Sep 7, 2026 | Fréttir
Húsbók Eignaumsjónar hefur verið hluti af þjónustu fyrirtækisins við eigendur og stjórnir húsfélaga frá árinu 2020. Hún hefur nú verið uppfærð með ýmsum nýjum möguleikum, einkum fyrir stjórnir húsfélaga.
„Við kynntum Húsbókina til sögunnar árið 2020 með það að markmiði að gera eigendum og stjórnum húsfélaga auðveldara að nálgast upplýsingar um húsfélagið sitt” segir Gunnþór S. Jónsson, forstöðumann þjónustusviðs Eignaumsjónar, um tilurð Húsbókarinnar.
“Við vildum færa upplýsingarnar nær notendum og skapa einn sameiginlegan aðgangsstað þar sem hægt væri að nálgast gögn og upplýsingar um húsfélagið á einfaldan og öruggan hátt. Síðan þá hefur Húsbókin þróast töluvert og við höfum smám saman bætt við nýjum upplýsingum og möguleikum.“
Áhersla á að bæta frekar upplýsingagjöf til stjórna
„Húsbókin er fyrst og fremst upplýsingavefur fyrir eigendur og stjórnir. Eigendur geta þar nálgast upplýsingar og gögn sem tengjast sínu húsfélagi, en stjórnir hafa jafnframt aðgang að ítarlegri upplýsingum sem tengjast stjórnun og rekstri,” segir Gunnþór. Hann bætir við að áhersla er lögð á að Húsbókin sé ekki bara geymslustaður fyrir gögn heldur gagnlegt verkfæri sem auðveldar fólki að finna þær upplýsingar sem það þarf.
“Í uppfærslunni núna var lögð áhersla á að bæta aðgengi stjórna að upplýsingum um fjármál og önnur gögn húsfélagsins. Helstu nýjungarnar fela í sér skýrari aðgreiningu á fjármálaupplýsingum frá öðrum gögnum húsfélagsins til að gera aðgang stjórna bæði skýrari og einfaldari. Meðal annars hefur flipanum „Stjórnargögn“ verið skipt upp í annars vegar „Stjórn – fjármál“ og hins vegar „Stjórn – gögn“.
Dagleg uppfærsla á stöðu bankareikninga
„Stjórnir geta nú svo til í rauntíma fylgst með stöðu bankareikninga húsfélagsins, sem uppfærast sjálfkrafa daglega. Einnig er hægt að skoða hvern bankareikning fyrir sig og sjá hreyfingar á reikningnum. Stjórnir geta líka skoðað kröfur á húsfélagið, bæði greiddar og ógreiddar, og nálgast reikninga, viðhengi og samþykktir sem tengjast greiddum kröfum,” bætir Gunnþór við og áréttar að þessar nýjungar veiti stjórnum einfaldlega betri yfirsýn yfir fjármál húsfélaga og auðveldi stjórnum að nálgast þær upplýsingar sem þær þurfa.“
Betri aðgangur að eigandalista og húsfélagsyfirlýsingum
„Undir flipanum “Stjórn-gögn” geta stjórnir nú meðal annars nálgast upplýsingar Eignaumsjónar um eigendur í húsfélaginu. Stjórnir geta nú líka sjálfar uppfært eigendalistann í Húsbókinni, ” segir Gunnþór.
“Við höfum líka gert húsfélagsyfirlýsingar aðgengilegri. Eignaumsjón útbýr slíkar yfirlýsingar meðal annars við sölu eigna og nú eru allar útgefnar húsfélagsyfirlýsingar aðgengilegar stjórn á einum stað í Húsbókinni. Þar koma fram upplýsingar um greiðslustöðu hússjóðs, væntanlegar framkvæmdir og fleira.“
Húsbókin – upplýsingar þegar þeirra er þörf
Húsbókin er ekki bara staður þar sem upplýsingar eru geymdar – hún er leið Eignaumsjónar til að gera upplýsingar aðgengilegri og þjónustuna betri. “Tölfræði, sem sýnir notkun Húsbókarinnar í hverju félagi, er því áhugaverð nýjung sem við höfum mikinn áhuga á. Þar er meðal annars hægt að sjá fjölda heimsókna og notenda á tilteknu tímabili og hvaða síður og efnisþættir eru mest skoðaðir,” segir Gunnþór og áréttar að Húsbókin er verkefni sem lýkur í raun aldrei.
