Eignaumsjón | Eignaumsjon

Sigurborg ráðin í starf aðalbókara hjá Eignaumsjón

Jun 27, 2024 | Fréttir

Sigurborg Sólveig Guðmundsdóttir hefur verið ráðin aðalbókari hjá Eignaumsjón og hefur hún þegar tekið til starfa hjá félaginu.

Sigurborg er viðskiptafræðingur að mennt, með Cand. Oecon próf frá Háskóla Íslands með áherslu á reikningsskil og endurskoðun. Hún hefur einnig lokið námi sem leikskólakennari frá Fósturskóla Íslands og er með stúdentspróf af hagfræðibraut frá Verzlunarskóla Íslands. Sigurborg var fjármálastjóri hjá Hreinsitækni ehf. í fimm ár, áður en hún kom til starfa hjá Eignaumsjón. Þar áður starfaði hún m.a. á Endurskoðunarsviði Deloitte í níu ár, fyrst og fremst við gerð og endurskoðun ársreikninga fyrirtækja.

Sem aðalbókari ber Sigurborg ábyrgð á gæðum bókhalds og framkvæmd rekstraruppgjöra, ásamt gerð og yfirferð ársreikninga viðskiptavina Eignaumsjónar. Hún ber enn fremur ábyrgð á skipulagningu og vinnu teyma á fjármálasviði, annast eftirfylgni með árangri og útgáfu reikninga fyrir Eignaumsjón. Aðalbókari tekur einnig þátt í þróun upplýsingakerfa fyrirtækisins og verkferla og er m.a. í mikilvægu hlutverki við þróun og innleiðingu á nýju bókhalds- og uppgjörskerfi Eignaumsjónar.

Um Eignaumsjón

Eignaumsjón býr að 23 ára þekkingu og reynslu í þjónustu við húsfélög og rekstrarfélög atvinnuhúsnæðis. Félagið þjónar um 900 hús- og rekstrarfélögum með yfir 20.000 íbúðum/eignum og starfsmenn eru 42 talsins. Áhersla er lögð á hlutlausa nálgun, öryggi, gæðamál og skýra verkferla með það að markmiði að gera rekstur fasteigna markvissari og ódýrari, auka upplýsingaflæði til eigenda og auðvelda störf stjórna.

Eignaumsjón tekur við starfsemi Fjöleigna

Jun 26, 2024 | Fréttir

Flokka byggingarúrgang og búa til moltu á byggingarstað

Jun 14, 2024 | Fréttir

Við Áshamar 42-48 í Hamraneshverfinu í Hafnarfirði hefur Eignaumsjón nýlega stofnað deildaskipt heildarhúsfélag þar sem verða alls 79 íbúðir og eitt atvinnubil í fjórum byggingum á sameiginlegum bílakjallara. Þar eru 60 bílastæði og geta íbúar leigt stæði en einnig fylgja stæði nokkrum stærri íbúðum. Þegar er búið að afhenda hátt í fimmtu íbúðir í Áshamri 44 og 46 og er starfsemi húsfélagsins hafin fyrir þær deildir. Þá er gert ráð fyrir að íbúðir í Áshamri 48 verði afhentar í haust og í Áshamri 42 í lok ársins.

Það er byggingarfélagið Hamravellir ehf. sem er lóðarhafi og annast framkvæmdir við Áshamar 42-48. Félagið er í eigu fyrirtækjanna Verklands ehf., sem er aðalverktaki framkvæmda og Trefja ehf. Í stjórn eru smiðirnir Ingi Ljóts og Gísli Johnsen, eigendur Verklands og bræðrunum Óskar og Þröstur Auðunssynir, eigendur Trefja.

Svansvottaðar byggingar

„Við leggjum áherslu á að skila byggingum í hæsta gæðaflokki og setjum jafnframt öryggi starfsfólks og umgengni á byggingarstað í fyrsta sæti,“ sagði Ingi, þegar að sölumenn Eignaumsjónar skoðuðu framkvæmdasvæðið á dögunum í tengslum við stofnun húsfélagsins. Byggingarnar eru í Svansvottunarferli og við hönnun þeirra var m.a. horft til þess að lágmarka orkunotkun og tryggja góða hljóðvist og hagkvæma nýtingu dagsbirtu.

Markviss flokkun og förgun

„Svansvottunarferlið kallar líka á markvissa minnkun umhverfisáhrifa af framkvæmdunum, með áherslu á hringrásarhagkerfið og flokkun úrgangs,“ sagði Þröstur. Því var komið upp flokkunaraðstöðu í sameiginlegum bílakjallara bygginganna þar sem afgangar af byggingarefni hafa verið flokkaðir jöfnum höndum, s.s. allskonar tegundir af plasti, umbúðir utan af innréttingum og eldhústækjum o.fl.

