Oct 7, 2023 | Fréttir
Á sama hátt og skattaívilnanir vegna kaupa á rafbílum falla niður um áramótin, renna líka út á sama tíma ívilnanir um vsk endurgreiðslur til stjórna húsfélaga og íbúðaeigenda, sem eru að kaupa vinnu við uppsetningu hleðslustöðva fyrir rafbíla í eða við sitt fjölbýlishús eða heimili.
VSK ívilnanir vegna uppsetningar hleðslukerfa og af hleðslustöðvum, sem tóku gildi í ársbyrjun 2020 og gilda til ársloka 2023, eru liður í aðgerðum stjórnvalda að rafvæða bílaflota landsmanna til að flýta fyrir orkuskiptum með því. Samkvæmt þessum ívilnunum eiga bæði húsfélög og íbúðaeigendur sem eru að kaupa vinnu við uppsetningu hleðslustöðva fyrir rafbíla í eða við sitt fjölbýlishús eða heimili, rétt á að fá virðisaukaskatt endurgreiddan að fullu af vinnu við uppsetningu hleðslukerfis sem og af hleðslustöðum fyrir ofangreint tímabil.
Eignaumsjón sér að sjálfsögðu um að sækja um VSK-endurgreiðslur fyrir húsfélög og aðra viðskiptavini félagsins, samkvæmt greiddum reikningum. Tímamörk á endurgreiðslu miðast við sex ár, samkvæmt upplýsingum á heimasíðu Skattsins, talið frá því að endurgreiðsluréttur stofnaðist samkvæmt útgáfudegi reikninga.
Apr 18, 2023 | Fréttir
Eignaumsjón hefur tekið við rekstri rafhleðslukerfa fjögurra húsfélaga sem voru í þjónustu hjá N1. Þetta eru húsfélögin Berjarimi 20-28 í Reykjavík, Langalína 2 í Garðabæ, Kópavogstún 10-12 og Vallarkór 1-3, bæði í Kópavogi.
Uppsetning, rekstur og öll þjónusta tengd rafhleðslukerfum húsfélaganna fjögurra hefur verið hjá N1 en samkvæmt samkomulagi N1 og stjórna ofangreindra félaga hefur Eignaumsjón nú tekið við innheimtu og mælingu á raforkunotkun, ásamt öllum rekstri hleðslukerfanna.
Notkunarupplýsingar alltaf aðgengilegar hjá Eignaumsjón
„Þetta eru ánægjuleg skref í vaxandi þjónustu okkar við húsfélög vegna rafbílahleðslu en með því að færa sig til okkar eru stjórnir viðkomandi húsfélaga ekki síst að tryggja að upplýsingar úr rafhleðslukerfinu um notkun séu alltaf aðgengilegar öllum í húsfélaginu, bæði eigendum og stjórn,“ segir Daníel Árnason, framkvæmdastjóri Eignaumsjónar.
„Hjá okkur eru gögn og yfirlit vegna reksturs hleðslukerfa rafbíla aðgengileg í Húsbókinni, mínum síðum eigenda, á heimasíðunni okkar. Við erum ekki að selja rafmagn en við getum tryggt að viðskiptavinir okkar njóti hagstæðasta raforkuverðs á markaði á hverjum tíma. Við tryggjum líka að allar greiðslur og rukkanir berist til rétta viðtakenda og ef rafbílanotkun er innheimt með húsgjöldum, þegar húsfélagið er í húsfélagsþjónustu hjá okkur, þá lækkar kostnaður við greiðslumiðlun.“
Önnumst rekstur og innheimtu úr flestum rafbílahleðslukerfum
Innifalið í rekstri rafhleðslukerfa hjá Eignaumsjón er bæði umsjón og eftirlit með rafhleðslukerfunum, í samstarfi við þjónustuaðila. Álestur er sjálfvirkur og til viðbótar við innheimtu úr kerfum sem N1 hefur sett upp, getur Eignaumsjón tekið að sér rekstur og innheimtu úr flestum rafbílahleðslukerfum sem starfrækt eru hérlendis, að því gefnu að þau séu að fullu snjallvædd og uppfylli samhæfingarstaðla.
Feb 13, 2023 | Fréttir
Í sumar verða liðin þrjú ár frá því að lögum um fjöleignarhús var breytt til að liðka fyrir rafbílavæðingu. Af því tilefni efndi Eignaumsjón til hádegisfundar um rafbíla og fjöleignarhús á fimmtudaginn í liðinni viku, 9. febrúar 2023. Um sextíu boðsgestir sátu fundinn, hátt í fimmtíu fylgdust með honum í streymi og vel á annað hundrað horfðu á streymið eftir fundinn.
Til fundarins var boðið formönnum og stjórnum húsfélaga sem eru í þjónustu hjá Eignaumsjón en fyrirkomulag hleðslu rafbíla í fjöleignarhúsum, bæði gömlum og nýjum, er meðal verkefna sem stjórnir margra húsfélaga standa frammi fyrir.
