Sep 7, 2026 | Fréttir
Húsbók Eignaumsjónar hefur verið hluti af þjónustu fyrirtækisins við eigendur og stjórnir húsfélaga frá árinu 2020. Hún hefur nú verið uppfærð með ýmsum nýjum möguleikum, einkum fyrir stjórnir húsfélaga.
„Við kynntum Húsbókina til sögunnar árið 2020 með það að markmiði að gera eigendum og stjórnum húsfélaga auðveldara að nálgast upplýsingar um húsfélagið sitt” segir Gunnþór S. Jónsson, forstöðumann þjónustusviðs Eignaumsjónar, um tilurð Húsbókarinnar.
“Við vildum færa upplýsingarnar nær notendum og skapa einn sameiginlegan aðgangsstað þar sem hægt væri að nálgast gögn og upplýsingar um húsfélagið á einfaldan og öruggan hátt. Síðan þá hefur Húsbókin þróast töluvert og við höfum smám saman bætt við nýjum upplýsingum og möguleikum.“
Áhersla á að bæta frekar upplýsingagjöf til stjórna
„Húsbókin er fyrst og fremst upplýsingavefur fyrir eigendur og stjórnir. Eigendur geta þar nálgast upplýsingar og gögn sem tengjast sínu húsfélagi, en stjórnir hafa jafnframt aðgang að ítarlegri upplýsingum sem tengjast stjórnun og rekstri,” segir Gunnþór. Hann bætir við að áhersla er lögð á að Húsbókin sé ekki bara geymslustaður fyrir gögn heldur gagnlegt verkfæri sem auðveldar fólki að finna þær upplýsingar sem það þarf.
“Í uppfærslunni núna var lögð áhersla á að bæta aðgengi stjórna að upplýsingum um fjármál og önnur gögn húsfélagsins. Helstu nýjungarnar fela í sér skýrari aðgreiningu á fjármálaupplýsingum frá öðrum gögnum húsfélagsins til að gera aðgang stjórna bæði skýrari og einfaldari. Meðal annars hefur flipanum „Stjórnargögn“ verið skipt upp í annars vegar „Stjórn – fjármál“ og hins vegar „Stjórn – gögn“.
Dagleg uppfærsla á stöðu bankareikninga
„Stjórnir geta nú svo til í rauntíma fylgst með stöðu bankareikninga húsfélagsins, sem uppfærast sjálfkrafa daglega. Einnig er hægt að skoða hvern bankareikning fyrir sig og sjá hreyfingar á reikningnum. Stjórnir geta líka skoðað kröfur á húsfélagið, bæði greiddar og ógreiddar, og nálgast reikninga, viðhengi og samþykktir sem tengjast greiddum kröfum,” bætir Gunnþór við og áréttar að þessar nýjungar veiti stjórnum einfaldlega betri yfirsýn yfir fjármál húsfélaga og auðveldi stjórnum að nálgast þær upplýsingar sem þær þurfa.“
Betri aðgangur að eigandalista og húsfélagsyfirlýsingum
„Undir flipanum “Stjórn-gögn” geta stjórnir nú meðal annars nálgast upplýsingar Eignaumsjónar um eigendur í húsfélaginu. Stjórnir geta nú líka sjálfar uppfært eigendalistann í Húsbókinni, ” segir Gunnþór.
“Við höfum líka gert húsfélagsyfirlýsingar aðgengilegri. Eignaumsjón útbýr slíkar yfirlýsingar meðal annars við sölu eigna og nú eru allar útgefnar húsfélagsyfirlýsingar aðgengilegar stjórn á einum stað í Húsbókinni. Þar koma fram upplýsingar um greiðslustöðu hússjóðs, væntanlegar framkvæmdir og fleira.“
Húsbókin – upplýsingar þegar þeirra er þörf
Húsbókin er ekki bara staður þar sem upplýsingar eru geymdar – hún er leið Eignaumsjónar til að gera upplýsingar aðgengilegri og þjónustuna betri. “Tölfræði, sem sýnir notkun Húsbókarinnar í hverju félagi, er því áhugaverð nýjung sem við höfum mikinn áhuga á. Þar er meðal annars hægt að sjá fjölda heimsókna og notenda á tilteknu tímabili og hvaða síður og efnisþættir eru mest skoðaðir,” segir Gunnþór og áréttar að Húsbókin er verkefni sem lýkur í raun aldrei.
