Nýr innheimtufulltrúi hjá Eignaumsjón

Nýr innheimtufulltrúi hjá Eignaumsjón

May 5, 2021 | Fréttir

Guðbjörg Dögg Snjólfsdóttir hefur verið ráðin innheimtufulltrúi hjá fjármálasviði Eignaumsjónar og sinnir hún útsendingum á mánaðalegum húsgjöldum, sér- og framkvæmdainnheimtu, upplýsingagjöf varðandi innheimtu og fleiru.

Guðbjörg var þjónustustjóri í sex ár hjá iKort áður en hún kom til starfa hjá Eignaumsjón í febrúarlok. Áður vann hún m.a. í 11 ár sem sérfræðingur hjá Verðbréfamarkaði Íslandsbanka og Íslandsbanka og sem markaðsstjóri hjá Heilsuhóteli Íslands. Guðbjörg er með mastersgráðu í markaðsfræði og alþjóðaviðskiptum frá Háskóla Íslands og BS gráðu frá sama skóla í viðskiptafræði.

Um Eignaumsjón

Eignaumsjón býr að 20 ára þekkingu og reynslu í rekstri hús- og rekstrarfélaga fasteigna í takt við ákvæði fjöleignarhúsalaganna. Félagið er brautryðjandi á Íslandi og annast rekstur um 700 félaga með um 15.000 íbúðum/eignarhlutum, með það að markmiði að gera reksturinn bæði markvissari og hagkvæmari og auka upplýsingaflæði til bæði eigenda og hússtjórna.

Boðun aðalfunda minni húsfélaga hafin á ný hjá Eignaumsjón

Boðun aðalfunda minni húsfélaga hafin á ný hjá Eignaumsjón

Apr 16, 2021 | Fréttir

Eftir tilslakanir á samkomutakmörkunum vegna COVID-19 sem tóku gildi í gær, 15. apríl 2021, um að 20 manns megi nú koma saman er aftur byrjað að boða aðalfundi hús- og rekstrarfélaga sem falla innan þessa ramma hjá Eignaumsjón. Reglurnar gilda næstu þrjár vikur og því er ljóst að ekki verður hægt að ljúka öllum aðalfundum fyrir apríllok eins og stefnt var að.

Engar undanþágur eru núna fyrir húsfélög frá reglum um samkomutakmarkanir. Því er stefnt að því hjá Eignaumsjón næstu þrjár vikurnar að ljúka sem flestum aðalfundum hjá húsfélögum með allt að 20-25 íbúðir/eignarhluti, sem eiga enn eftir að halda aðalfund. Í byrjun maímánaðar verður svo horft til þess að skipuleggja fundarhöld í stærri húsfélögum sem eiga eftir að halda aðalfundi, að því gefnu að þá verði mögulegt að halda fjölmennari fundi.

Vonast til að ljúka öllum aðalfundum fyrir sumarfrí

„Það var búið að halda yfir 300 af alls á sjötta hundrað aðalfundum hús- og rekstrarfélaga hjá okkur þegar hert var á samkomutakmörkunum í lok mars sl. Miðað við stöðuna núna erum við að gera okkur vonir um að húsfélögin sem eftir eru geti klárað aðalfundi sína fyrir sumarfrí, að því gefnu að sjálfsögðu að auknar tilslakanir verði veittar eftir þrjár vikur og að ekkert óvænt komi upp á í millitíðinni,“ segir Páll Þór Ármann, forstöðumaður þjónustusviðs hjá Eignaumsjón.

Öll aðstaða fyrir rafræna fundi er nú til staðar hjá Eignaumsjón en ekki er enn hægt að grípa til þess úrræðis fyrir hús- og aðalfundi, þar sem fyrirhugaðar lagabreytingar á fjöleignarhúsalögunum eru enn í vinnslu. Samráðsferli um breytingarnar lauk fyrir nokkru og munu vonir standa til að málið fari fyrir Alþingi áður en þingið fer í sumarfrí.

