Sep 15, 2021 | Fréttir
Tæpum þremur árum eftir að þjónustuver Eignaumsjónar var sett á laggirnar standa þar nú átta starfsmenn vaktina við að svara og sinna erindum frá stjórnum hús- og rekstrarfélaga sem eru í þjónustu hjá Eignaumsjón. Þjónustuverið annast líka öll samskipti við þjónustu- og fagaðila og svarar öllum almennum erindum sem berast, hvort sem það er í tölvupósti, netspjalli, símtölum og heimsóknum á skrifstofu félagsins á Suðurlandsbraut 30.
„Þjónustuverið hefur heldur betur sannað sig frá því að það var sett á laggirnar og eru öll samskipi við viðskiptavini okkar mun markvissari eftir að það tók til starfa,“ segir Páll Þór Ármann, forstöðumaður þjónustusviðs Eignaumsjónar.
Fljótari og skilvirkari svörun og betri miðlun upplýsinga
„Viðskiptavinum hefur fjölgað jafnt og þétt og nú eru yfir 700 hús- og rekstrarfélög með um 15.500 íbúðir/eignir í þjónustu hjá okkur. Eðlilega er rík krafa um svör og aðgerðir án verulegra tafa. Þær væntingar reynum við sannarlega að uppfylla en ég held að það hefði verið okkur þungt í skauti að sinna öllum okkar viðskiptavinum ef við hefðum ekki lagt umtalsverðan tíma og fjármuni í að tölvuvæða og þróa sem mest af okkar starfsemi, þar á meðal allt fyrirkomulag svörunar og samskipta,“ bætir Páll við.
„Tilkoma þjónustuversins hefur bæði skilað fljótari og skilvirkari svörun erinda og markvissari og betri miðlun upplýsinga til viðskiptavina og þjónustuaðila. Um leið og þjónustuverið tók til starfa var líka tekið í notkun sérhannað verkbókhald og öflugt upplýsingakerfi sem tryggir að allar verkbeiðnir og erindi sem berast til okkur eru bókfærð og þeim svarað innan ásættanlegs tíma.“
Nýr liðsmaður í þjónustuverinu
Nýlega bættist áttundi starfsmaðurinn í hópinn í þjónustuverinu þegar Þórhallur Sveinsson kom til liðs við Eignaumsjón. Þórhallur starfaði áður hjá Eignarekstri í tvö ár og þar áður var hann lagerstjóri í 21 ár hjá Opnum kerfum.
„Við fögnum komu Þórhalls til okkar og erum sannfærð um að hann muni efla starfsemi þjónustuversins enn frekar,“ segir Páll.
Auk almennrar ráðgjafar til eigenda fasteigna og hússtjórna mun Þórhallur sinna þjónustu við húsfélög vegna framkvæmda af ýmsum toga, s.s. að útvega þjónustuaðila, verktaka og tilboð.
Um Eignaumsjón
Eignaumsjón sérhæfir sig í þjónustu við húsfélög og rekstrarfélög atvinnuhúsnæðis með það að markmiði að gera rekstur fasteigna bæði markvissari og hagkvæmari, auka upplýsingaflæði til eigenda og hússtjórna og auðvelda störf þeirra.
Jul 27, 2021 | Fréttir, Greinar
Nýlegur hæstaréttardómur um að seljendur í fjölbýlihúsi hafi vanrækt upplýsingaskyldu sína um samskiptavanda íbúa í húsinu þannig að galli teljist á fasteign í skilningi laga er áminning til allra sem sýsla með húsfélagayfirlýsingar vegna fasteignaviðskipta um að vanda til verka.
Í 25. grein laga um fjöleignarhús er sú skylda lögð á seljanda fasteignar að kynna fyrir kaupanda eignaskiptayfirlýsingu, eignaskiptasamning, sérstakar samþykktir húsfélagsins ef um þær er að ræða, reikninga húsfélagsins og stöðu og framlög eignarhlutans gagnvart því og hússjóði þess. Þá skal seljandi enn fremur gefa fullnægjandi og tæmandi upplýsingar um yfirstandandi eða fyrirhugaðar framkvæmdir, viðgerðir eða endurbætur.
