Jun 14, 2024 | Fréttir
Við Áshamar 42-48 í Hamraneshverfinu í Hafnarfirði hefur Eignaumsjón nýlega stofnað deildaskipt heildarhúsfélag þar sem verða alls 79 íbúðir og eitt atvinnubil í fjórum byggingum á sameiginlegum bílakjallara. Þar eru 60 bílastæði og geta íbúar leigt stæði en einnig fylgja stæði nokkrum stærri íbúðum. Þegar er búið að afhenda hátt í fimmtu íbúðir í Áshamri 44 og 46 og er starfsemi húsfélagsins hafin fyrir þær deildir. Þá er gert ráð fyrir að íbúðir í Áshamri 48 verði afhentar í haust og í Áshamri 42 í lok ársins.
Það er byggingarfélagið Hamravellir ehf. sem er lóðarhafi og annast framkvæmdir við Áshamar 42-48. Félagið er í eigu fyrirtækjanna Verklands ehf., sem er aðalverktaki framkvæmda og Trefja ehf. Í stjórn eru smiðirnir Ingi Ljóts og Gísli Johnsen, eigendur Verklands og bræðrunum Óskar og Þröstur Auðunssynir, eigendur Trefja.
Svansvottaðar byggingar
„Við leggjum áherslu á að skila byggingum í hæsta gæðaflokki og setjum jafnframt öryggi starfsfólks og umgengni á byggingarstað í fyrsta sæti,“ sagði Ingi, þegar að sölumenn Eignaumsjónar skoðuðu framkvæmdasvæðið á dögunum í tengslum við stofnun húsfélagsins. Byggingarnar eru í Svansvottunarferli og við hönnun þeirra var m.a. horft til þess að lágmarka orkunotkun og tryggja góða hljóðvist og hagkvæma nýtingu dagsbirtu.
Markviss flokkun og förgun
„Svansvottunarferlið kallar líka á markvissa minnkun umhverfisáhrifa af framkvæmdunum, með áherslu á hringrásarhagkerfið og flokkun úrgangs,“ sagði Þröstur. Því var komið upp flokkunaraðstöðu í sameiginlegum bílakjallara bygginganna þar sem afgangar af byggingarefni hafa verið flokkaðir jöfnum höndum, s.s. allskonar tegundir af plasti, umbúðir utan af innréttingum og eldhústækjum o.fl.
„Flokkunarhlutfallið á verktímanum er á bilinu 98-99%, sem er mjög góður árangur að okkar mati,“ sagði Ingi og Þröstur bætti við að vissulega tæki þetta tíma og kallaði á töluverða vinnu. „Á móti hafa sparast umtalsverðir fjármunir og við gátum t.d. fækkað gámum fyrir blandaðan úrgang hér á byggingarstaðnum úr sex gámum niður í tvo, með tilheyrandi sparnaði í losunarkostnaði.“
Búa líka til moltu
En þar með er ekki öll sagan sögð, því í bílakjallaranum er einnig búin til molta. „Það fellur til umtalsvert magn af lífrænum úrgangi hér á vinnusvæðinu, ekki síst matarleifar frá starfsfólkinu okkar og fleira. Því gripum við til þess ráðs að koma okkur upp búnaði til moltugerðar, sem við notum svo hér á lóðinni í blómabeð og fleira,“ sagði Ingi að lokum.
Þjónusta Eignaumsjónar
Húsfélagið Áshamar 42-48 er í þjónustuleið Þ-2 hjá Eignaumsjón, sem felur í sér umsjón með fjármálum, bókhaldi og gerð ársreiknings, ásamt undirbúningi og framkvæmd aðalfundar. Húsfélagið nýtir sér einnig Húsumsjón Eignaumsjónar, sem felur í sér reglubundna umsjón með sameign húsfélagsins þannig að ásýnd viðkomandi fasteignar verði ávallt eins og best er á kosið.
Mar 26, 2024 | Fréttir
Eftirspurn eftir faglegu eftirliti og umsjón með sameign húsfélaga og atvinnuhúsa hefur vaxið jafnt og þétt á þeim sjö árum sem liðin eru frá því að Eignaumsjón hóf að bjóða upp á slíka sérþjónustu vorið 2017.
Húsumsjón heyrir undir þjónustusvið Eignaumsjónar eftir skipulagsbreytingar haustið 2023. Í upphafi sinnti einn starfsmaður öllum verkefnum Húsumsjónar en í dag eru fastráðnir húsumsjónarmenn þrír talsins, auk þess sem ráðgjafar, bæði á þjónustu- og fjármálasviði fyrirtækisins, leggja þeim lið.
