Fyrstu aðalfundirnir hjá húsfélögum í þjónustu hjá Eignaumsjón hefjast á mánudaginn í næstu viku, 10. janúar 2022. Alls er áætlað að halda hátt í 600 aðalfundi og húsfundi á vegum félagsins næstu fjóra mánuðina, enda skal aðalfundum húsfélaga vera lokið lögum samkvæmt fyrir apríllok ár hvert.
Aðalfundirnir verða að öllu jöfnu haldnir í fundarsölum Eignaumsjónar að Suðurlandsbraut 30, frá mánudegi til fimmtudags. Samkvæmt fyrirliggjandi áætlun á að halda 512 aðalfundi og 48 húsfundi/aðra fundi á 60 fundardögum fram til aprílloka. Fyrirkomulag funda verður með svipuðu sniði og í fyrra og gildandi sóttvarnarreglum fylgt um fjarlægðarmörk, grímunotkun og sprittun.
Allt að 50 gestir mega vera á „sitjandi viðburðum“
Samkvæmt gildandi fjöldatakmörkunum vegna COVID-19 mega vera allt að 50 gestir á sitjandi viðburðum, sem aðalfundir húsfélaga falla undir, að uppfylltum þessum skilyrðum:
- Allir gestir séu sitjandi og ekki andspænis hver öðrum.
- Viðhöfð sé eins metra nálægðartakmörkun milli ótengdra gesta.
- Allir gestir noti andlitsgrímu.
- Ekki séu seldar áfengisveitingar fyrir viðburð, á meðan hann stendur yfir og eftir að honum lýkur.
- Gestir skulu halda kyrru fyrir í sætum sínum, sé þess kostur, ef hlé er gert á viðburði.
Boðun aðalfunda
Boðun aðalfunda fer fram með eins góðum fyrirvara og hægt er samkvæmt ramma fjöleignarhúsalaganna og í samráði við stjórnir viðkomandi húsfélaga. Allir eigendur, sem hafa skráð sig með tölvupósti í Húsbók húsfélagsins, fá sent rafrænt fundarboð/tölvupóst. Hvetjum við alla sem hafa ekki nú þegar virkjað Húsbókina sína til að gera það á heimasíðu Eignaumsjónar. Fundarboð eru send í bréfpósti á þá eigendur sem eru með skráð lögheimili utan viðkomandi húseignar og formenn húsfélaga hengja einnig upp fundarboð í sameign.
Fimm góðir fundarsalir í boði hjá Eignaumsjón
Fundaraðstaðan á skrifstofu Eignaumsjónar samanstendur af fimm vel búnum fundarsölum þar sem sóttvarna er gætt í hvívetna. Um er að ræða einn 7-9 manna fundarsal (Múli), tvo allt að 40 manna fundarsali (Dalur og Reykjaborg) og tvo allt að 50 manna fundarsali (Laugarás og Grensás). Í þeim tilvikum þegar fundir eru haldnir utan skrifstofu Eignaumsjónar er notast við ýmsa fundarsali, í samráði við stjórnir viðkomandi húsfélaga.
Recent Comments