Sep 1, 2025 | Fréttir, Greinar
Þótt enn sé bara síðsumar, ágústmánuður nýliðinn og veðurfar almennt gott, þá styttist í að haustlægðir fara að gera vart við sig með tilheyrandi roki og vatnsveðrum.
Húsfélög kunna að vera ábyrg ef lausamunir tengdir félaginu fjúka og valda skemmdum. Það ætti því að vera fastur liður á dagskrá stjórna húsfélaga að huga að frágangi á slíkum munum, s.s. útihúsgögnum, grillum og stórum leikföngum eins og trampólínum. Gott er að koma þessum hlutum í skjól, eða festa þá tryggilega niður, áður en haustlægðirnar mæta með tilheyrandi roki og vatnsveðrum.
Þakrennur og niðurföll
Gróður er enn í töluverðum blóma en ef að líkum lætur styttist í að tré og runnar felli lauf. Þá þarf að huga að eftirliti og hreinsun á bæði þakrennum og niðurföllum, til að tryggja að laufblöð, sandur, drulla eða rusl sé ekki að stífla rennur og niðurföll og jafnvel valda vatnstjóni.
Þegar haustrigningatíminn hefst er líka alltaf viðbúið að vatn komist inn í ytra byrði húsa og glugga með tilheyrandi leka. Ef slíka staða kemur upp er mikilvægt að grípa strax til viðeigandi aðgerða til að lágmarka hugsanlegt tjón.
Hitavakt og haustviðhald
Eignaumsjón býður húsfélögum upp á mánaðarlegt eftirlit með notkun á heitu vatni til að draga úr sóun og stuðla að skilvirkri orkunotkun og lægri rekstrarkostnaði. Þjónustan felur m.a. í sér faglega skoðun í tæknirýmum húsa á hitagrindum og snjóbræðslukerfum, með það að markmiði að tryggja að þau starfi á fullum afköstum og án vandamála. Með kólnandi veðri uppgötvast líka oft að hitastillingar á ofnum eru ekki að virka sem skyldi, en pinnar í ofnlokum eiga það til að festast og þarf þá að losa þá og liðka, svo þeir virki eins og þeir eiga að gera.
Haustið er líka kjörinn tími til að skoða og laga þéttingar á gluggum og útihurðum, til að koma í veg fyrir hitatap, sem og að ganga úr skugga um að allar hurðir og gluggar lokist vel, svo hiti haldist inni og kuldinn úti.
Hálkuvarnir og snjómokstur
Loks er ekki úr vegi að minna stjórnir á að huga að samningum um hálkuvarnir og snjómokstur, ef samningar um slíkt eru ekki fyrirliggjandi. Það reynsla okkar að margir vakna upp við vondan draum þegar byrjar að snjóa – og ekki næst í neina verktaka til að hreinsa bílaplön og innkeyrslur!
Þjónustuver Eignaumsjónar aðstoðar viðskiptavini okkar við að útvega hagstæð tilboð í bæði snjómokstur og söltun, sem og aðra haust- og vetrartengda þjónustu við hús- og rekstrarfélög. Hægt er að hafa samband við okkur í netspjalli á www.eignaumsjon.is, í tölvupósti á thjonusta@eignaumsjon.is, eða í síma 585-4800 á skrifstofutíma.
Sep 16, 2024 | Fréttir, Greinar
Fastur liður hjá húsfélögum á haustin er að huga að frágangi á lausamunum, s.s. útihúsgögnum, grillum og stórum leikföngum eins og trampolínum.
Húsfélög sem eru ekki þegar búin að ganga frá útihúsgögnum, grillum og leiktækjum hjá sér eru hvött til að drífa í því sem allra fyrst, áður en haustlægðirnar mæta fyrir alvöru, með tilheyrandi roki og vatnsveðrum.
Þakrennur og niðurföll
Gróður er enn í töluverðum blóma en ef að líkum lætur styttist í að tré og runnar felli lauf. Því viljum við líka minna stjórnir húsfélaga á að huga að eftirliti og hreinsun á þakrennum og niðurföllum, svo tryggt sé að laufblöð, drulla eða annað sé ekki að valda stíflum eða leka.
Hálkuvarnir og snjómokstur
Við viljum líka minna formenn og stjórnir húsfélaga á að huga tímanlega að samningum um hálkuvarnir og snjómokstur, ef slíkir samningar eru ekki þegar fyrirliggjandi við þjónustufyrirtæki, þó við vonum að sjálfsögðu að enn sé langt þar til Vetur konungur fari að sína sig. Áratuga reynsla segir okkur að allt of margir vakna upp við vondan draum þegar byrjar að snjóa og þá næst ekki í neina verktaka til að hreinsa bílaplön og innkeyrslur!