Hagkvæm lausn fyrir hús- og rekstrarfélög
„Húsumsjón kemur í stað hefðbundinnar húsvörslu og er fagleg, hagkvæm og skynsamleg lausn fyrir fjölda hús- og rekstrarfélaga. Með því að nýta sér hana geta félögin lækkað viðhaldskostnað en tryggt eftir sem áður að ástand sameigna viðkomandi fasteigna sé eins og best verður á kosið,“ segir Gunnþór S. Jónsson, forstöðumaður þjónustusviðs Eignaumsjónar.
Viðskiptavinir ákveða tíðni þjónustunnar, eftir þörfum hvers og eins, en í boði er allt frá daglegum eftirlitsheimsóknum til heimsókna á eins til tveggja vikna fresti.
Skráðir verkferlar og stöðuskýrsla
Húsumsjónarmenn Eignaumsjónar vinna samkvæmt skráðum verkferlum og fylgja fyrir fram ákveðinni verklýsingu fyrir hvern viðskiptavin, sem tekur til bæði umgengni, ástands og ásýndar sameignar, yfirferðar á búnaði húseignarinnar, lagfæringum, eftirliti og eftirfylgni með aðkeyptri þjónustu frá þriðja aðila.
„Góð upplýsingagjöf til viðskiptavina og samskipti skipta sköpum fyrir þjónustufyrirtæki eins og okkar og því skilum við skýrslu til stjórnar viðkomandi húseignar að lokinni hverri heimsókn,“ segir Gunnþór og bætir við að umrædd skýrslugjöf hafi mælst mjög vel fyrir. „Þar er upplýst um ástand sameignar og það sem gert var, jafnframt því sem settar eru fram ábendingar um það sem betur má fara varðandi sameign viðkomandi húseignar sem er í húsumsjónar hjá okkur í Eignaumsjón“.
Sep 23, 2022 | Fréttir
„Það er skemmtilegast að heyra frá ánægðum viðskiptavinum,“ segir Guðbrandur Óli Albertsson, kallaður Brandur í daglegum samskiptum, aðspurður um hvað honum finnist skemmtilegast í vinnunni hjá Eignaumsjón. „Það er líka gaman kl. 14:45 á föstudögum þegar ég hef náð að klára verkefnalista vikunnar,“ bætir Brandur kankvís við en hann hefur nú starfað hjá félaginu í rúmt ár í húsumsjón.
„Ég ferðast um borg og bí og hef eftirlit með ástandi sameigna þeirra húsfélaga sem eru í húsumsjón hjá okkur,“ segir Brandur,. Hann fór á sínum tíma í húsasmiðinn í Tækniskólanum og er líka með bæði vélavarðar- og vinnuvélaréttindi, meiraprófið og hefur verið formaður í ungmennafélagi í nokkur ár og björgunarsveitarmaður í nærri þrjá áratugi.
Í mörg horn að líta í húsumsjóninni
„Þessi reynslubanki nýtist vel í þeim fjölbreyttu verkefnum sem þarf að sinna á hverjum degi í húsumsjóninni,“ bætir Brandur við. „Ég er mikið í að stilla hurðarpumpur og hurðir, skipta um reykskynjara, endurræsa brunakerfi og koma með ábendingar til stjórna hjúsfélaga um það sem betur má fara. Við höfum líka eftirlit með vinnu verktaka í umboði hússtjórna, þegar sinna þarf umfangsmeiri viðhaldssverkefnum. Við fylgjumst einnig með almennri umgengni, höfum eftirlit með niðurföllum, tínum rusl á lóðum og í bílageymslum, auk fjölmargra annarra verkefna sem koma daglega inn á borð til okkar.“
Húsumsjóninni, sem er sérsniðin þjónustuleið fyrir stærri hús- og atvinnufélög, hefur vaxið fiskur um hrygg frá því að byrjað var að bjóða upp hana fyrir fimm árum. Þá sinnti einn starfsmaður öllum útköllum en nú eru starfsmenn fasteignasviðsins þrír talsins. Aðspurður segir Brandur að helstu áskoranir í starfinu sé að læra á flókinn búnað í nýrri fjölbýlishúsum. „Þar eru líka margs konar kerfisstýringar sem þarf að hafa reglulegt eftirlit með, svo sem hitakerfi, aðgangskerfi, þjófavarnarkerfi, snjóbræðslur og fleira.“
Starfinu fylgja líka skemmtileg samskipti og stundum krefjandi, bæði við hússtjórnir og íbúa. Spurður um reynslusögur nefnir Brandur t.d. að hann hafi aðstoðað lögregluna við að leita að manni sem flúði af þaki byggingar niður um fimm hæða lagnastokk. „Hann náðist síðan í brunnholu í kjallaranum, hreinn og fínn!“
Strandamaður og jeppakall
„Ég er Strandamaður frekar en eitthvað annað,“ segir Brandur sem er fæddur á Eskifirði en ólst upp norður í Árneshreppi á Ströndum frá sex ára aldri. Hann býr í 105 Reykjavík í dag með konu og tveimur stjúpdætrum. Tímann utan vinnu notar Brandur til að vera með fjölskyldu og vinum.
