Fyrstu aðalfundir ársins hjá húsfélögum í þjónustu hjá Eignaumsjón verða haldnir í þessari viku en boðun aðalfunda hjá minni húsfélögum hófst eftir að samkomubann sóttvarnaryfirvalda vegna COVID-19 var rýmkað í liðinni viku. Þrír fundir verða haldnir á morgun, fimmtudag og í næstu viku er á fjórða tug funda á dagskrá hjá Eignaumsjón. Þá hefur verið unnið að úrbótum á fundarsölum og vonir standa líka til að rafrænir húsfundir verði lögleiddir innan tíðar.
Til að byrja með er fyrst og fremst horft til þess að halda aðalfundi húsfélaga sem rúmast innan núgildandi reglna um allt að 20 manna samkomur. Fyrirkomulag fundanna verður með sama sniði og í fyrra. Þeir verða að öllu jöfnu haldnir í fundarsölum Eignaumsjónar að Suðurlandsbraut 30, frá mánudegi til fimmtudags, með hefðbundnum varúðarráðstöfunum (2ja metra regla, grímunotkun og sprittun).
Tveir nýir fundarsalir
Til að geta boðið upp á sem besta fundaraðstöðu á skrifstofu Eignaumsjónar er verið að útbúa tvo góða fundarsali, til viðbótar við þá sali sem eru þegar til staðar þar. Nýju salirnir eru á jarðhæð í austurenda hússins á Suðurlandsbraut 30. Gengið er beint inn í báða salina um dyr á norðurhliðinni og snúa út að Suðurlandsbrautinni. Salirnir tveir, sem fengið hafa nöfnin Grensás og Laugarás, verða töluvert rýmri en þeir salir sem fyrir eru og ættu því að nýtast vel fyrir fundarhöld sem eru fram undan.
Styttist væntanlega í að rafrænir húsfundir verði lögleiddir
Fjarfundarbúnaði verður líka komið upp í nýju fundarsölunum þar sem útlit er fyrir að innan skamms verði lagðar fyrir Alþingi tillögur um breytingar á lögum um fjöleignarhús og snúa þær að rafrænum húsfundum. Slíkir fundir eru ekki löglegir í dag en nái þessar lagabreytingar fram að ganga verður heimilt að halda hús- og aðalfundi með bæði blönduðum hætti, þ.e. fundargestir geta tekið þátt með rafrænum hætti eða mætt á fundarstað, eða alfarið rafræna fundi, geri húsfélög um það gildandi samþykktir. Væntingar eru um að breytingartillögurnar fái hraða framgöngu á þingi, þannig að hægt verði að byrja að halda rafræna aðlafundi húsfélaga sem fyrst á þessu ári og tryggja vonandi þannig að ljúka megi fundum innan lögbundins tímaramma, sem miðast við apríllok ár hvert.
Recent Comments