“Við teljum að gott aðgengi að upplýsingum sé mikilvægur þáttur í góðri þjónustu við húsfélög. Stjórnir eru að sinna mikilvægu hlutverki og þurfa oft að taka ákvarðanir sem byggja á upplýsingum um fjármál, eigendur, framkvæmdir og rekstur húsfélagsins. Þá skiptir máli að upplýsingarnar séu aðgengilegar þegar þeirra er þörf.
Húsbókin á að einfalda þetta – bæði fyrir stjórnir og eigendur. Með nýju tölfræðinni fáum við líka betri upplýsingar um hvernig Húsbókin er notuð og það mun hjálpa okkur að taka næstu skref,” segir Gunnþór S. Jónsson, forstöðumaður þjónustusviðs Eignaumsjónar að lokum.
Sjá nánar um Húsbók Eignaumsjónar
Sjá nánar um nýjungar í Húsbókinni
Sep 3, 2026 | Fréttir, Greinar
Nýleg niðurstaða Úrskurðarnefndar í vátryggingarmálum undirstrikar mikilvægi þess að upplýsingar um stöðu húsfélaga við sölu eignar séu réttar, tæmandi og unnar af kostgæfni.
Þegar íbúð eða atvinnuhúsnæði í fjöleignarhúsi er sett á sölu skal lögum samkvæmt liggja fyrir yfirlýsing frá húsfélaginu, þar sem veittar eru fullnægjandi og tæmandi upplýsingar um yfirstandandi eða fyrirhugaðar framkvæmdir, viðgerðir eða endurbætur sem samþykktar hafa verið. Þar á einnig að koma fram fjárhagsstaða húsfélagsins og fjárhagsstaða einstakra eignarhluta gagnvart húsfélaginu.
Ábyrgð fylgir útgáfu húsfélagsyfirlýsinga
Yfirlýsing húsfélags kann að virðast einfalt skjal en nýlegur úrskurður sýnir að upplýsingar sem þar koma fram hafa verulega þýðingu fyrir kaupanda og að ábyrgð fylgir því að þeirra sé aflað og að þær séu réttar.
Í úrskurði sínum komst úrskurðarnefndin að þeirri niðurstöðu að fasteignasali hefði ekki uppfyllt skyldu sína um upplýsingaöflun, um yfirstandandi eða fyrirhugaðar framkvæmdir, í tengslum við sölu íbúðar í umræddu fjöleignarhúsi. Húsfélagsyfirlýsing, sem lögð var fram við söluna, var einungis undirrituð af seljanda og taldi nefndin að hún uppfyllti ekki þær kröfur sem lög gera til slíkra yfirlýsinga.
Niðurstaða úrskurðarnefndarinnar var sú að fasteignasalinn hefði af gáleysi veitt rangar eða ófullnægjandi upplýsingar í bæði söluyfirliti og húsfélagsyfirlýsingu og bæri ábyrgð á því gagnvart kaupanda. Eigandinn ætti því rétt á bótum úr starfsábyrgðartryggingu fasteignasalans.
Húsfélagsyfirlýsing er ekki formsatriði
Þessi úrskurður er áminning um að húsfélagsyfirlýsing er ekki bara formsatriði. Hún er mikilvægur hluti þeirra upplýsinga sem kaupandi byggir ákvörðun sína á. Í þessu tiltekna máli lá meðal annars fyrir að framkvæmdir hefðu átt sér stað á eigninni eftir að söluyfirlit var gert. Úrskurðarnefndin taldi að fasteignasalanum hefði borið að uppfæra söluyfirlitið. Jafnframt var talið að húsfélagsyfirlýsingin hefði ekki uppfyllt þær kröfur sem gerðar eru til hennar.
Þetta undirstrikar mikilvægi þess að upplýsingar séu ekki aðeins settar á blað heldur að þeirra sé aflað með markvissum hætti, þær sannreyndar og gengið úr skugga um að þær gefi sem réttasta mynd af stöðu húsfélagsins.