“Við teljum að gott aðgengi að upplýsingum sé mikilvægur þáttur í góðri þjónustu við húsfélög. Stjórnir eru að sinna mikilvægu hlutverki og þurfa oft að taka ákvarðanir sem byggja á upplýsingum um fjármál, eigendur, framkvæmdir og rekstur húsfélagsins. Þá skiptir máli að upplýsingarnar séu aðgengilegar þegar þeirra er þörf.
Húsbókin á að einfalda þetta – bæði fyrir stjórnir og eigendur. Með nýju tölfræðinni fáum við líka betri upplýsingar um hvernig Húsbókin er notuð og það mun hjálpa okkur að taka næstu skref,” segir Gunnþór S. Jónsson, forstöðumaður þjónustusviðs Eignaumsjónar að lokum.
Sjá nánar um Húsbók Eignaumsjónar
Sjá nánar um nýjungar í Húsbókinni
Sep 3, 2026 | Fréttir, Greinar
Nýleg niðurstaða Úrskurðarnefndar í vátryggingarmálum undirstrikar mikilvægi þess að upplýsingar um stöðu húsfélaga við sölu eignar séu réttar, tæmandi og unnar af kostgæfni.
Þegar íbúð eða atvinnuhúsnæði í fjöleignarhúsi er sett á sölu skal lögum samkvæmt liggja fyrir yfirlýsing frá húsfélaginu, þar sem veittar eru fullnægjandi og tæmandi upplýsingar um yfirstandandi eða fyrirhugaðar framkvæmdir, viðgerðir eða endurbætur sem samþykktar hafa verið. Þar á einnig að koma fram fjárhagsstaða húsfélagsins og fjárhagsstaða einstakra eignarhluta gagnvart húsfélaginu.
Ábyrgð fylgir útgáfu húsfélagsyfirlýsinga
Yfirlýsing húsfélags kann að virðast einfalt skjal en nýlegur úrskurður sýnir að upplýsingar sem þar koma fram hafa verulega þýðingu fyrir kaupanda og að ábyrgð fylgir því að þeirra sé aflað og að þær séu réttar.
Í úrskurði sínum komst úrskurðarnefndin að þeirri niðurstöðu að fasteignasali hefði ekki uppfyllt skyldu sína um upplýsingaöflun, um yfirstandandi eða fyrirhugaðar framkvæmdir, í tengslum við sölu íbúðar í umræddu fjöleignarhúsi. Húsfélagsyfirlýsing, sem lögð var fram við söluna, var einungis undirrituð af seljanda og taldi nefndin að hún uppfyllti ekki þær kröfur sem lög gera til slíkra yfirlýsinga.
Niðurstaða úrskurðarnefndarinnar var sú að fasteignasalinn hefði af gáleysi veitt rangar eða ófullnægjandi upplýsingar í bæði söluyfirliti og húsfélagsyfirlýsingu og bæri ábyrgð á því gagnvart kaupanda. Eigandinn ætti því rétt á bótum úr starfsábyrgðartryggingu fasteignasalans.
Húsfélagsyfirlýsing er ekki formsatriði
Þessi úrskurður er áminning um að húsfélagsyfirlýsing er ekki bara formsatriði. Hún er mikilvægur hluti þeirra upplýsinga sem kaupandi byggir ákvörðun sína á. Í þessu tiltekna máli lá meðal annars fyrir að framkvæmdir hefðu átt sér stað á eigninni eftir að söluyfirlit var gert. Úrskurðarnefndin taldi að fasteignasalanum hefði borið að uppfæra söluyfirlitið. Jafnframt var talið að húsfélagsyfirlýsingin hefði ekki uppfyllt þær kröfur sem gerðar eru til hennar.
