Jul 27, 2022 | Fréttir
Átakið ALLIR VINNA, sem var hluti af aðgerðapakka stjórnvalda árið 2020 vegna áhrifa COVID-19 á efnahagslífið, er á lokametrunum. Það fólst m.a. í 100% endurgreiðslu virðisaukaskatts af vinnu iðnaðar- og verkamanna við byggingu og viðhald íbúðarhúsnæðis og fleiru.
Upphaflega átti átakinu að ljúka um síðustu áramót en var þá framlengt fram á þetta ár en mislengi þó eftir verkþáttum.
Ívilnanir í gildi til ágústloka vegna íbúðarhúsnæðis
Þannig var full endurgreiðsla virðisaukaskatts af vinnu iðnaðar- og verkamanna, á byggingarstað við nýbyggingu, viðhald og endurbætur íbúðarhúsnæðis, framlengd til loka ágústmánaðar á þessu ári. Eftir það, eða frá 1. september nk., skal endurgreiðslan miðast við 60% eins og áður var. Húsfélög og aðrir, sem eru í framkvæmdum og ætla sér að fá 100% vsk-endurgreiðslu af ofangreindum framkvæmdum, hafa því nú rúman mánuð til stefnu áður en gildistími ívilnunarinnar rennur út!
Eignaumsjón sér um að sækja um VSK-endurgreiðslur til skattsins fyrir húsfélög og aðra viðskiptavini félagsins, samkvæmt greiddum reikningum sem þurfa að vera dagsettir 31. ágúst á þessu ári eða fyrr, til að full endurgreiðsla fáist.
Aðrar ívilnanir féllu niður í júnílok
Aðrar ívilnanir um endurgreiðslu virðisaukaskatts, sem voru framlengdar um síðustu áramót, féllu hins vegar niður í júnílok. Þar var annars vegar um að ræða fulla endurgreiðslu virðisaukaskatts af vinnu við hönnun og eftirlit, viðhald og endurbætur frístundahúsnæðis og húsnæðis í eigu sveitarfélaga og hins vegar vinnu vegna heimilisaðstoðar og reglulegrar umhirðu íbúðarhúsnæðis, þ.e. sóttvarna og þrifa vegna COVID-19.
Gildistími ofnagreindra ívilnana var til og með 30. júní 2022. Að sjálfsögðu sér Eignaumsjón líka um að sækja um vsk-endurgreiðslur til skattsins af þessum þáttum fyrir húsfélög og aðra viðskiptavini félagsins samkvæmt greiddum reikningum, dagsettum fyrir júnílok á þessu ári.
Dec 30, 2021 | Fréttir
Samþykkt hefur verið á Alþingi, í tengslum við afgreiðslu fjárlagafrumvarps ríkisstjórnarinnar fyrir næsta ár, að framlengja átakið ALLIR VINNA fram á mitt næsta ár í aðeins breyttri mynd. Eignaumsjón fagnar þessari ákvörðun sem vonandi tryggir að húsfélög, sem lent hafa í vandræðum með framkvæmdir vegna tafa á aðföngum af völdum COVID-19, nái að ljúka framkvæmdum innan framlengds gildistíma átaksins.
Efnt var til átaksins á fyrri hluta ársins 2020 sem hluta af aðgerðum stjórnvalda til að bregðast við áhrifum COVID-19 á efnahagslífið. Átakinu átti að ljúka nú um áramótin en samkvæmt tillögu meirihluta efnahags- og viðskiptanefndar við afgreiðslu bandormsins svokallaða, sem hefur að geyma ýmsar breytinga á lögum í tengslum við afgreiðslu fjárlaga, hefur nú verið samþykkt að framlengja átakið en þó í aðeins breyttri mynd.
Framlenging vegna íbúðarhúsnæðis gildir til ágústloka
Full endurgreiðsla virðisaukaskatts af vinnu iðnaðar- og verkamanna sem unnin er á byggingarstað við nýbyggingu, viðhald og endurbætur íbúðarhúsnæðis, er framlengd til og með 31. ágúst 2022 en eftir þann tíma, frá og með 1. september 2022, skal endurgreiðslan miðast við 60%.
Jafnframt er 100% endurgreiðsla virðisaukaskatts framlengd af vinnu iðnaðar- og verkamanna sem unnin er á byggingarstað við nýbyggingu, viðhald og endurbætur frístundahúsnæðis og húsnæði í eigu sveitarfélaga, sem og vinnu við hönnun og eftirlit með byggingum, endurbótum og viðhaldi frístundahúsnæðis, ásamt vinnu manna vegna heimilisaðstoðar og reglulegrar umhirðu íbúðarhúsnæðis. Gildistími þessara ívilnana er til og með 30. júní 2022 og falla þær því niður frá og með 1. júlí 2022.