„Flokkunarhlutfallið á verktímanum er á bilinu 98-99%, sem er mjög góður árangur að okkar mati,“ sagði Ingi og Þröstur bætti við að vissulega tæki þetta tíma og kallaði á töluverða vinnu. „Á móti hafa sparast umtalsverðir fjármunir og við gátum t.d. fækkað gámum fyrir blandaðan úrgang hér á byggingarstaðnum úr sex gámum niður í tvo, með tilheyrandi sparnaði í losunarkostnaði.“

Búa líka til moltu

En þar með er ekki öll sagan sögð, því í bílakjallaranum er einnig búin til molta. „Það fellur til umtalsvert magn af lífrænum úrgangi hér á vinnusvæðinu, ekki síst matarleifar frá starfsfólkinu okkar og fleira. Því gripum við til þess ráðs að koma okkur upp búnaði til moltugerðar, sem við notum svo hér á lóðinni í blómabeð og fleira,“ sagði Ingi að lokum.

Þjónusta Eignaumsjónar

Húsfélagið Áshamar 42-48 er í þjónustuleið Þ-2 hjá Eignaumsjón, sem felur í sér umsjón með fjármálum, bókhaldi og gerð ársreiknings, ásamt undirbúningi og framkvæmd aðalfundar. Húsfélagið nýtir sér einnig Húsumsjón Eignaumsjónar, sem felur í sér reglubundna umsjón með sameign húsfélagsins þannig að ásýnd viðkomandi fasteignar verði ávallt eins og best er á kosið.

Eignaumsjón með starfsstöð á Akureyri

Jun 4, 2024 | Fréttir

Fyrsta starfsstöð Eignaumsjónar utan Reykjavíkur hefur verið opnuð á Akureyri en fyrirtækið hefur umsjón með daglegum rekstri rúmlega 900 fjöleignarhúsa víðs vegar um landið með yfir 20 þúsund fasteignum.

„Við erum til húsa á annarri hæð á Glerárgötu 24, beint á móti Greifanum,“ segir Halla Mjöll Stefánsdóttir ráðgjafi hjá Eignaumsjón, sem er í forsvari fyrir starfsstöðinni á Akureyri.

Yfir 20 ára þekking og reynsla

„Eignaumsjón býr að 23 ára þekkingu og reynslu í rekstri fasteigna og þjónustu við húsfélög, leigufélög og rekstrarfélög atvinnuhúsnæðis. Ég hef unnið hjá fyrirtækinu í um sex ár, fyrst í Reykjavík sem þjónustufulltrúi og ráðgjafi á þjónustusviði og hóf störf á Akureyri í desember 2023. Ég sinni verkefnum sem snúa að þjónustu okkar á Akureyri og norðausturhorni landsins, samhliða öðrum daglegum störfum hjá Eignaumsjón þar sem ég er í ráðgjafa- og fundateymi fyrirtækisins.“

Staðarþekking er mikilvæg

„Mjór er mikils vísir segir máltækið og vonandi að það gangi eftir um starfsstöð okkar á Akureyri,“ segir Daníel Árnason, framkvæmdastjóri Eignaumsjónar.

„Það hefur blundað í okkur í nokkur ár, með auknum vexti og fjölgun fjölbýlishúsa á landsbyggðinni, að taka þetta skref. Akureyri, sem stækkar jafnt og þétt, er spennandi svæði fyrir húsfélagaþjónustu og staðarþekking og meiri nánd við viðskiptavini er ávallt af hinu góða. Þegar Halla flutti til Akureyrar eftir barneignarleyfi með kærastanum sínum, þaðan sem hann er, ákváðum við að taka stökkið!“ bætir Daníel við.

„Með tilkomu starfsstöðvarinnar eigum við nú t.d. mun auðveldara með að hafa bæði umsjón með fundum hús- og rekstrarfélaga á Akureyri og víðar á Norður- og Austurlandi og útvega fundaraðstöðu, jafnframt því sem við getum líka sinnt allri annarri þjónustu við viðskiptavini þar á markvissari og persónulegri hátt.“

Halla er í daglegum samskiptum í fjarvinnu við bæði viðskiptavini og samstarfsfólk sitt fyrir sunnan og fara öll síma- og tölvusamskipti fram í gegnum þjónustuver Eignaumsjónar, í síma 585-4800 og póstfangið thjonusta@eignaumsjon.is. „Fyrir norðan get ég einnig tekið á móti viðskiptavinum og öðrum gestum á skrifstofunni á Glerárgötunni eða skotist á fundi, allt eftir því hvað hentar best,“ bætir Halla við.