Þetta undirstrikar mikilvægi þess að upplýsingar séu ekki aðeins settar á blað heldur að þeirra sé aflað með markvissum hætti, þær sannreyndar og gengið úr skugga um að þær gefi sem réttasta mynd af stöðu húsfélagsins.
Vönduð húsfélagsyfirlýsing krefst vinnu
Hjá Eignaumsjón lítum við á gerð húsfélagsyfirlýsinga sem ábyrgðarverkefni. Til þess að hægt sé að gefa út trausta yfirlýsingu þarf meðal annars að afla upplýsinga úr gögnum húsfélagsins, skoða stöðu framkvæmda og samþykktra verkefna, fara yfir fjárhagslega stöðu og tryggja að upplýsingarnar sem fram koma séu eins réttar og kostur er þegar yfirlýsingin er gefin út.
Þetta er því ekki einfalt afgreiðsluverkefni þar sem nægir að fylla út eyðublað. Vanda þarf til verka og gæta þess að upplýsingarnar sem veittar eru séu traustar og gagnlegar fyrir þá sem þurfa að reiða sig á þær. Það er einmitt sú vinna sem liggur að baki þjónustu Eignaumsjónar þegar húsfélagsyfirlýsingar eru unnar og afgreiddar.
Réttar upplýsingar skipta máli
Niðurstaða Úrskurðarnefndar í vátryggingarmálum í umræddu máli sýnir að útgáfa yfirlýsinga húsfélaga er ekki bara spurning um góða þjónustu heldur snýst hún einnig um ábyrgð og mögulega fjárhagslega hagsmuni.
Fyrir húsfélagið og eigendur þess er mikilvægt að vandað sé til verka þegar slíkar upplýsingar eru veittar og fyrir kaupanda geta þessar upplýsingar haft áhrif á ákvörðun um kaup, kaupverð og fjárhagslegar skuldbindingar sem fylgja eigninni.
Sjá hér úrskurð Úrskurðarnefndar í vátryggingarmálum – mál nr. 152/2026 og frétt DV um úrskurðinn.
Jul 21, 2026 | Fréttir
Skýrari ábyrgð, einfaldari ákvarðanataka og betri undirbúningur viðhalds eru meðal ástæðna fyrir því eigendur í eldri fjölbýlishúsum kjósa að sameina stigahúsfélög í deildaskipt heildarhúsfélag.
Á síðustu árum hefur orðið vart við þróun þar sem eigendur í eldri fjölbýlishúsum sameina rekstur og stjórnun í áður sjálfstæðum stigahúsfélögum í eitt deildaskipt húsfélag, samkvæmt 76. gr. fjöleignarhúsalaga. Markmiðið er að einfalda stjórnun, styrkja rekstur húsfélagsins og auðvelda ákvarðanatöku um viðhald þeirra hluta hússins sem allir eigendur bera sameiginlega ábyrgð á.
Viðhald krefst sameiginlegra ákvarðana
„Við sjáum sífellt fleiri húsfélög átta sig á því að það er bæði hagkvæmara og skilvirkara að reka húsið sem eina heild þegar um er að ræða sameiginlega byggingu með sameiginlegu þaki, burðarvirki og lagnakerfum,“ segir Hallur Guðjónsson, sölumaður og ráðgjafi hjá Eignaumsjón.
Viðhaldsþörf eldri fjölbýlishúsa hefur aukist verulega á síðustu árum. Mörg hús standa frammi fyrir kostnaðarsömum framkvæmdum á borð við endurnýjun þaka, múrviðgerðir, gluggaskipti, frárennslislagnir og endurbætur á ytra byrði.
Þegar stigagangar starfa sem sjálfstæð húsfélög getur það flækt ákvörðunarferlið, þar sem fleiri húsfélög þurfa að samþykkja sömu framkvæmdina.