Áfram hvatt til takmarkaðra heimsókna á skrifstofu Eignaumsjónar

Allt starfsfólk Eignaumsjónar er nú aftur með viðveru á skrifstofu félagsins á Suðurlandsbraut 30 en þar verður eftir sem áður fyllsta öryggis gætt, s.s. með aðskildum vinnusvæðum, handþvotti, sprittun og grímunotkun. Kappkostað er að fylgja í öllu þeim sóttvarnartilmælum sem yfirvöld gefa út og tryggja að dagleg starfsemi Eignaumsjónar haldist gangandi fyrir þau hús- og rekstrarfélög sem eru í þjónustu hjá félaginu.

Áfram er þess farið á leit við viðskiptavini að þeir takmarki, eins og hægt er, heimsóknir í þjónustuver og skrifstofu félagsins á meðan samkomutakmarkanir eru í gildi. Engu að síður er þó tekið á móti gögnum á skrifstofutíma en hvatt er eindregið til þess að allar almennar fyrirspurnir og samskipti fari fram með tölvupósti á netfangið thjonusta@eignaumsjon.is. Einnig má hafa samband við þjónustuverið í netspjalli á heimasíðunni, www.eignaumsjon.is, eða hringja í síma 585-4800. Enn fremur skal áréttað að viðskiptavinir geta skilað inn gögnum í póstkassa Eignaumsjónar, sem er við inngang á suðurhlið/bakhlið Suðurlandsbrautar 30.

Bjóða húsfélögum ráðgjöf um framtíðarlausnir fyrir hleðslu rafbíla

Bjóða húsfélögum ráðgjöf um framtíðarlausnir fyrir hleðslu rafbíla

Apr 7, 2021 | Fréttir

Eignaumsjón býður nú húsfélögum og rekstrarfélögum atvinnuhúsnæðis upp á hlutlausa og faglega úttekt á hleðslufyrirkomulagi rafbíla ásamt ráðgjöf um bestu framtíðarlausnir varðandi uppsetningu hleðslustöðva rafbíla, með hagkvæmni og einfaldleika að leiðarljósi.

Útfærsla á hleðslu rafbíla í fjölbýlishúsum var einfalt viðfangsefni meðan fáir rafbílar voru í umferð og unnt var að leysa málin þannig að dugði um hríð. Eftir að stjórnvöld breyttu fjöleignarhúsalögum í maí 2020, sem skyldaði húsfélög til að bregðast við óskum um að koma upp rafhleðslustöðvum, er ljóst að huga þarf betur að heildarfyrirkomulagi þessara mála með áherslu á framtíðarlausnir og réttláta skiptingu kostnaðar milli húsfélaga og einstakra notenda.

Áform stjórnvalda um að hætta innflutningi árið 2030 á fólksbifreiðum sem ganga fyrir jarðefnaeldsneyti og ný spá Eignaumsjónar um að 65% allra fólksbíla hérlendis árið 2036 verði raf- og tengiltvinnbílar, undirstrika enn frekar að tímabært er fyrir húsfélög að huga að framtíðarlausnum í þessum efnum.

Bílastuð 0 – úttektarskýrsla og framkvæmdaáætlun

„Segja má að húsfélög horfi fram á að reka lítið orkusölufyrirtæki innan húsfélagsins. Þetta er flóknara en virðist við fyrstu sýn. Til að hjálpa stjórnum húsfélaga að greina bestu rafbílahleðslukosti fyrir sitt félag bjóðum við öllum húsfélögum sem þess óska, hvort sem þau eru í þjónustu hjá okkur eða ekki, upp á hlutlausa og faglega sérfræðiúttekt og ráðgjöf, sem fengið hefur vinnuheitið Bílastuð 0, til hjálpa stjórnum húsfélaga að greina bestu rafbílahleðslukosti og framtíðarlausnir fyrir sitt félag,“ segir Daníel Árnason framkvæmdastjóri Eignaumsjónar.

