halda fram til maíloka á þessu ári.
Þegar búið boða um 40% allra funda
„Almennt má segja að aðalfundatíðin fari vel af stað hjá okkur,“ segir Inga, Ingibjörg Anna Björnsdóttir, þjónustufulltrúi í fundarteymi Eignaumsjón en bætir við að enn sé langt í að sjái fyrir endann á aðalfundahaldi hjá félaginu. Í þessari viku erum við að halda 78 aðalfundi en við erum þegar búin að boða um 40% þessara 1.250 aðalfunda hús- og rekstrarfélaga sem eru á dagskrá hjá okkur fram á vorið.“
2/3 aðalfunda í vel búnum eigin fundarsölum
Meirihluti aðalfundanna er haldinn í nýlegum fundarsölum Eignaumsjónar í Reykjavík, á 2. hæð í bakhúsinu á Suðurlandsbraut 30. Þar eru fimm vel búnir fundarsalir sem taka frá 12 til 100 manns í sæti og er m.a. hægt að varpa öllum fundargögnum upp á stóra sjónvarpsskjái. Fundir eru að jafnaði kl. 17 og 19 mánudaga til fimmtudaga og kl. 10, 12 og 14 á laugardögum. Einnig er nú í boði að halda aðalfundi í tveimur fundarsölum sem Eignaumsjón leigir á 2. hæð í Bæjarhrauni 6 í Hafnarfirði. Fundað er á sömu dögum og tímum og á Suðurlandsbrautinni.
„Þá má nefna að um þriðjungur aðalfunda hjá okkur á þessari fundatíð eru haldnir í sameignum húsfélaga og/eða sölum í þeirra nærumhverfi, s.s. í skólum, hjá íþróttafélögum og í safnaðarheimilum. Þar getur þó oft á tíðum verið erfiðara að varpa fundargögnum upp á skjá, því segja má að tækniaðstaða þar sé jafn misjöfn og salirnir eru margir,“ segir Inga að lokum
Jan 5, 2026 | Fréttir
Bjarnaborg á Hverfisgötu 83, fyrsta fjölbýlishús landsins sem byggt var árið 1902, er komið í húsfélagsþjónustu hjá Eignaumsjón. Fyrirtækið H83 ehf. keypti húsið af Félagsbústöðum í desember 2024 og tók allt húsið í gegn, bæði innanhúss og utan. 15 íbúðir eru í húsinu og er þriðjungur þeirra þegar seldur og tók húsfélagið Hverfisgata 83 formlega til starfa í byrjun desembermánaðar 2025.
Bjarnaborgin var reist á árunum 1901 og 1902 af Bjarna Jónssyni snikkara , húsasmiði og timburkaupmanni sem er talinn hafa reist að minnsta kosti 140 hús í Reykjavík. Hann var einnig fátækrafulltrúi og á Wikipediu, frjálsa alfræðiritinu, kemur fram að hann hafi viljað reisa húsið sem minnisvarða um sig sjálfan.
Fyrsta fjölbýlishúsið
Bjarnaborg var í útjaðri Reykjavíkur og var fyrsta fjölbýlishús landsins þegar þéttbýli var að myndast í borginni. Þar bjuggu til að mynda 168 manns árið 1917.
Árið 1916 keypti Reykjavíkurborg húsið og fékk fátækranefnd borgarinnar það til umráða og leigði nefndin efnalitlu fólki herbergi eða íbúðir í húsinu fram undir 1930, fólki sem var í húsnæðishraki og fengu margir íbúanna húsaleigustyrk, en á fjórða áratug síðustu aldar fór að draga úr þörfinni fyrir þannig úrræði. Áfram var húsið þó nýtt í félagslegum tilgangi en smám saman breyttist íbúahópurinn og meira fór að bera á óreglufólki í hópi íbúa.
Iðnnemaíbúðir og félagsbústaðir
Árið 1987 keypti byggingarfélagið Dögun húsið af Reykjavíkurborg og var það notað undir íbúðir fyrir iðnnema á árunum 1994-2003. Þá keyptu Félagsbústaðir hf., hlutafélag í eigu Reykjavíkurborgar, húsið sem enn á ný var nýtt sem félagslegt leiguhúsnæði á vegum borgarinnar.