„Við höfum séð dæmi um að nauðsynlegar framkvæmdir dragist allt of lengi vegna þess að stigagangar ná ekki saman um framkvæmdir eða tímasetningar þeirra. Með sameinuðu deildaskiptu húsfélagi verður stjórnsýslan einfaldari og ábyrgðin skýrari,“ segir Hallur.
Deildaskipt húsfélag skapar sveigjanleika
Í 76. gr. fjöleignarhúsalaga er kveðið á um heimild til að stofna deildaskipt húsfélag. Slíkt fyrirkomulag gerir eigendum kleift að reka húsið sem eina heild um sameiginlega hagsmuni, en halda jafnframt utan um sérmálefni einstakra stigaganga eða húshluta þegar það á við. Hallur segir að margir eigendur hafi áður talið að sameining þýddi að allir kostnaðarliðir yrðu sameiginlegir.
„Það er algengur misskilningur. Deildaskipt húsfélag gerir einmitt ráð fyrir því að kostnaði sé áfram skipt eftir því sem lög, eignaskiptayfirlýsing og eðli framkvæmdarinnar segja til um. Það sem breytist er fyrst og fremst stjórnskipulagið og samhæfingin.“
Hagkvæmari rekstur til framtíðar
Að sögn Halls getur sameining einnig skilað lægri rekstrarkostnaði. Eitt húsfélag annast bókhald, fundarhöld, samninga, tryggingar og samskipti við verktaka í stað þess að stigagangafélögin sinni sömu verkefnum hvert fyrir sig.
„Þegar eigendur hússins tala einum rómi verður auðveldara að bjóða út framkvæmdir, semja við verktaka, skipuleggja langtímaviðhald og sameinast í öflun ýmiskonar þjónustu, s.s. þrifum. snjómokstri o.fl. Það á að skila sér í hagkvæmari rekstri og meiri fyrirsjáanleika fyrir eigendur.“
Aukinn áhugi meðal eigenda eldri fjölbýlishúsa
Hallur telur að þessi þróunin muni halda áfram á næstu árum, ekki síst vegna þess að stór hluti íslenskra fjölbýlishúsa sé kominn á þann aldur að umfangsmikið viðhald sé óhjákvæmilegt.
„Við verðum vör við aukinn áhuga hjá húsfélögum sem vilja skoða þetta, sértaklega áður en farið er í stórar framkvæmdir. Eigendur vilja hafa skýrt skipulag, góða yfirsýn og tryggja rétta kostnaðarskiptingu. Þar getur sameinað deildaskipt heildarhúsfélag verið lykilþáttur,“ segir Hallur, en leggur áherslu á að meta aðstæður sérstaklega í hverju tilfelli og fá faglega ráðgjöf áður en ráðist er í að breyta skipulagi húsfélagsins.
Jul 17, 2026 | Fréttir, Greinar
Uppbygging á Heklureitnum við Laugaveg í Reykjavík gengur vel og tvö fyrstu húsin þar eru þegar farin að setja svip sinn á umhverfið. Fyrstu íbúarnir fluttu inn í hornhúsið á Laugavegi 168 haustið 2025 og deildarskipt heildarhúsfélag tók til starfa þar í ársbyrjun 2026.
Framkvæmdir við Laugaveg 168, átta hæða byggingu á horni Nóatúns og Laugavegar, hófust árið 2023 og eru nú langt komnar. Í húsinu eru 82 íbúðir af öllum stærðum og gerðum og eitt stórt atvinnubil á jarðhæð fyrir verslun og þjónustu, ásamt bílakjallara.
Fjölbreyttar íbúðir og sameiginleg rými
Þegar er búið að selja yfir 80% íbúðanna á Laugavegi 168, en þær henta bæði einstaklingum og fjölskyldum. Gott útsýni er frá húsinu til norðurs en skjólsælt til suðurs þar sem húsið stallast niður í tvær hæðir við Brautarholt. Sameiginlegur inngarður og þakgarður eru í húsinu og einkaþakgarðar fylgja jafnframt sumum íbúðum á efri hæðum.