Fákeppnismarkaður sem er enn í mótun
Fram kom í erindi Tómasar Kristjánssonar, formanns Rafbílasambands Íslands að breytingarnar á fjöleignarhúsalögunum og auðvelduðu til muna ákvarðanatöku um uppbyggingu hleðslukerfa hefðu ýtt undir fjölgun rafbíla. Markaður í kringum hleðslukerfi rafbíla á Íslandi er enn í mótun sagði Tómas og hann beri yfirbragð fákeppni í dag, m.a. sé verðlag milli aðila oft ósanngjarnt. Þá sagði hann skorta á fræðslu sveitarfélaga og í einhverjum tilfellum aðgerðir, þar sem fjölmörg fjöleignarhús eiga ekki lóðir eða bílastæði svo unnt sé að koma upp hleðslustöðvum.
Tómas kvaðst þó bjartsýnn á að samkeppni muni aukast eftir því sem rafbílum fjölgi og það muni stuðla að bættum hag bæði rafbílaeigenda og húsfélaga.
Mikilvægt að vanda ákvarðanatöku
Páll Þór Ármann, forstöðumaður þjónustusviðs Eignaumsjónar, lagði áherslu á að hleðslukerfi rafbíla í fjöleignarhúsum er hluti af sameiginlegu kerfi hússins – og þar með á ábyrgð húsfélagsins. Hann áréttaði jafnframt að við grunnhönnun nýbygginga væri fylgt eftir kröfum um útfærslu rafhleðslukerfa, þau væru í raun eitt af grunnkerfum húsa, ekki ósvipað öðrum raforku- eða hitakerfum.
Mikilvægt er að húsfélög vandi alla ákvarðanatöku varðandi uppsetningu hleðslukerfis rafbíla. Þjónustuferlið (sjá mynd) sem er í boði hjá Eignaumsjón vegna rafhleðslu í fjöleignarhúsum er í fyrsta lagi hlutlaus úttekt, eins og lög mæla fyrir um. Henni er fylgt eftir með verðsamanburði sambærilegra kerfa og/eða öflun tilboða fyrir húsfélög sem þess óska, ásamt tilboði um tryggan og óþvingaðan rekstur til framtíðar, sem húsfundur viðkomandi félags tekur til afgreiðslu og ákvörðunar.
Pall áréttaði líka mikilvægi þess að ramma inn rekstur og sjálfvirka innheimtu hleðslukerfa frá upphafi og tryggja þannig að endurgreiðsla vegna notkunar rafmagns skili sér til rétta viðtakenda. Benti hann á að þar gæti flækjustig á stundum verið mikið, oftast er húsfélagið með heimtaugina og þá tenginguna við rafhleðslukerfið en stundum einstakir stigagangar. Eins verði að tryggja rétt skil ef búnaðarsali innheimtir notkunina.
Eignaumsjón býður sjálfvirkan álestur og innheimtu úr flestum hleðslukerfum
Á fundinum kom einnig fram að til að aðstoða húsfélög við rekstur og umsjón rafhleðslukerfa býður Eingumsjón nú upp á sjálfvirkan álestur og innheimtu úr flestum hleðslukerfum sem eru í notkun hérlendis, s.s. Faradice, Hleðsluvaktinni, Ískraft(EO), Ísokru, N1 og fleirum. Í húsfélögum sem eru í húsfélagsþjónustu hjá Eignaumsjón er raforkunotkun viðkomandi innheimt með húsgjöldunum, sem sparar greiðslumiðlunarkostnað. Jafnframt sinnir Eignaumsjón, í samstarfi við rafverktaka, umsjón og eftirliti með rekstri hleðslukerfa.
Þá kom fram að rafhleðslukerfi eykur virði fasteigna og bent var á að nú, þegar Eignaumsjón gefur út húsfélagsyfirlýsingar vegna sölu íbúða, er líka upplýst hvert fyrirkomulag rafhleðslu er í viðkomandi húsfélagi.
Höfum gengið til góðs
Leifur Eysteinsson, varamaður í stjórn lóðar- og bíalgeymslufélags Álalindar 14-16 í Kópavogi, lýsti reynslu félagsins við ákvörðun um kaup á rafhleðslukerfi og innleiðingu fyrir nokkrum árum, sem og glímu við verktaka um skil og heimtaugar. Kom fram hjá honum að ef upplýsingarnar sem kynntar voru fyrr á fundinum hefðu legið fyrir þegar hann var að glíma við þessi mál, hefði baráttan verið til muna auðveldari!
Að loknum framsöguerindum svöruðu Daníel Árnason, framkvæmdastjóri Eignaumsjónar, og Bjarni Gnýr Hjarðar, sérfræðingur Eignaumsjónar í rafbílahleðslumálum, fyrirspurnum.