Úttektarskýrslan, sem verður eign viðkomandi húsfélags, er unnin af rafmagns- og byggingarverkfræðingum Eignaumsjónar og Tæknivits. Skýrslan uppfyllir lagalega skyldu um úttekt á áætlaðri framtíðarþörf rafbíla, eins og fjöleignarhúsalögin mæla fyrir um. Verð úttektarinnar ræðst af fjölda eigna innan viðkomandi húsfélags en í henni er m.a. lagt mat á:

  • Forsendur hleðslu rafbíla hjá viðkomandi húsfélagi, s.s. þörf á stærri heimtaug, staðsetningu hleðslustöðva og val á hentugri hleðslulausn.
  • Fyrirkomulag hleðslu, þ. á m. forhönnun á völdu kerfi, drög að raflagnauppdrætti, mat á tæknilegri getu kerfis, virkni kerfis til framtíðar (álagsstýring o.fl.), sjálfvirkni og áreiðanleiki.
  • Kostnaðarmat, þ.e. drög að kostnaðaráætlun og forgangsröðun áfanga, fyrirkomulag umsýslu, tillaga að sanngjörnu greiðslu- og innheimtukerfi sem tryggir að sá borgar sem notar.

Samstarfsverkefni Eignaumsjónar og Tæknivits

Eignaumsjón hf. býr að 20 ára þekkingu og reynslu í rekstri hús- og rekstrarfélaga fasteigna í takt við ákvæði fjöleignarhúsalaganna. Félagið, sem er brautryðjandi á þessum vettvangi, annast rekstur um 700 hús- og rekstrarfélaga með hátt í 15.000 íbúðum/eignarhlutum.

Tæknivit ehf. er með víðtæka reynslu í tæknilausnum, s.s. sjálfvirkni í skráningu, gjaldtöku, aðgangsstýringu og afgreiðslumálum.

Skriður á aðalfundum hjá Eignaumsjón

Skriður á aðalfundum hjá Eignaumsjón

Mar 5, 2021 | Fréttir

Skriður er nú kominn á boðun aðalfunda hjá stærri hús- og rekstrarfélögum í þjónustu hjá Eignaumsjón í kjölfar þess að slakað var á samkomutakmörkun vegna COVID-19 í liðinni viku. Fyrstu fundir í stærri húsfélögum eru á dagskrá í næstu viku. Samtímis er líka verið að halda aðalfundi minni og meðalstórra hús- og rekstrarfélaga og því í mörg horn að líta hjá starfsfólki Eignaumsjónar, ekki síst fundarteyminu.

Hátt í 50 aðalfundir eru á dagskrá hjá Eignaumsjón í næstu viku en þegar er búið að halda ríflega 200 af þeim hátt í 600 aðalfundum sem stefnt er á að ljúka fyrir apríllok.

Nýtt fundateymi

Hitinn og þunginn af skipulagi og boðun aðalfunda hjá Eignaumsjón hvílir á nýju fundarteymi félagsins, sem skipað er þeim Höllu Mjöll Stefánsdóttur og Sigríði Guðmundsdóttur. Halla Mjöll, sem starfað hefur hjá Eignaumsjón hátt í þrjú ár, gekk til liðs við ráðgjafasvið félagsins um áramótin og Sigríður kom til starfa í þjónustuverinu í haust.

Mikið er lagt upp úr öllum undirbúningi aðalfunda hjá Eignaumsjón og að rétt sé staðið að boðun, svo fundurinn verði löglegur og bindandi fyrir þátttakendur. Boða skal fund sannanlega með minnst átta og mest 20 daga fyrirvara og tilgreina fundartíma, fundarstað og dagskrá.