Markmiðið að móta gott og farsælt samfélag
Húsfélagið Laugavegur 168 tók til starfa um síðustu áramót undir stjórn byggingaraðilans, sem er algeng nálgun hjá Eignaumsjón til að tryggja að starfsemin komist vel af stað áður en eigendur/ íbúar taka við rekstrinum.
„Við vorum í góðum samskiptum við byggingaraðilann um undirbúning samþykkta og útfærslu stofnunar húsfélagsins, með það að markmiði að móta bæði gott og farsælt samfélag þarna við Laugaveginn,“ segir Páll Þór Ármann, sem um árabil hefur annast stofnun og innleiðingu nýrra húsfélaga hjá Eignaumsjón.
Á aðalfundi húsfélagsins, sem haldinn var nýlega, tóku eigendur við stjórn húsfélagsins af byggingaraðilanum. Á þeim fundi var staðfest að Eignaumsjón annist áfram daglegan rekstur og umsýslu félagsins, skv. þjónustuleið Þ-2, sem heldur utan um fjármála-, bókhalds- og fundaþjónustu fyrir húsfélagið. Jafnframt var samþykkt að taka tilboði í Húsumsjón, sérþjónustu hjá Eignaumsjón sem felur í sér reglubundið eftirlit og umsjón með sameign húsfélagsins.
Framkvæmdir við Laugaveg 170
Bygging sjö hæða húss á Laugavegi 170 er einnig vel á veg komin. Þar verða 100 íbúðir, bílakjallari og fjögur atvinnubil. Íbúðirnar á Laugavegi 170 eru komnar í sölu og er þegar búið að selja hátt í helming þeirra.
Stofnun húsfélags fyrir Laugaveg 170 er í undirbúningi hjá Eignaumsjón með byggingaraðilanum, með sama hætti og gert var fyrir Laugaveg 168, þannig að starfsemi húsfélagsins geti farið sem þægilegast af stað fyrir bæði byggingaraðilann og eigendur.
Næstu áfangar á Heklureitnum
Samkvæmt gildandi deiliskipulagi er alls áætlað að byggja um 440 íbúðir í fimm húsum á Heklureitnum. Tímasetning næstu áfanga á svæðinu ræðst m.a. af því hvenær Bílaumboðið Hekla flytur starfsemi sína endanlega af reitnum. Framkvæmdafélagið Laugavegur ehf. annast uppbyggingu á Heklureitnum. Sjá nánar á https://heklureitur.is/
Jul 9, 2026 | Fréttir
Stærri og flóknari fjöleignarhúsum hefur fjölgað umtalsvert á undanförnum árum. Í slíkum húsum, þar sem íbúðar- og atvinnuhúsnæði, bílastæði, bílakjallarar og sameiginlegar lóðir mynda eina heild, er sífellt algengara að reka húsfélagið sem eitt deildaskipt heildarfélag, samkvæmt 76. gr. laga um fjöleignarhús.
„Með því að reka þessi stóru fjöleignarhús sem eina heild er hægt að tryggja skilvirkari og hagkvæmari rekstur. Í deildaskiptu heildarhúsfélagi heldur hver húsfélagsdeild áfram utan um sín innri málefni, en sameiginlegur rekstur og viðhald eru skipulögð á vettvangi heildarfélagsins. Það einfaldar stjórnunina og skapar betri yfirsýn,“ segir Páll Þór Ármann, sérfræðingur hjá Eignaumsjón og bætir við að þessi nálgun hjá félaginu sé fyrst og fremst svar við auknum flækjum í rekstri nútímafjöleignarhúsa.
Skýrari ábyrgð á sameiginlegum eignum
Einn helsti ávinningurinn felst í því að sameiginleg málefni fá aukið vægi. Viðhald utanhúss, framkvæmdir á sameign og langtímaáætlanir verða markvissari þegar fasteignin er rekin sem ein heild í stað þess að ábyrgðin dreifist á mörg smærri húsfélög. Páll segir að reynslan sýni að verkefni sem áður hafi setið á hakanum fái meiri athygli þegar eigendur sameinast um reksturinn.
