Mar 26, 2026 | Fréttir
Leit er hafin að nýjum framkvæmdastjóra Eignaumsjónar hf. þar sem Daníel Árnason hefur ákveðið að láta af störfum á árinu. Starfið hefur þegar verið auglýst.
Framkvæmdastjórinn, sem gegnt hefur stöðunni í tæpa tvo áratugi, segir ýmsar ástæður liggja að baki þessari ákvörðun sinni.
„Ég verð 67 ára á þessu ári og tel tíma kominn til að sinna mér sjálfum og mínum nánustu í auknum mæli. Þegar ég var ráðinn til félagsins árið 2007 var þjónusta af þessu tagi lítt þekkt. Viðskiptavinir voru þá á bilinu 40-50 húsfélög og starfsmennirnir fjórir talsins. Síðan er mikið vatn til sjávar runnið, hús- og rekstrarfélög um fasteignir í þjónustu hjá Eignaumsjónar eru orðin um 1.350 talsins og fastir starfsmenn 65,“ segir Daníel.
Aukin áhersla á stafrænar þjónustulausnir og nýsköpun
Mikill vöxtur hefur verið í starfsemi Eignaumsjónar undanfarin ár, fjárhagsleg staða félagsins er traust, samtímis því sem kröfur hafa aukist um nýjar útfærslur á þjónustu og nýsköpun með enn meiri tæknivæðingu og stafrænum lausnum.
„Með hliðsjón af þessu tel ég tímabært að ég stígi til hliðar og við finnum yngri leiðtoga í brúna hjá Eignaumsjón, nýjan framkvæmdastjóra sem fái tækifæri til að leiða farsællega þessa framtíðarvegferð félagsins,“ bætir Daníel við, en tekur jafnframt fram að hann muni sitja áfram í stjórn félagsins og standa þar vörð um það góða starf sem unnið hefur verið og þarf að vinna.
Hlekkur á starfslýsingu og umsókn um starf framkvæmdastjóra Eignaumsjónar
Mar 24, 2026 | Fréttir
Við kynnum nýtt starfsfólk sem er nýlega komið til starfa hjá Eignaumsjón til að mæta sívaxandi umsvifum í starfsemi fyrirtækisins. Þetta eru þau Gyða Björg Jóhannsdóttir og Ormur Karlsson á þjónustusviði og Esther Ýr Kjartansdóttir, Sara Rós Waltersdóttir og Sveinn Ingi Einarsson á fjármálasviði.
Sveinn Ingi Einarsson starfar í fjármálateymi fjármálasviðs Eignaumsjónar. Sveinn er með BS gráðu í viðskiptafræði frá Háskólanum á Akureyri og meistaragráðu í fjármálum frá Háskóla Íslands. Sveinn starfaði hjá Origo, áður en hann kom til starfa hjá Eignaumsjón. Þar áður starfaði hann hjá Ls Retail og sem viðskiptastjóri hjá Símanum.
Sara Rós Waltersdóttir starfar í innheimtuteymi fjármálasviðs Eignaumsjónar. Hún er með BS gráðu í viðskiptafræði frá Háskólanum í Stokkhólmi og hefur m.a. unnið sem fjármála- og skuldaráðgjafi í Stokkhólmi, innheimtufulltrúi hjá Skattinum í Svíþjóð, fulltrúi fógeta í Stokkhólmi og viðskiptastjóri hjá Intrum í Stokkhólmi.
Esther Ýr Kjartansdóttir starfar í gjaldkerateymi fjármálasviðs Eignaumsjónar. Hún hefur lagt stund á íþrótta- og heilsufræði við Háskóla Íslands og er með stúdentspróf frá Fjölbrautaskólanum í Breiðholti. Esther starfaði hjá fyrirtækinu SalesCloud/Noona Iceland, áður en hún kom til starfa hjá Eignaumsjón. Þar áður starfaði hún sem þjónustufulltrúi/markaðsfulltrúi hjá Alvotech/Alvogen.
Ormur Karlsson er fulltrúi á þjónustusviði Eignaumsjónar. Ormur starfaði hjá Icelandair, m.a. við þjónustutengd störf og þjónustueftirlit, áður en hann kom til Eignaumsjónar. Þar á undan vann hann m.a. hjá Símanum sem sérfræðingur í fræðslu til viðskiptavina og viðskiptavernd. Ormur er með próf í markaðs- og sölumálum frá Viðskipta- og tölvuskólanum og stundaði nám á hagfræðibraut Fjölbrautaskólans í Breiðholti.
Gyða Björg Jóhannsdóttir er fulltrúi á þjónustusviði Eignaumsjónar. Hún starfaði í 21 ár hjá Símanum, áður en hún kom til Eignaumsjónar, bæði sem þjónustufulltrúi í þjónustuveri og í reikningaþjónustu og síðar sem ráðgjafi og skráningarfulltrúi á fyrirtækjasviði. Gyða er með stúdentspróf frá Kvennaskólanum í Reykjavík og hefur einnig lokið margskonar starfstengdum námskeiðum.
Um Eignaumsjón
Eignaumsjón býr að 25 ára þekkingu og reynslu í þjónustu við húsfélög og rekstrarfélög atvinnuhúsnæðis og er umsvifamesta fyrirtæki landsins á þessu sviði. Áhersla er lögð á hlutlausa nálgun, öryggi, gæðamál og skýra verkferla til að gera rekstur fasteigna markvissari og ódýrari, auka upplýsingaflæði til eigenda og auðvelda störf stjórna.