Vönduð húsfélagsyfirlýsing krefst vinnu
Hjá Eignaumsjón lítum við á gerð húsfélagsyfirlýsinga sem ábyrgðarverkefni. Til þess að hægt sé að gefa út trausta yfirlýsingu þarf meðal annars að afla upplýsinga úr gögnum húsfélagsins, skoða stöðu framkvæmda og samþykktra verkefna, fara yfir fjárhagslega stöðu og tryggja að upplýsingarnar sem fram koma séu eins réttar og kostur er þegar yfirlýsingin er gefin út.
Þetta er því ekki einfalt afgreiðsluverkefni þar sem nægir að fylla út eyðublað. Vanda þarf til verka og gæta þess að upplýsingarnar sem veittar eru séu traustar og gagnlegar fyrir þá sem þurfa að reiða sig á þær. Það er einmitt sú vinna sem liggur að baki þjónustu Eignaumsjónar þegar húsfélagsyfirlýsingar eru unnar og afgreiddar.
Réttar upplýsingar skipta máli
Niðurstaða Úrskurðarnefndar í vátryggingarmálum í umræddu máli sýnir að útgáfa yfirlýsinga húsfélaga er ekki bara spurning um góða þjónustu heldur snýst hún einnig um ábyrgð og mögulega fjárhagslega hagsmuni.
Fyrir húsfélagið og eigendur þess er mikilvægt að vandað sé til verka þegar slíkar upplýsingar eru veittar og fyrir kaupanda geta þessar upplýsingar haft áhrif á ákvörðun um kaup, kaupverð og fjárhagslegar skuldbindingar sem fylgja eigninni.
Sjá hér úrskurð Úrskurðarnefndar í vátryggingarmálum – mál nr. 152/2026 og frétt DV um úrskurðinn.
Aug 21, 2026 | Fréttir, Greinar
Haustið er góður tími fyrir stjórnir húsfélaga að byrja að huga að viðhaldsverkefnum næsta sumars. Undirbúningur tekur gjarnan 5–8 mánuði og því er mikilvægt að hefjist handa tímanlega.
Með góðum undirbúningi geta húsfélög forgangsraðað verkefnum, fengið skýrari mynd af kostnaði og eigendur hafa betri tíma til að undirbúa sig fjárhagslega vegna fyrirhugaðra viðhaldsframkvæmda.
Hvar stendur þitt húsfélag?
- Er til viðhaldsáætlun fyrir húsið?
- Liggur fyrir hvaða verkefni þarf að ráðast í á næstu 1–3 árum?
- Hefur verið lagt mat á líklegan kostnað?
- Er nægilegum fjármunum safnað í framkvæmdasjóð?
- Hefur verið gert ráð fyrir tíma til undirbúnings, húsfunda og tilboðsöflunar?
Ef svarið við einhverjum þessara spurninga er „nei“ gæti verið kominn tími til að hefja undirbúning.
Hvað þarf að gera?
Fyrsta skrefið er að fá yfirsýn yfir ástand hússins og viðhaldsþörf næstu ára. Ákveða þarf hvaða verkefni eru brýn, til fyrirbyggja að stærri og kostnaðarsamari vandamál komi upp síðar, sem og hvað verkefni mega bíða. Hér getur verið um að ræða verkefni á borð við:
- Viðhald eða endurnýjun á ytra byrði hússins
- Þak og þakfrágang
- Gluggar og hurðir
- Svalir
- Lagnir, dren og fráveita
- Múrviðgerðir og málun
- Lagfæringar á sameiginlegu rými og lóð
- Önnur verkefni sem komið hafa í ljós við skoðun á húseigninni
Þegar búið er að kortleggja verkefnin þarf að forgangsraða þeim, áætla kostnað og ákveða hvernig haga skuli fjármögnun.
Mikilvægt að standa rétt að ákvarðanatöku
Stærri framkvæmdir krefjast góðs samráðs eigenda í húsfélaginu og löglega boðaðra funda. Yfirleitt þarf að taka ákvarðanir í nokkrum skrefum, þar sem samráð eigenda á löglega boðuðum húsfundum er lykillinn að farsælli niðurstöðu og tryggir að rétt er staðið að ákvarðanatöku.
Samþykki húsfundar þarf fyrir að taka tilboði í úttekt á ástandi hússins og kostnaðarmat, en stjórn má sækja tilboð og leggja fyrir fund.