„Skemmtilegast finnst mér að ferðast um hálendið á mínum 38“ jeppa og dytta að honum og laga þegar þarf. Við förum líka mikið á skíði og vélsleða, enda hef ég gaman af allri útiveru og hreyfingu, þannig að áhugamálin vantar ekki.“
Mar 22, 2022 | Fréttir
Hallur Guðjónsson hefur verið ráðinn söluráðgjafi hjá Eignaumsjón og sinnir samskiptum við bæði núverandi viðskiptavini félagsins og leitar nýrra tækifæra.
Áður en Hallur kom til starfa hjá Eignaumsjón starfaði hann sem söluráðgjafi í fimm ár hjá Símanum, fyrir ýmsar deildir innan fyrirtækisins. Þar áður var hann vaktstjóri í söluveri hjá Sjóvá og annaðist bæði tryggingaráðgjöf, sölu og þjónustu. Hallur hefur m.a. stundað atvinnuflugmannsnám í Flugakademíu Íslands hjá Keili og nám í rafvirkjun við Iðnskólann í Hafnarfirði.
Um Eignaumsjón
Eignaumsjón er leiðandi fyrirtæki í þjónustu við eigendur fasteigna og býður heildarlausnir í rekstri fjöleignarhúsa, m.a. íbúðarhúsnæðis og atvinnuhúsnæðis. Félagið hefur umsjón með daglegum rekstri um 700 húsfélaga og rekstrarfélaga um fasteignir og kemur faglega að lausn mála sem koma upp í fjölbýlis- og fjöleignarhúsum. Á skrifstofu Eignaumsjónar starfa 30 starfsmenn og er lögð áhersla á vönduð vinnubrögð og góðan starfsanda.
Feb 9, 2022 | Fréttir
Hátt í 70 húsfélög hafa nú leitað til Eignaumsjónar um hlutlausa og faglega úttekt á hleðsluaðstöðu fyrir rafbíla og gerð kostnaðar- og framkvæmdaáætlunar við uppsetningu og rekstur slíkrar aðstöðu. Á þriðja tug þeirra hafa þegar ákveðið að fela Eignaumsjón að annast sjálfvirka innheimtu vegna notkunar hleðslustöðvanna á húsgjaldareikning viðkomandi notenda.
Meðal fyrstu húsfélaganna til að nýta sér þjónustu Eignaumsjónar um úttekt á hleðsluaðstöðu rafbíla var Laufvangur 2-10 í Hafnarfirði. Fyrstu hleðslustöðvarnar þar eru komnar í gagnið og nýbúið að gefa út hleðslukort, þannig að sjálfvirk innheimta getur hafist hjá rafbílaeigendum í húsfélaginu sem nota stöðvarnar.
Ekkert álag á raforkunotkun bíleigenda
„Við fengum fyrir um ári síðan beiðni um að svona stöðvum yrði komið upp. Þá leituðum við til Eignaumsjónar og fengum úttekt á hleðsluaðstöðu fyrir okkur,“ segir Jón Ragnars, formaður húsfélagsins. Hann segir að í kjölfarið hafi Eignaumsjón óskað eftir tilboðum, húsfundur verið haldinn um málið og hagstæðasta tilboðinu tekið, frá Hleðsluvaktinni, sem sá um að koma stöðvunum upp og þjónustar þær.
Stöðvarnar voru komnar upp seint í haust og var Eignaumsjón fengin til að sjá um rekstur þeirra. Stöðvarnar hafa nú verið tengdar við kerfi Eignumsjónar,sem fær sendar upplýsingar rafrænt um notkun hvers og eins rafbílaeiganda í húsfélaginu og útbýr reikninga mánaðarlega. Kostnaðurinn færist síðan beint á húsgjaldareikning viðkomandi notanda, þar sem húsfélagið er í þjónustu hjá Eignaumsjón, og án álags á raforkunotkun bíleigenda, öfugt við það sem algengt er hjá innheimtuaðilum sem eru með „opin kerfi“.
Njóta líka afsláttarkjara á rafmagni
„Við njótum þess líka að fá afslátt á þeim kjörum sem Eignaumsjón hefur á kaupum á rafmagni og er þetta þá mjög þægilegt í alla staði,“ segir Jón og bætir við að reksturinn sé nú kominn á gott skrið. Jafnframt liggi fyrir áætlun samkvæmt úttektinni um framtíðarþörf á hleðslustöðvum fyrir húsfélagið, sem fylgt verði eftir á komandi árum.