Nov 12, 2025 | Fréttir
„Þetta er sannarlega ánægjuleg viðurkenning fyrir okkur og staðfestir almennt mjög jákvætt viðhorf starfsfólksins til fyrirtækisins,“ segir Daníel Árnason, framkvæmdastjóri Eignaumsjónar, sem fjórða árið í röð er í hópi leiðandi íslenskra fyrirtækja sem uppfylla ströng skilyrði HR Monitor til að vera útnefnd Mannauðshugsandi fyrirtæki.
Til að vera útnefnt Mannauðshugsandi fyrirtæki hjá HR Monitor þurfa viðkomandi fyrirtæki að hafa keyrt mannauðsmælingar meðal allra starfsmanna í hverjum ársfjórðungi, eða frá fjórum til tólf sinnum á líðandi ári, og hafa upplýst starfsfólk reglulega um niðurstöður þessara mælinga og árangur fyrirtækisins.
Með þessu verklagi er sýnt í verki að mannauður skiptir fyrirtækið miklu máli og jafnframt öðlast stjórnendur innsýn í viðhorf starfsfólks til fyrirtækisins í heild og yfirsýn yfir árangur sinna sviða, deilda og vinnuteyma.
Hjálpar okkur að vera með puttann á púlsinum
„Við hjá Eignaumsjón höfum nýtt okkur reglulegar mannauðsmælingar HR Monitor frá ársbyrjun 2022. Þær virka vel sem loftvog á vinnustaðinn og eru gott verkfæri til að fá endurgjöf frá starfsfólkinu. Starfsánægja er mikil og starfsandinn er mjög jákvæður hjá okkur og þessar kannanirnar hjálpa okkur að vera með puttann á púlsinum, til að gera gott fyrirtæki betra,“ segir framkvæmdastjóri Eignaumsjónar.
Mar 19, 2025 | Fréttir
Þrír nýir starfsmenn komu nýlega til liðs við Eignaumsjón til að mæta sívaxandi umsvifum í starfsemi fyrirtækisins. Þetta eru þjónustufulltrúarnir Svandís Unnur Þórsdóttir og Róbert Elvar Kristjánsson og Jónas Heiðar, sem sinnir Húsumsjón.
Jónas vann við smíðar og múrverk hjá eigin fyrirtæki í 20 ár, aðallega fyrir tryggingarfélög og leigufélög, áður en hann kom til starfa hjá Eignaumsjón. Hann er með framhaldsskólapróf frá Fjölbrautarskólanum í Breiðholti.
Róbert Elvar starfaði vel á annan áratug sem sérfræðingur á sölusviði Símans áður en hann hóf störf hjá Eignaumsjón. Hann er með stúdentspróf af viðskipta- og verslunarbraut Fjölbrautarskóla Suðurlands og hefur lagt stund á nám í viðskiptafræði við HA og HÍ.
Svandís Unnur er með stúdentspróf af viðskipta- og hagfræðibraut menntaskólans við Sund. Hún starfaði sem þjónustufulltrúi í einstaklingsþjónustu hjá sölu- og síðar sem ráðgjafi á fyrirtækjasviði þjónustusviðs Sýnar hf., áður en hún byrjaði að vinna hjá Eignaumsjón.
Um Eignaumsjón
Eignaumsjón býr að 25 ára þekkingu og reynslu í þjónustu við húsfélög og rekstrarfélög atvinnuhúsnæðis. Félagið þjónar í dag á annað þúsund hús- og rekstrarfélögum með um 26.500 íbúðum/eignum. Áhersla er lögð á hlutlausa nálgun, öryggi, gæðamál og skýra verkferla til að gera rekstur fasteigna markvissari og ódýrari, auka upplýsingaflæði til eigenda og auðvelda störf stjórna.
Nov 25, 2024 | Fréttir
Þriðja árið í röð er Eignaumsjón í hópi leiðandi íslenskra fyrirtækja sem hafa uppfyllt ströng skilyrði HR Monitor til að vera útnefnd Mannauðshugsandi fyrirtæki.
„Þetta er ánægjuleg viðurkenning fyrir okkar 50 manna fyrirtæki og hvatning til að halda áfarm og gera enn betur,“ segir Daníel Árnason, framkvæmdastjóri Eignaumsjónar, um viðurkenningu HM Monitor.
Mánaðarlegar mælingar
Til að vera meðal leiðandi íslenskra fyrirtækja sem uppfylla ströng skilyrði HR Monitor til að vera útnefnd Mannauðshugsandi fyrirtæki þarf að hafa á 12 mánaða tímabili keyrt mannauðsmælingar meðal allra starfsmanna fyrirtækisins í hverjum ársfjórðungi eða frá fjórum til tólf sinnum á líðandi ári.
Með þessu verklagi er sýnt í verki að mannauður skiptir fyrirtækið miklu máli og jafnframt hafa stjórnendur Eignaumsjónar öðlast innsýn í viðhorf starfsfólks til fyrirtækisins, bæði í heildina og innan sviða, deilda og vinnuteyma.
Liður í að gera gott fyrirtæki betra
„Þetta er gott verkfæri til að fá endurgjöf frá starfsfólki og niðurstöðurnar nýtast til að bæta starfsumhverfið og koma betur til móts við fólkið okkar og þessar kannanir eru liður í að gera gott fyrirtæki betra,“ segir framkvæmdastjóri Eignaumsjónar.