Góður undirbúningur – betri fundur

„Þar skal geta þeirra mála sem ræða á og meginefnis tillagna sem leggja á fyrir fundinn. Vert er líka að árétta að íbúðaeigendur sem vilja koma málum eða tillögum á dagskrá aðalfundar þurfa að láta stjórn vita af því skriflega með góðum fyrirvara,“ segir Halla Mjöll og bætir við að mikilvægt sé einnig að stjórn og formaður viðkomandi húsfélags fari vel yfir fyrirhugaða dagskrá og mál sem ræða þarf, s.s. viðhald og framkvæmdir, svo ákvarðanataka verði markviss og skýr. „Eitt af því allra mikilvægasta er þó að stjórnir athugi að hengja upp fundarboð í sameign og jafnvel setja í póstkassa. Fundarteymið sér svo um að senda fundarboð til þeirra sem hafa gefið okkur upp netfang og við sendum einnig í bréfpósti fundarboð til þeirra sem skráðir eru til heimilis utan hússins.“

Ársreikningur fyrir árið 2020 og líka árið 2019, ef ekki var haldinn aðalfundur í fyrra, er unninn af fjármálasviði Eignaumsjónar í aðdraganda aðalfundar og sendur stjórn. Ársreikningurinn er jafnframt lagður fyrir skoðunarmann húsfélagsins fyrir fund til yfirferðar og áritunar. Einnig er stillt upp kostnaðar- og húsgjaldaáætlun fyrir yfirstandandi ár, árið 2021, og send stjórn fyrir aðalfund til skoðunar og samþykktar. Halla Mjöll áréttar að áætlunin byggist á rekstrarsögu húsfélagsins og því sé mikilvægt að stjórnir láti Eignaumsjón vita ef ráðast á í fjárfrekar aðgerðir, svo tryggt sé að kostnaður vegna þeirra skili sér inn í húsgjaldaáætlunina. Gott sé líka, ef stjórnarskipti eru fram undan í húsfélagi, að fráfarandi húsfélagsstjórnir séu búnar að tryggja framboð formanns, meðstjórnenda og skoðunarmanna fyrir aðalfund. Það sparar bæði fundartíma og tryggir líka að ekki þurfi að grípa til þess að slíta fundi og boða til nýs fundar ef ekki næst að manna stjórn á aðalfundi.

Aðalfundargögn aðgengileg í Húsbókinni

Tímanlega fyrir aðalfund geta íbúðaeigendur nálgast fundargögn síns húsfélags í Húsbókinni, áður mínar síður, á heimasíðu Eignaumsjónar, www.eignaumsjon.is. Þar má þá finna ársreikning fyrir árið 2020 og eldri ársreikninga, kostnaðar- og húsgjaldaáætlun fyrir árið 2021, ásamt fundarboði og fleiri gögnum, ef leggja á þau fyrir fundinn. „Í ljósi ansi þéttra fundarhalda vinnum við ársreikninga samhliða fundarboðuninni og því skiptir góð samvinna við fjármálateymið okkar sköpum. Við gerum okkar besta til að skila af okkur gögnum hratt og örugglega og oftast liggja fundargögn fyrir til skoðunar ekki seinna en viku fyrir fund,“ segir Halla Mjöll.

Í húsbókinni er líka leitast við að safna saman og gera aðgengileg öll helstu gögn viðkomandi húsfélags. Eigendur og greiðendur sjá m.a. húsgjöldin sín (greiðsluseðla/kröfusögu), fundargerðir, ársreikninga, kostnaðaráætlanir, tryggingarskírteini, eignaskiptasamning og húsreglur ef þeim göngum hefur verið komið til Eignaumsjónar, sem og ýmis gögn sem snúa að viðhaldi og framkvæmdum húsfélagsins. Stjórnarmenn sjá m.a. daglega fjárhagsstöðu húsfélagsins, stöðu bankareikninga, útistandandi húsgjöld/framkvæmdagjöld, stöðu innheimtukrafna allra greiðenda. Einnig eru eftirlitsskýrslur húsumsjónar aðgengilegar, ef við á sem og önnur gögn sem snúa að stjórn húsfélagsins.

Það er einnig hægt að senda ýmsar þjónustubeiðnir rafrænt í gegnum Húsbókina á www.eignaumsjon.is. Þar má t.d. nefna nafnabreytingar og eigendaskipti, breytingar á heimilsfangi, yfirlýsingar húsfélags, beiðnir vegna útlagðs kostnaðar o. fl.