Niðurstöður um forgangsverkefni þarf að kynna eigendum á húsfundi og taka ákvörðun um forgang viðhaldsverkefna og veita stjórn heimild til að afla tilboða í verkið.
Tilboð sem berast frá verktökum þarf að kynna á húsfundi, með sundurliðun á aðgerðum og kostnaði. Einnig þarf að taka ákvörðun, annað hvort á sama húsfundi eða sérstökum fundi, um hvaða tilboði skuli taka.
Í framhaldi af samþykkt húsfundar gerir stjórn samninga við verktaka og eftirlitsaðila og þá geta framkvæmdir hafist, samkvæmt samþykktri forgangsröðun.
Betri yfirsýn yfir rekstur og kostnað
Með skipulegu verklagi fæst betri yfirsýn yfir kostnað, minni líkur eru á óvæntum útgjöldum og greiðsludreifing í framkvæmdasjóð verður jafnari fyrir eigendur.
Við hjá Eignaumsjón aðstoðum húsfélög í þessu ferli. Hægt er að senda erindi á þjónustuverið okkar; í netspalli á www.eignaumsjon.is, í tölvupósti á netfangið thjonusta@eignaumsjon.is, eða hringa í síma 585-4800 og óska eftir nánari ráðgjöf hjá sérfræðingum okkar um hvernig best er að byrja að huga að viðhaldsframkvæmdum næsta sumars!
Jul 22, 2026 | Fréttir
Hjá Eignaumsjón á Suðurlandsbraut 30 í Reykjavík eru til leigu fimm funda- og ráðstefnusalir, sem henta jöfnum höndum fyrir fundi og ráðstefnur, fyrirlestra og námskeið, kennslu og fleira. Stærsti salurinn tekur allt að 120 gesti í sæti, sá næst stærsti er fyrir allt að 50 gesti, tveir salir taka hvor um sig 25 gesti í sæti og í fimmta salnum geta 12-14 gestir setið við fundarborð.
Fundarsalirnir eru á 2. hæð í bakhúsinu á Suðurlandsbraut 30. Inngangur í salina er á suðurhlið bakhússins frá efra bílastæðinu, þar sem eru jafnan næg stæði fyrir gesti. Gott aðgengi og þægileg aðkoma er fyrir gangandi, hjólandi og akandi fundargesti að Suðurlandsbraut 30. Strætóstoppistöðvar eru einnig framan við húsið, beggja vegna Suðurlandsbrautarinnar.
Til leigu alla daga vikunnar
Salirnir eru leigðir út alla daga vikunnar, bæði að degi til og kvöldi. Leigutími er að jafnaði 2 klst. Fast tímagjald er innheimt fyrir hverja byrjaða klukkustund umfram leigutíma.
- Innifalið í leigu er; fundarsalur, stólar, borð fyrir fundarstjóra og fráleggsborð, afnot af upplýsingaskjá og borðtölvu.
- Þráðlaust net, upplýsingaskjáir og tölvu- og fjarfundarbúnaður er í öllum sölunum. Í stóru sölunum eru 98 tommu upplýsingaskjáir (led) sem geta tengst fartölvu og Yealink fundarsalalausn. Ef óskað er eftir að nota fjarfundarbúnað þarf að taka það fram þegar gengið er frá salarleigu og fær leigutaki þá leiðbeiningar um virkjun búnaðar. Greitt er sérstaklega fyrir afnot af fjarfundarbúnaði.
- Gott aðgengi er að salernisaðstöðu á hæðinni og hjólastólaaðgengi.
- Hægt er að fá kaffiuppáhelling milli kl. 8-17 á virkum dögum. Sjálfsali með drykkjum og fleiru er til staðar.
- Við skil er miðað við að frágangur í fundarsölum sé með sama hætti og tekið var við þeim og umgengi þrifaleg.
Nánari upplýsingar eru veittar hjá Eignaumsjón á skrifstofutíma, í síma 585-4800 eða í netspjalli. Einnig er hægt að senda tölvupóst á netfangið thjonusta@eignaumsjon.is.
Sjá frekari upplýsingar og myndir á salir.is
Jul 21, 2026 | Fréttir
Skýrari ábyrgð, einfaldari ákvarðanataka og betri undirbúningur viðhalds eru meðal ástæðna fyrir því eigendur í eldri fjölbýlishúsum kjósa að sameina stigahúsfélög í deildaskipt heildarhúsfélag.