Yfirlýsing húsfélags hluti af sölugögnum fasteignar
Í fjöleignarhúsalögunum segir enn fremur að seljandi skuli jafnan, ef því verður við komið, afla og leggja fram vottorð eða yfirlýsingu frá húsfélaginu og í lögum um sölu fasteigna nr. 70/2015, 11. grein, er beinlínis kveðið á um að í söluyfirliti fasteigna skuli upplýst um húsgjöld og yfirstandandi eða væntanlegar framkvæmdir sem búið er að ákveða á fundi húsfélags, sé um fjöleignarhús að ræða, og um stöðu eiganda gagnvart hússjóði og framkvæmdasjóði húsfélags. Eignaskiptayfirlýsing eða samningur, sé um fjöleignarhús að ræða, skuli einnig vera hluti sölugagna sem og önnur atriði sem kunnugt er um, svo sem skýrslur um ástand eignar sem gerðar hafa verið. Þá skal árétta skyldu kaupanda að skoða fyrirhugaða fasteign gaumgæfilega, sem og skyldu seljanda að upplýsa kaupanda um galla á eigninni.
Eignaumsjón annast útgáfu yfirlýsinga fyrir húsfélög sem eru í þjónustu hjá félaginu, samkvæmt beiðni seljanda, eða fasteignasala seljanda. Ávallt er kappkostað að vanda útfyllingu slíkra yfirlýsinga því fasteignaviðskipti snúast um háar fjárhæðir og rangar eða ófullnægjandi upplýsingar geta leitt af sér ágreining og jafnvel málaferli.
Jul 9, 2021 | Fréttir, Greinar
Húsbók Eignaumsjónar, sem leysti af hólmi mínar síður viðskiptavina félagsins í nóvember í fyrra, hefur almennt mælst mjög vel fyrir. Í húsbókinni geta eigendur og stjórnir húsfélaga á einfaldan hátt nálgast upplýsingar um málefni síns húsfélags og fylgst rafrænt með greiðslustöðu og fleiru hjá húsfélaginu þegar hentar.
Innskráning í Húsbókina er aðgangsstýrð í gegnum www.island.is með rafrænum skilríkjum í snjallsíma eða íslykli, til að tryggja að einungis þeir sem eiga rétt á að skoða umrædd gögn hafi aðgang að þeim. Allt kapp var lagt á að hafa notendaviðmót húsbókarinnar sem fljótvirkast og þægilegast og stöðugt er verið að huga að úrbótum til að mæta sem best þörfum viðskiptavina Eignaumsjónar.
Nýjungar í Húsbókinni
Notendur, sem ávallt eru skráðir inn í Húsbókina með kennitölu greiðanda og/eða eiganda, geta nú skráð allt að þrjú mismunandi netföng í húsbókinni. Þetta getur t.d. verið hentugt fyrir bæði fyrirtæki og fjölskyldur með eignir í fleiri en einu húsfélagi í þjónustu hjá Eignaumsjón. Notendur sem vilja nýta sér þessa nýjung í Húsbókinni ganga frá netfangabreytingum með því að smella á „Notendastillingar“, uppi hægra megin í Húsbókinni.
Önnur nýjung í Húsbókinni tengist boðun funda. Í aðdraganda hús- og aðalfunda eru t.d. öll fundargögn aðgengileg í húsbókinni, til upplýsingar og skoðunar fyrir eigendur. Undir flipanum „Næsti fundur“ birtast nú bæði fundarboð hús- og aðalfunda, sem og öll gögn sem búið er að skrá í Húsbók viðkomandi húsfélags fyrir fundinn.
Helstu gögn viðkomandi húsfélags á einum stað
Í Húsbókinni er leitast við að safna saman og gera aðgengileg öll helstu gögn viðkomandi húsfélags og því má segja að þar verði jafnóðum til drög að ástandssögu húseignarinnar í gegnum framkvæmdir sem ráðist er í á vegum húsfélagsins og fundargerðir sem þar liggja að baki o.fl. Húsbókin er því upplýsingaveita um ástand eignar, t.d. við kaup eða sölu, jafnframt því að vera upplýsingagátt til eigenda og stjórna húsfélaga í þjónustu hjá Eignaumsjón.