„Við sjáum að stjórnir eiga auðveldara með að taka sameiginlegar ákvarðanir um stærri verkefni og nýta fjármuni húsfélagsins þar sem mest þörf er á þeim.“
Hver greiðir sinn hlut – hvorki meira né minna
Þótt reksturinn sé sameiginlegur er kostnaði ekki blandað saman. Þvert á móti byggir fyrirkomulagið á nákvæmri kostnaðarskiptingu þar sem hver húsfélagsdeild og hver eign greiðir aðeins þann kostnað sem henni ber. Í stað margra aðskilinna ársreikninga er gerður einn ársreikningur fyrir heildarhúsfélagið, en jafnframt eru unnin ítarleg uppgjör fyrir hverja húsfélagsdeild og eign. Þannig helst bæði yfirsýn og gagnsæi í rekstrinum.
„Á hverju ári er unnið rekstraruppgjör þar sem raunkostnaður er gerður upp fyrir hverja deild og síðan skipt niður á einstakar eignir samkvæmt eignarhlutföllum og eðli kostnaðarins. Það tryggir að eigendur í einum stigagangi greiða ekki kostnað sem tilheyrir öðrum stigagangi eða annarri deild.“
Öflug bókhalds- og verkstjórnunarkerfi gera starfsfólki Eignaumsjónar kleift að halda utan um flóknar kostnaðarskiptingar, framkvæmdir og samskipti við stjórnir með skilvirkum hætti.
„Forsendan fyrir því að reka stór deildaskipt húsfélög er að bókhaldið sé nákvæmt og rekjanlegt og okkar sérsmíðuðu tölvukerfi gera okkur kleift að fylgja öllum fjárhagsfærslum eftir og tryggja að uppgjör standist upp á krónu,“ bætir Páll við.
Fjárhagsleg hagkvæmni
Sameiginlegur rekstur skapar einnig fjárhagslegan ávinning. Þegar fleiri eignarhlutar standa saman verður auðveldara að bjóða út rekstrarþjónustu og viðhaldsverkefni, sem getur leitt til hagstæðari samninga og lægri kostnaðar.
„Stærð rekstrarins skiptir líka máli. Húsfélögin hafa sterkari samningsstöðu gagnvart verktökum og þjónustuaðilum í krafti fjöldans og það skilar sér að lokum í betri nýtingu sameiginlegra fjármuna eigenda.“
Einfaldara stjórnskipulag
Sífellt erfiðara er að fá eigendur til stjórnarstarfa í húsfélögum, en að sögn Páls getur deildaskipt heildarhúsfélag einfaldað það fyrirkomulag verulega.
„Þetta fyrirkomulag dregur úr tvíverknaði og auðveldar eigendum að vinna saman að sameiginlegum verkefnum án þess að missa sjónar á sérhagsmunum einstakra deilda. Í stað þess að margar stjórnir starfi sjálfstætt, situr fulltrúi frá hverri húsfélagsdeild í stjórn heildarfélagsins og þannig eiga allar deildir rödd við borðið, en ákvarðanataka verður einfaldari og ábyrgð skýrari.“
Þróun sem er líklegt að haldi áfram
Fátt bendir til annars en að deildaskiptur rekstur húsfélaga verði sífellt algengari á næstu árum. Nýjar fasteignasamstæður séu bæði stærri og flóknari en áður og eigendur geri jafnframt auknar kröfur um faglegan rekstur, gagnsæi og hagkvæmni.
„Þegar upp er staðið snýst þetta um að reka sameiginlegar eignir á sem hagkvæmastan og faglegastan hátt. Reynslan sýnir að deildaskipt heildarhúsfélög geta bæði styrkt reksturinn og aukið samstarf eigenda til lengri tíma,“ segir Páll Þór Ármann, sérfræðingur hjá Eignaumsjón að lokum.