Getum við aðstoðað?
Eignaumsjón getur lagt húsfélögum lið við að leita að iðnaðarmönnum eða þjónustuaðilum. Nánari upplýsingar um þá þjónustu er hægt að fá hjá þjónustuverinu okkar með því að senda tölvupóst á netfangið thjonusta@eignaumsjon.is, hringja í síma 585-4800 á skrifstofutíma eða vera í sambandi í netspjalli á www.eignaumsjon.is.
Nov 17, 2021 | Fréttir
„Það er ekkert algilt svar þegar spurt er hvenær eigi að byrja að huga að viðhaldi fasteigna en það er reynsla okkar hjá Eignumsjón, sem höfum yfir 20 ára þekkingu og reynslu í þessum efnum, að haustið sé kjörinn tími til að byrja að huga að viðhaldsframkvæmdum næsta sumars,“ segir Halla Mjöll Stefánsdóttir, ráðgjafi á þjónustusviði Eignaumsjónar, í viðtali sem birtist á dögnuum í blaðinu Sóknarfæri.
Undirbúningur og ákvarðanir um stærri viðhaldsframkvæmdir hjá húsfélögum taka alla jafnan nokkurn tíma. Eigendur þurfa bæði að vega og meta viðhaldsþörf, forgangsröðun og eigin fjárhagsgetu og þar eru gott samráð og húsfundir lykill að farsælli niðurstöðu. Oftar en ekki þarf að halda nokkra húsfundi, áður en endanleg niðurstaða og ákvörðun liggur fyrir.
Horfum til lengri tíma
„Íslenska aðferðin hefur lengi verið sú að bíða með viðhald og viðgerðir þar til í óefni er komið, með tilheyrandi aukakostnaði. Við höfum gjarnan bent þeim húsfélögum sem eru í þjónustu hjá okkur að huga fyrr að framkvæmdum og safna jafnvel innleggi í framkvæmdasjóð til að lækka innheimtur á eigendur þegar að framkvæmdum er komið. Vissulega reynir á eigendur þar sem ríkja þarf samhugur í þeim efnum,“ segir Halla.
„Við ráðleggjum húsfélögum sem stefna á umfangsmeiri viðhaldsframkvæmdir að boða til löglegs fundar með eigendum þar sem ástand eignar og viðhald næstu ára er fundarefnið. Fyrsta skrefið er að veita stjórn heimild til að ráða fagaðila til að gera ástandsskýrslu ásamt kostnaðarmati vegna viðgerða. Þær niðurstöður þarf síðan að kynna á öðrum húsfundi og taka þar ákvörðun um forgang viðhaldsverkefna og veita stjórn heimild til að afla tilboða í verkið. Tilboð sem berast eru svo kynnt á þriðja húsfundinum, með sundurliðun á aðgerðum og kostnaði. Næsta skref er svo að taka ákvörðun, annað hvort á sama húsfundi eða sérstökum fundi, um hvaða tilboði skuli taka og semja svo í framhaldinu við verktakann sem á tilboðið sem tekið er.“
Betri yfirsýn yfir rekstur og kostnað
Að lokum áréttar Halla að Eignaumsjón leggi að sjálfsögðu húsfélögum sem eru í þjónustu hjá félaginu lið, bæði við boðun funda, undirbúning viðhaldsframkvæmda og öflun tilboða í ástandsmat vegna slíkra framkvæmda frá fagaðilum.
Aug 27, 2019 | Fréttir
Þótt enn sé bara síðsumar og ágúst á dagatalinu var klár haustbragur á lægðinni sem er nýgengin yfir með tilheyrandi vindi og úrkomu. Það minnir okkur líka á að tími haustverkanna er að renna upp!
Eftir einstaklega sólríkt sumar á höfuðborgarsvæðinu og suðvesturhorni landsins er nú kominn tími til að huga að öruggum frágangi á útihúsgögnum og stórum útleikföngum, s.s. trampólínum, áður en haustlægðirnar mæta fyrir alvöru með tilheyrandi roki og vatnsveðrum.
Gróður er líka búinn að vera í miklum blóma í sumar og því viljum við líka minna stjórnir húsfélaga á að huga að eftirliti og hreinsun á þakrennum og niðurföllum, svo tryggt sé að laufblöð, drulla eða annað sé ekki að valda stíflum eða leka.
Öll hús veðrast, jafnt ný sem eldri og rétt að árétta að þurrkatíðin í sumar gæti haft í för með sér að vatn ætti greiðari aðgang inn í ytra byrði og glugga með tilheyrandi leka, þegar haustrigningatíminn hefst fyrir alvöru. Það er mikilvægt að þá sé strax brugðist við og gripið til aðgerða til að lágmarka hugsanlegt tjón.