Eigendur/íbúar hafa alltaf aðgang að nýjustu upplýsingum um húsgjöldin sín, s.s. greiðsluseðla og kröfusögu. Í Húsbókinni er enn fremur hægt að nálgast fundargerðir, ársreikninga, kostnaðaráætlanir, tryggingarskírteini og ýmis gögn sem snúa að viðhaldi og framkvæmdum viðkomandi húsfélags.
Gagnsemi Húsbókarinnar er ekki síðri fyrir stjórnir húsfélaga. Þar er m.a. hægt á hverjum tíma að sjá daglega fjárhagsstöðu húsfélagsins, stöðu bankareikninga, útistandandi húsgjöld/framkvæmdagjöld og stöðu innheimtukrafna allra greiðenda. Í Húsbókinni eru einnig eftirlitsskýrslur húsumsjónar aðgengilegar, ef við á, sem og önnur gögn sem snúa að stjórn húsfélagsins.
Jul 8, 2021 | Fréttir
Það er ekkert einhlýtt svar þegar spurt er hvenær eigi að byrja að huga að viðhaldi fasteigna en það er reynsla okkar hjá Eignumsjón, sem höfum yfir 20 ára þekkingu og reynslu í þessum efnum, að haustið sé kjörinn tími til að byrja að huga að viðhaldsframkvæmdum næsta sumars.
Undirbúningur og ákvarðanir um stærri viðhaldsframkvæmda hjá húsfélögum taka alla jafnan nokkurn tíma. Eigendur þurfa bæði að vega og meta viðhaldsþörf, forgangsröðun og eigin fjárhagsgetu en gott samráð og húsfundir eru lykill að farsælli niðurstöðu. Oftar en ekki þarf líka að halda nokkra húsfundi, áður en endanleg niðurstaða og ákvörðun liggur fyrir.
Horfum til lengri tíma
„Íslenska aðferðin“ hefur lengi verið sú að bíða með viðhald og viðgerðir þar til í óefni er komið, með tilheyrandi aukakostnaði. Þessu höfum við reynt að breyta hjá húsfélögum sem eru í þjónustu hjá okkur en þá reynir á eigendur í viðkomandi fjölbýli, sem þurfa að ná samstöðu um málið.
Það sem við ráðleggjum stjórnum húsfélaga sem hyggjast fara í umfangsmeiri viðhaldsframkvæmdir er að boða til löglegs fundar með eigendum þar sem ástand eignar og viðhald næstu ára er fundarefnið. Fyrsta skref er alla jafnan að veita stjórn heimild til að ráða sérfróðan aðila til að gera ástandsskýrslu og kostnaðarmat vegna viðgerða og viðhalds sem kynntar eru á húsfundi þar sem ákvörðun er tekin um forgang viðhaldsverkefna og stjórn veitt heimild til að afla tilboða í verkið. Tilboð eru kynnt á húsfundi með sundurliðun á aðgerðum og kostnaði, ákveðið hvaða tilboði skuli taka og samið í framhaldinu við viðkomandi verktaka.
Betri yfirsýn yfir rekstur og kostnað
Með þessu verklagi eru minni líkur á óvæntum kostnaði vegna viðhaldsverkefna að okkar mati. Jafnframt fæst betri heildarmynd á allan rekstur og viðhald húsfélagsins og greiðsludreifing í framkvæmdasjóð húsfélagsins verður jafnari fyrir eigendur.
Eignaumsjón leggur að sjálfsögðu húsfélögum, sem eru í þjónustu hjá félaginu, lið við undirbúning viðhaldsframkvæmda. Hægt er að senda erindi á þjónustuverið á netfangið thjonusta@eignaumsjon.is, hafa samband á netspallinu á www.eignaumsjon.is eða hringa í síma 585-4800 með ósk um tilboð frá fagaðilum í ástandsmat vegna viðhaldsframkvæmda.