Það var hins vega ekki samþykkt að framlengja ívilnanir vegna 100% endurgreiðslu virðisaukaskatts vegna vinnu manna við bílaviðgerðir, bílamálningu eða réttingar fólksbifreiða. Falla þær niður frá og með 1. janúar 2022.
Ánægjuleg niðurstaða Alþingis og stjórnvalda
„Þessi framlenging átaksins ætti að tryggja að húsfélög, sem sáu fram á að geta ekki lokið umfangsmiklum viðhaldsframkvæmdum nú fyrir áramót vegna tafa af völdum COVID-19, geti nú lokið þeim á gildistíma framlengingarinnar og þar með vonandi innan þess fjárhagsramma sem búið var að samþykkja með tilliti til 100% endurgreiðslu virðisaukaskatts af vinnu iðnaðarmanna,“ segir Daníel Árnason, framkvæmdastjóri Eignaumsjónar.
„Það er mjög ánægjulegt að Alþingi og stjórnvöld skuli hafa hlustað á raddir okkar sem hvöttum til framlengingar átaksins ALLIR VINNA. Við höfum verið leiðandi í yfir 20 ára í þjónustu við húsfélög fjöleignarhúsa og ég fullyrði að þessar skattaívilnanir hafa skilað fjölmörgum eigendum íbúðarhúsnæðis í fjöleignarhúsum verulegum ávinningi, ekki síst í eldra húsnæði þar sem ráðist hefur verið í löngu tímabært viðhald og endurbætur sem má beinlínis rekja til minni framkvæmdakostnaðar vegna átaksins ALLIR VINNA.“
Dec 17, 2021 | Fréttir, Greinar
Sú staða blasir nú við mörgum húsfélögum sem farið hafa af stað í góðri trú með umfangsmiklar viðhaldsframkvæmdir í tengslum við átakið ALLIR VINNA að ekki næst að ljúka þeim fyrir áramót vegna tafa af völdum COVID-19. Algengast er að um sé að ræða tafir á vinnuþættinum hjá verktökum vegna fjarvista erlends starfsfólks, s.s. vegna smit- og sóttvarna. Tafa vegna COVID-19 gætir einnig í vaxandi mæli á ýmis aðföng vegna viðhalds- og byggingarframkvæmda, s.s. á framleiðslu erlendis og flutninga.
Fjölmörg dæmi eru um það hjá húsfélögum sem eru í þjónustu hjá okkur að framkvæmdum, sem átti að ljúka í haust, hafi verið slegið á frest til vors 2022 af þessum orsökum. Aðdragandi framkvæmda hjá húsfélögum er umtalsverður, bæði öflun tilboða og samþykktarferlið. Eðlilega verðum við því vör við gremju hjá stjórnum húsfélaga sem eru lent í þessari stöðu, enda allt útlit er fyrir að fjárhags- og framkvæmdaáætlanir raskist með tilheyrandi viðbótarkostnaði fyrir eigendur, fari svo að ALLIR VINNA ljúki nú um áramótin.
Efnt var til átaksins sem hluta af aðgerðum stjórnvalda til að bregðast við áhrifum COVID-19 á efnahagslífið. Kórónuveirufaraldurinn er langt frá því að vera yfirstaðinn og því er full þörf á að framlengja átakið að okkar mati. Átakið hófst í mars 2020 og það hefur haft mikil og jákvæð áhrif fyrir eigendur íbúðarhúsnæðis í fjöleignarhúsum. Húsfélög í mörgum eldri fjöleignarhúsum hafa ráðist í tímabært viðhald og endurbætur, beinlínis vegna minni kostnaðar sem fylgir 100% endurgreiðslu á virðisaukaskatti.
Við hjá Eignaumsjón, sem höfum verið leiðandi hérlendis í yfir 20 ár í þjónustu við húsfélög fjöleignarhúsa, tökum því heilshugar undir áskoranir til stjórnvalda og Alþingis um að átakið ALLIR VINNA verði framlengt enn um sinn. Jafnframt höfum við komið þessum sjónarmiðum okkar á framfæri við félagsmálaráðuneytið, sem fer með málefni fjöleignarhúsa.
Daníel Árnason, framkvæmdastjóri Eignaumsjónar, birti ofangreinda SKOÐUN á visir.is 17. desember 2021.