Á síðustu árum hefur orðið vart við þróun þar sem eigendur í eldri fjölbýlishúsum sameina rekstur og stjórnun í áður sjálfstæðum stigahúsfélögum í eitt deildaskipt húsfélag, samkvæmt 76. gr. fjöleignarhúsalaga. Markmiðið er að einfalda stjórnun, styrkja rekstur húsfélagsins og auðvelda ákvarðanatöku um viðhald þeirra hluta hússins sem allir eigendur bera sameiginlega ábyrgð á.
Viðhald krefst sameiginlegra ákvarðana
„Við sjáum sífellt fleiri húsfélög átta sig á því að það er bæði hagkvæmara og skilvirkara að reka húsið sem eina heild þegar um er að ræða sameiginlega byggingu með sameiginlegu þaki, burðarvirki og lagnakerfum,“ segir Hallur Guðjónsson, sölumaður og ráðgjafi hjá Eignaumsjón.
Viðhaldsþörf eldri fjölbýlishúsa hefur aukist verulega á síðustu árum. Mörg hús standa frammi fyrir kostnaðarsömum framkvæmdum á borð við endurnýjun þaka, múrviðgerðir, gluggaskipti, frárennslislagnir og endurbætur á ytra byrði.
Þegar stigagangar starfa sem sjálfstæð húsfélög getur það flækt ákvörðunarferlið, þar sem fleiri húsfélög þurfa að samþykkja sömu framkvæmdina.
„Við höfum séð dæmi um að nauðsynlegar framkvæmdir dragist allt of lengi vegna þess að stigagangar ná ekki saman um framkvæmdir eða tímasetningar þeirra. Með sameinuðu deildaskiptu húsfélagi verður stjórnsýslan einfaldari og ábyrgðin skýrari,“ segir Hallur.
Deildaskipt húsfélag skapar sveigjanleika
Í 76. gr. fjöleignarhúsalaga er kveðið á um heimild til að stofna deildaskipt húsfélag. Slíkt fyrirkomulag gerir eigendum kleift að reka húsið sem eina heild um sameiginlega hagsmuni, en halda jafnframt utan um sérmálefni einstakra stigaganga eða húshluta þegar það á við. Hallur segir að margir eigendur hafi áður talið að sameining þýddi að allir kostnaðarliðir yrðu sameiginlegir.
„Það er algengur misskilningur. Deildaskipt húsfélag gerir einmitt ráð fyrir því að kostnaði sé áfram skipt eftir því sem lög, eignaskiptayfirlýsing og eðli framkvæmdarinnar segja til um. Það sem breytist er fyrst og fremst stjórnskipulagið og samhæfingin.“
Hagkvæmari rekstur til framtíðar
Að sögn Halls getur sameining einnig skilað lægri rekstrarkostnaði. Eitt húsfélag annast bókhald, fundarhöld, samninga, tryggingar og samskipti við verktaka í stað þess að stigagangafélögin sinni sömu verkefnum hvert fyrir sig.
„Þegar eigendur hússins tala einum rómi verður auðveldara að bjóða út framkvæmdir, semja við verktaka, skipuleggja langtímaviðhald og sameinast í öflun ýmiskonar þjónustu, s.s. þrifum. snjómokstri o.fl. Það á að skila sér í hagkvæmari rekstri og meiri fyrirsjáanleika fyrir eigendur.“
Aukinn áhugi meðal eigenda eldri fjölbýlishúsa
Hallur telur að þessi þróunin muni halda áfram á næstu árum, ekki síst vegna þess að stór hluti íslenskra fjölbýlishúsa sé kominn á þann aldur að umfangsmikið viðhald sé óhjákvæmilegt.
„Við verðum vör við aukinn áhuga hjá húsfélögum sem vilja skoða þetta, sértaklega áður en farið er í stórar framkvæmdir. Eigendur vilja hafa skýrt skipulag, góða yfirsýn og tryggja rétta kostnaðarskiptingu. Þar getur sameinað deildaskipt heildarhúsfélag verið lykilþáttur,“ segir Hallur, en leggur áherslu á að meta aðstæður sérstaklega í hverju tilfelli og fá faglega ráðgjöf áður en ráðist er í að breyta skipulagi húsfélagsins.