Innskráningin í Húsbókina er aðgangsstýrð, til að tryggja að einungis þeir sem eiga rétt á að skoða umrædd gögn hafi aðgang að þeim. Notandi er skráður með kennitölu greiðanda og/eða eiganda og fer innskráning fram í gegnum www.island.is, með rafrænum skilríkjum í snjallsíma eða íslykli sem er gefinn út af Þjóðskrá Íslands.

Verum vistvæn!

„Að lokum má svo jafnvel minna á að við hjá Eignaumsjón reynum markvisst að draga úr pappírsnotkun í tengslum við aðalfundi og aðra starfsemi félagsins og því vil ég benda viðskipavinum okkar, sem kjósa pappírslaus samskipti, á að í Húsbókinni geta þeir hakað við þá valkosti sem þeim henta í þessum efnum, segir Halla Mjöll að lokum.

Lagabreytingar um rafræna fundi húsfélaga og fleira í kynningu á samráðsgátt stjórnvalda

Lagabreytingar um rafræna fundi húsfélaga og fleira í kynningu á samráðsgátt stjórnvalda

Feb 3, 2021 | Fréttir

Félagsmálaráðuneytið kynnir nú til umsagnar drög að frumvarpi til laga um breytingu á lögum um fjöleignarhús, nr. 26/1994, á samráðsgátt stjórnvalda. Frumvarpið felur í sér nokkrar breytingar á fjöleignarhúsalögum sem rétt þykir að gera af fenginni reynslu undanfarinna ára og er m.a. stefnt að því að færa í lögin beina heimild til að halda rafræna húsfundi, m.a. annars vegna breyttra aðstæðna í þjóðfélaginu og óvissu sem ríkir vegna kórónaveirufaraldursins.

Veirufaraldurinn og samkomutakmarkanir vegna hans hafa haft bein áhrif á eigendur fjöleignarhúsa, m.a. vegna húsfunda og samskipta milli félagsmanna innan húsfélaga.

Á að heimila rafræna húsfundi og notkun rafrænna skjala

Með frumvarpinu er því lagt til að laga tiltekin ákvæði laganna að tækniframförum í rafrænum samskiptum og færa í lögin beina heimild til að halda rafræna húsfundi og nota rafræn skjöl og tölvupóst í samskiptum milli húsfélags og félagsmanna.

Þá er, í ljósi breyttra skipulagsáherslna og þar með ört vaxandi mannvirkjagerðar þar sem byggt er blandað húsnæði, nauðsynlegt að skapa eigendum húsnæðis í blönduðum húsum aukið svigrúm til þess að víkja frá ákvæðum laganna með það að markmiði að bæta nýtingu og einfalda ákvarðanatöku vegna aðlögunar húsnæðisins að þörfum eigenda blandaðs húsnæðis. Því er lagt til í frumvarpinu að eigendum húsnæðis í blönduðum húsum verði heimilað að víkja frá ákvæðum laganna með setningu sérstakra húsfélagssamþykkta fyrir blönduð hús.

Jafnframt er lögð til breyting á ákvæði laganna um húsfélagsdeildir þannig að heimild eigenda fjöleignarhúsa til að mynda húsfélagsdeild sé rýmkuð og nái til fleiri tilvika, s.s. að eigendum verði heimilt að semja um skiptingu á viðhaldi þannig að hver húsfélagsdeild annist framkvæmdir utanhúss á viðkomandi húshluta auk þess sem eigendum bílageymsla verði heimilt að stofna sérstaka húsfélagsdeild um bílageymsluna með samningi, svo unnt verði að reka þær sem sjálfstæðar einingar og að meginstefnu óháð ákvörðunarvaldi annarra eigenda fjöleignarhúss.

Umsagnafrestur til 15. febrúar

Umsagnarfrestur um frumvarpsdrögin er til 15. febrúar næstkomandi. Umsagnirnar verða birtar jafnóðum og þær berast í samráðsgáttinni en niðurstöður samráðsins verða birtar þegar unnið hefur verið úr þeim ábendingum og athugasemdum sem berast.

Sjá nánar hér.