Nov 25, 2020 | Fréttir
Það sem af er þessu ári hefur Eignaumsjón sótt um endurgreiðslu á um 260 milljónum króna fyrir hönd húsfélaga í þjónustu félagsins vegna endurbóta, viðhalds og reksturs í tengslum við átakið Allir vinna. Til samanburðar námu endurgreiðslur á virðisaukaskatti til húsfélaga hjá Eignaumsjón allt árið 2019 samtals 169 milljónum króna. Þá hefur Skatturinn fallist á að endurgreiðslur vegna Allir vinna átaksins nái til hluta af vinnu við húsumsjón Eignaumsjónar.
Það er ljóst að átakið Allir vinna er að skila árangri og fyrr í haust var tilkynnt um framlengingu þess til ársloka 2021 í stað ársloka 2020. Skatturinn sér um framkvæmd átaksins og fyrstu níu mánuði þessa árs höfðu embættinu borist um 26.500 umsóknir um endurgreiðslu á virðisaukaskatti, samanborið við ríflega 7.000 umsóknir á sama tímabili árið 2019.
Nýjung að endurgreiða virðisaukaskatt af umhirðu íbúðarhúsnæðis
Allir vinna er hluti aðgerða sem stjórnvöld gripu til fyrri hluta þessa árs til að bregðast við áhrifum COVID-19 á efnahagslífið. Það felur í sér hækkun á endurgreiðslu virðisaukaskatts úr 60% í 100% af vinnu manna en heimildir til endurgreiðslu eru töluvert víðtækari núna heldur en þegar gripið var tímabundið til þessa sama úrræðis eftir hrun. Auk vinnu manna á byggingarstað við nýbyggingar, viðhald og endurbætur íbúðarhúsnæðis og frístunahúsnæðis, nær endurgreiðslan núna einnig til þjónustu vegna hönnunar og eftirlits með byggingum, viðhaldi og endurbótum íbúðar- og frístundahúsnæðis og vinnu manna vegna heimilisaðstoðar eða reglulegrar umhirðu íbúðarhúsnæðis.
Eignaumsjón hefur árum saman gætt þess að virðisaukaskattsendurgreiðslur af byggingarframkvæmdum og viðhaldi skili sér til húsfélaga í þjónustu félagsins og nú geta húsfélög einnig fengið endurgreiddan virðisaukaskatt af vinnu vegna ýmiskonar þjónustu. Má þar nefna vinnu við þrif í sameign, þrif og sótthreinsun á sorpgeymslum og sorpílátum og garðvinnu, s.s. garðslátt og trjá- og runnaklippingar.
Húsumsjón Eignaumsjónar að hluta undanþegin virðisaukaskatti
Þá er ánægjulegt að greina frá því að Skatturinn hefur fallist á að hluti af vinnu við húsumsjón Eignaumsjónar falli undir ákvæði um reglubundna umhirðu íbúðarhúsnæðis. Vinna er þegar hafin við að sækja um endurgreiðslur fyrir þau hús- og atvinnufélög sem valið hafa að láta Eignaumsjón annast reglubundna umsjón, eftirlit og fyrirbyggjandi viðhald með sameign fasteignar sinnar – og tryggja þannig að ástand hennar sé ávallt eins og best verður á kostið.
Það sem af er þessu ári hefur Eignaumsjón haft milligöngu um nærri 100 milljónum króna hærri virðisaukaskattsendurgreiðslur til húsfélaga sem eru í þjónustu hjá félaginu en allt árið í fyrra, eða um 260 milljónir á móti 169 milljónum og viðbúið að talan í ár eigi eftir að hætta umtalsvert og fara yfir 300 milljónir króna ef að líkum lætur.
Framkvæmd endurgreiðslu
Það er verkkaupi sem getur fengið endurgreiddan virðisaukaskatt frá Skattinum af vinnu manna samkvæmt ákvæðum átaksins Allir vinna. Viðkomandi húsfélag er verkkaupi og sækir Eignaumsjón jafnt og þétt yfir árið um endurgreiðslu fyrir hönd sinna húsfélaga. Í stórum viðhaldsframkvæmdum getur endurgreiðslan oft á tíðum orðið umtalsverð upphæð.
Skal að lokum áréttað að húsfélög þurfa að vera búin að greiða reikninga, áður en hægt er að fá endurgreiðslu frá Skattinum á virðisaukaskatti. Því er mikilvægt að húsfélög fjármagni framkvæmdir sínar til að tryggja skil gagnvart verktökum og í framhaldinu til að sækja um endurgreiðslu virðisaukaskatts. Endurgreiðslan rennur til húsfélagsins en tekið tillit til hennar þegar framkvæmdauppgjör er unnið í lok viðkomandi viðhaldsverks.