Jun 29, 2021 | Fréttir
„Samkvæmt spá sem við höfum gert út frá opinberum gögnum gerum við ráð fyrir að eftir 10 ár verði um 50% fólksbíla hér á landi knúin raforku að einhverju eða öllu leyti. Það gera þá um 150.000 bílar en þeir voru aðeins um 15.000 um síðustu áramót. Þessir bílar dreifast víða og verða í hverju einasta fjölbýlishúsi þannig að innan áratugar þurfa öll fjölbýli að vera búin að koma upp rafhleðslustöðvum. Langflestir kaupendur fasteigna gera orðið kröfu um að slíkar tengingar séu til staðar, ekki í óráðinni framtíð heldur strax í dag.“
Hlutlaus og fagleg úttekt
Þetta segir Bjarni G. Hjarðar, byggingar- og umhverfisverkfræðingur en hann er sérfræðingur og ráðgjafi á fasteignasviði Eignaumsjónar. Hann leiðir þróun nýjunga í þjónustu Eignaumsjónar, m.a. úttektir á hleðslufyrirkomulagi rafbíla í fjölbýlishúsum. „Við bjóðum upp á hlutlausa og faglega úttekt ásamt ráðgjöf um bestu framtíðarlausnir varðandi uppsetningu stöðvanna. Að mörgu þarf að huga í upphafi s.s. að tryggja að heimtaug í hús sé nægjanlega öflug, hvaða búnaður skuli valinn, hver sé tæknileg geta hans og að álagsstýringarbúnaður sé til staðar svo fáein dæmi séu nefnd.“
Bjarni segir að útfærsla á hleðslu rafbíla í fjölbýlishúsum hafi oft verið einfalt viðfangsefni meðan fáir rafbílar voru í umferð og unnt var að leysa málin þannig að dugði um hríð. Eftir að stjórnvöld breyttu fjöleignarhúsalögum í maí 2020, sem skyldaði húsfélög til að bregðast við óskum um að koma upp rafhleðslustöðvum, sé hins vegar ljóst að huga þurfi betur að heildarfyrirkomulagi þessara mála með áherslu á framtíðarlausnir og réttláta skiptingu kostnaðar milli húsfélaga og einstakra notenda.
Þrenns konar Bílastuð
Bílastuð er ný þjónustuleið Eignaumsjónar vegna hleðslu rafbíla. Í Bílastuði 0 er gerð úttekt á hleðsluaðstöðu húsfélagsins og gerð kostnaðar- og framkvæmdaáætlun. Í Bílastuði 1 færir Eignaumsjón innheimtu gjalda vegna hleðslu rafbíla frá ábyrgð húsfélagsins yfir í sjálfvirkt fyrirkomulag og reikningagerð.
„Þá er þriðja leiðin það sem við köllum Bílastuð 1+1 en þá ábyrgist Eignaumsjón rekstur og viðhald kerfanna ef þau eru að fullu snjallvædd en það tryggir nákvæma skrá um notendur og notkun hvers fyrir sig sem auðvitað er forsenda fyrir sanngjarnri og réttri innheimtu. Okkar sýn er að sem flest húsfélög líti til opinna lausna, þ.e. að engu skipti við val á kerfi hver framleiðandi hleðslustöðva er eða hvaða aðili selur notandanum raforkuna.
Jarðefnaeldsneytisbílar bannaðir
Við spyrjum Bjarna að lokum út í áform stjórnvalda um að hætta innflutningi árið 2030 á fólksbifreiðum sem ganga fyrir jarðefnaeldsneyti.
„Já, stefnan liggur fyrir og er hún í samræmi við það sem önnur ríki í Evrópu hafa ákveðið. Þá má og nefna að allir helstu bílaframleiðendur heims hafa þegar ákveðið að hætta notkun olíu eða bensíns sem orkugjafa í sína nýju bíla eftir aðeins nokkra mánuði og misseri. Nú er meðalaldur fólksbíla um 12,5 ár og það gefur auga leið að þú færð ekki hátt endursöluverð fyrir bílinn þinn ef hann er knúinn bensíni eða olíu þegar þessi staða er komin upp. Því velja langflestir rafbíla eða tengiltvinnbíla í dag. Fólk mun ekki eiga val um þetta heldur stendur það frammi fyrir orkuskiptum bílaflotans innan örfárra ára – orkuskipta sem svo sannarlega eru tímabær af umhverfislegum ástæðum.“
Viðtal við Bjarna G. Hjarðar, sérfræðing á fasteingasviði Eignumsjónar í Sóknarfæri í júní 2021.