Um Eignaumsjón

Eignaumsjón hf. tók til starfa árið 2000 og hefur umsjón með daglegum rekstri rúmlega 900 virkra félaga með yfir 20 þúsund fasteignum. Eignaumsjón er umsvifamesta fyrirtæki landsins á þessu sviði með 42 starfsmenn. Áhersla er lögð á að mæta þörfum eigenda fasteigna í fjölbýli með faglegri og hlutlausri nálgun og skýrum verkferlum, gæta að öryggis-, persónuverndar- og gæðamálum með það að markmiði að gera rekstur húsfélaga markvissari og hagkvæmari, auka upplýsingaflæði til eigenda/leigjenda og auðvelda störf stjórna. Sjá nánar á www.eignaumsjon.is

Tæknisviði Eignaumsjónar vex fiskur um hrygg

Apr 29, 2024 | Fréttir

Nýlega var gengið frá ráðningu tveggja nýrra sérfræðinga til Eignaumsjónar og starfa nú fjórir tölvunarfræðingar hjá tæknisviði félagsins, sem komið var á laggirnar í fyrra í tengslum við skiplagsbreytingar. Með þessum ráðningum er verið að efla enn frekar tæknigetu fyrirtækisins í öryggismálum og rafrænum tæknilausnum. Tæknisviðinu er ætlað að leiða stafræna vegferð Eignaumsjónar, sem hefur það að markmiði að gera bæði starfsfólki og viðskiptavinum kleift að vinna rafrænt með öll gögn sem tengjast þjónustu og rekstri fyrirtækisins.

Sigurður Gauti Hauksson, sem hefur unnið lengi að tölvu- og tæknimálum fyrir Eignaumsjón, hefur nú verið ráðinn sviðsstjóri tæknisviðs Eignaumsjónar. Með honum kemur líka til starfa Snæbjörn Halldór Snæbjörnsson, sem mun sinna hugbúnaðarþróun. Aðrir starfsmenn tæknisviðsins eru Emil Hilmarsson, öryggis- og upplýsingatæknistjóri og Sævar Þór Sigfússon, sem annast bæði hugbúnaðargerð og tækniþjónustu.

Úr pappír í starfrænt umhverfi

„Eignaumsjón hefur unnið markvisst að því í allmörg ár að færa starfsemi sína yfir í starfrænt umhverfi,“ segir sviðsstjóri tæknisviðsins, Sigurður Gauti Hauksson. Hann bendir á að þörfin sé brýn þar sem félagið er með yfir 900 hús- og rekstrarfélög í þjónustu, með um 20 þúsund fasteignum/einingum.

„Það gefur auga leið að mikið hagræði er að geta sent yfir 20 þúsund kröfur út rafrænt í hverjum mánuði ásamt um sjöþúsund gjaldareikningum í stað þess að senda þetta allt út á pappír, með tilheyrandi prent- og sendingarkostnaði.“

Öryggi gagna, rekstur og þróun netkerfa

Efling tæknisviðs Eignaumsjónar er rökrétt skref á þeirri braut sem fyrirtækið hefur verið að feta í rekstri upplýsingakerfa sinna. Meginverkefni tæknisviðsins er annars vegar að tryggja öryggi allra gagna og hins vegar að þróa áfram netkerfi fyrirtækisins og sjá til þess að rekstur þeirra gangi snurðulaust fyrir sig.

„Svo til öll starfsemi okkar byggist orðið á tölvutækni og stefnan til framtíðar er að vinna allt rafrænt,“ segir Sigurður Gauti. Hann nefnir rafræna fundi, rafrænar undirskriftir og rafrænt greiðsluuppgjör sem dæmi um áhugaverða áfanga sem Eignaumsjón hefur náð á undanförnum misserum og árum , að ógleymdri Húsbókinni, sem tekin var í gagnið árið 2020 á 20 ára afmælisári fyrirtækisins.

„Í upphafi var töluvert mikið lagt í Húsbókina, sem er rafræn upplýsingagátt fyrir viðskiptavini, en við erum stöðugt að vinna að uppfærslum og viðbótum til að bæta enn frekar upplifun viðskiptavina okkar,“ segir sviðsstjóri tæknisviðsins og klikkir út með að næsta stóra skrefið þar sé að tryggja alrafræna afhendingu allra gagna yfir í Húsbókina.

Sigurborg ráðin í starf aðalbókara hjá Eignaumsjón

Eignaumsjón tekur við starfsemi Fjöleigna

Flokka byggingarúrgang og búa til moltu á byggingarstað

Eignaumsjón með starfsstöð á Akureyri

Tæknisviði Eignaumsjónar vex fiskur um hrygg

Recent Posts