Erindi Tómasar Kristjánssonar, formanns Rafbílasambands Íslands má nálgast hér
Erindi Páls Þórs Ármanns, forstöðumanns þjónustusviðs Eignaumsjónar, má nálgast hér
Erindi Leifs Eysteinssonar, varafulltrúa í stjórn lóðar- og bílageymslufélags Álalindar 14-16, er hér
Upptöku frá fundinum í heild má nálgast hér
Feb 8, 2023 | Fréttir
„Rafbílar og fjöleignarhús – er hleðslukerfi rafbíla enn hausverkur í húsfélaginu“ er yfirskrift hádegisfundar Eignaumsjónar á morgun, fimmtudaginn 9. febrúar 2023. Þar verður rætt um fyrirkomulag hleðslu rafbíla í fjöleignarhúsum, bæði gömlum og nýjum, en í sumar verða liðin þrjú ár frá því að lögum um fjöleignarhús var breytt til að liðka fyrir rafbílavæðingu.
Gestir fundarins verða Tómas Kristjánsson, formaður Rafbílasambands Íslands, og Leifur Eysteinsson, meðstjórnandi í bílageymslufélagi Álalindar 14-16. Tómas ræðir um hagsmuni rafbílaeigenda í fjöleignarhúsum og Leifur segir frá reynslu sinni við að koma upp rafhleðslukerfi á lóð og í bílageymslu síns húsfélags.
Einnig ætla starfsmenn Eignaumsjónar, Páll Þór Ármann og Bjarni G. Hjarðar, að ræða um hagsmuni og ábyrgð húsfélaga við uppsetningu á rafhleðslukerfum og hvernig Eignaumsjón leggur húsfélögum lið við að greiða úr þessum málum. Þar er í mörg horn að líta, s.s. varðandi lagalegar kröfur, tæknimál, rekstur og umsýslu og væntingar eigenda, hvort sem um er að ræða rafhleðslu í nýbyggingum eða eldri fjölbýlishúsum.
Til fundarins er boðið stjórnum og formönnum húsfélaga sem eru í þjónustu hjá Eignaumsjón. Fundurinn hefst kl. 12:10 í fundarsal félagsins að Suðurlandsbraut 30 og lýkur um kl. 13:00.
Fundinum verður einning streymt á heimasíðu Eignaumsjónar: www.eignaumsjon.is/bilastud/
Aug 11, 2022 | Fréttir
Bílastuð er tvískipt þjónustuleið Eignaumsjónar vegna uppsetningar rafhleðslukerfa í fjöleignarhúsum. Þjónustan uppfyllir lagalegar skyldur húsfélaga um úttekt á framtíðarþörf fyrir hleðslukerfi rafbíla og tryggir skiptingu kostnaðar milli húsfélaga og notenda með hagsmuni húsfélaga að leiðarljósi.
Að beiðni stjórna húsfélaga gerir Eignaumsjón í fyrsta lagi úttekt á hleðsluaðstöðu húsfélags sem tryggir hagkvæma framtíðarlausn og uppfyllir kröfur um framkvæmdaáætlun fyrir uppsetningu rafhleðslukerfis. Kerfið verður eitt af grunnkerfum fjöleignarhússins, eins og t.d. heitt og kalt vatn og eykur þannig bæði virði fasteigna í húsinu og sölulíkur. Að beiðni stjórna húsfélaga kannar Eignaumsjón einnig verð hjá seljendum rafhleðslukerfa og gerir verðsamanburð, sér um umsóknir fyrir húsfélög ef rafhleðslukerfi eru styrkhæf, sækir um VSK-endurgreiðslur og skilar stjórn minnisblaði með mati og ráðleggingum sérfræðings.
Gjaldfærsla beint á húsfélagsreikning notanda
Eignaumsjón býður húsfélögum einnig upp á séhæfða innheimtu gjalda vegna hleðslu rafbíla þara sem rétt skipting kostnaðar er tryggð. Þá færist dagleg ábyrgð húsfélags á rafhleðslukerfinu, s.s. aflestur og reikningsgerð, yfir í sjálfvirkt fyrirkomulag og gjaldfærist rafrænt á húsfélagsreikning viðkomandi notanda/rafbílaeiganda. Rétt er að benda á að þetta greiðslufyrirkomulag getur einnig nýst félögum sem eru ekki í húsfélagsþjónustu hjá Eignaumsjón og fara færslur þá í greiðsluþjónustu hjá banka viðkomandi notanda.
Heildarumsjón með rafhleðslukerfi húsfélagsins
Ef rafhleðslukerfi húsfélaga eru að fullu snjallvædd og uppfylla staðla – eru OCPP 1.6J samhæfð – getur Eignaumsjón boðið húsfélögum upp á heildarumsjón með rekstri og viðhaldi hleðslukerfisins. Heildarumsjón felur m.a. í sér að Eignaumsjón uppfærir notendaskrá og notkun, sem er forsenda réttrar innheimtu og birtast öll gögnin í húsbók viðkomandi notanda á heimasíðu Eignaumsjónar; www.eignaumsjon.is. Þjónustuvakt er vegna bilana og þjónustubeiðna, reglulegt mat fer fram á afköstum og gæðum kerfisins og orkuverð er vaktað hjá smásölum og borið saman við opinberar upplýsingar sem birtast á www.aurbjorg.is.