Allt tekið í gegn 2024-2025
Í desember árið 2024 seldu Félagsbústaðir Bjarnaborgina. Kaupandi var fyrirtækið H83 ehf., sem síðastliðið ár vann ötullega að endurnýjun hússins.
„Hér hefur allt verið tekið í gegn, bæði innanhúss og utan, til að mæta kröfum um nútíma þægindi en eftir sem áður lifir samt sjarmi þessa fyrsta fjölbýlishúss landsins, Bjarnaborgarinnar,“ segir Snorri Sigurðarson, formaður húsfélagsins Hverfisgötu 83 og einn af forkólfum samnefnds félags sem sá um allar framkvæmdir.
Gullfallegar íbúðir í miðborg Reykjavíkur
„Útkoman eru 15 gullfallegar endurnýjaðar íbúðir í sögufrægu húsi í miðborg Reykjavíkur, sem henta jafnt fyrstu kaupendum sem og þeim sem vilja búa í námunda við mannlíf og þjónustu,“ segir Snorri og bætir við að þriðjungur þeirra sé þegar seldur. Nánari upplýsingar um íbúðirnar er að finna á fésbókinni Bjarnaborg.
Hverfisgata 83 – húsfélag, samanstendur af 15 eignarhlutum og er í húsfélagsþjónustu hjá Eignaumsjón í þjónustuleið Þ-2; fjármál og fundir.
Dec 12, 2025 | Fréttir, Greinar
Hjá Eignaumsjón er mikið er lagt upp úr réttri boðun aðalfunda til að tryggja að fundir húsféalga verði löglegir, en boða skal til aðalfunda með sannanlegum hætti með minnst átta og mest 20 daga fyrirvarai. Fyrstu aðalfundirnir hefjast 12. janúar nk. en alls verða ríflega 1.200 aðalfundir húsfélaga og rekstrarfélaga á dagskrá fram til maíloka 2026.
Að öllu jöfnu verða aðalfundirnir haldnir frá mánudegi til fimmtudags og á laugardögum í fundarsölum Eignaumsjónar á Suðurlandsbraut 30 í Reykjavík og Bæjarhrauni 6 í Hafnarfirði, en einnig í sameignum húsfélaga og fundarsölum í þeirra nærumhverfi, s.s. í skólum, safnaðarheimilum og hjá íþróttafélögum.
Rafræn boðun funda í Húsbókinni er öruggust
Öruggasta og skilvirkasta boðunarleið aðalfundar er með tölvupósti til eiganda sem skráður er í Húsbókina á heimasíðunni okkar. Við hvetjum því alla eigendur, sem hafa ekki virkjað Húsbókina til að gera það strax. Það er ekki flókið. Viðkomandi skráir sig inn í fyrsta sinn með því að smella á Húsbókarhnappinn efst til hægri á www.eignaumsjon.is, auðkennir sig með rafrænum skilríkjum og skráir inn netfang. Nánari upplýsingar um Húsbókina, innskráningu og notendastillingar er að finna hér.
Aðalfundarboð eru send í bréfapósti á eigendur sem eru með lögheimili utan viðkomandi fasteignar og jafnframt sjá stjórnir um að hengja aðalfundarboð upp í sameign. Það má ekki gleymast – þá telst fundurinn ekki löglega boðaður.
Aðalfundargögn aðgengileg í Húsbókinni
Tímanlega fyrir aðalfund geta íbúðareigendur nálgast aðalfundargögnin í Húsbókinni. Þar verður líka hægt að skoða ársreikning viðkomandi hús- eða rekstrarfélags, kostnaðar- og húsgjaldaáætlun fyrir árið 2026, aðalfundarboðið og önnur gögn sem leggja á fyrir aðalfund. Í Húsbókinni er einnig hægt að skoða húsgjaldaseðla, fundargerðir og fleiri upplýsingar sem tengjast rekstri viðkomandi húsfélags og kynna sér vildarkjör og afslætti, sem bjóðast öllum viðskiptavinum Eignaumsjónar.
Að lokum skal áréttað að fundargögn eru ekki lengur prentuð út fyrir aðalfundi sem eru haldnir í fundarsölum Eignaumsjónar, heldur varpað upp á skjá, en það er liður í viðleitni Eignaumsjónar að sýna samfélagslega ábyrgð með því að draga úr pappírsnotkun.
