Eignaumsjón hefur fest kaup á tveimur nýjum þjónustubifreiðum fyrir félagið. Með græna hugsun að leiðarljósi urðu Hybrid bílar frá Toyota fyrir valinu því þeir eru 50% rafmagnsdrifnir, jafnframt því sem Toyota-umboðið á Íslandi kolefnisjafnar nú allan akstur Hybrid bíla sem það selur í samstarfi við Kolvið.
„Við hjá Eignaumsjón erum afar ánægð með að vera komin með þessa Hybrid bíla í notkun hjá okkur. Þeir verða notaðir af húsumsjónarmönnum okkar sem þurfa að vera mikið á ferðinni á höfuðborgarsvæðinu og einnig af þjónustufulltrúum okkar sem sinna jöfnum höndum verkefnum hér í borginni og í byggðalögum hér í kring. Yaris Hybrid bílar urðu fyrir valinu hjá okkur og ekki skemmir heldur fyrir að akstur þeirrar er alveg sporlaus, þökk sé kolefnisjöfnun seljandans,“ segir Daníel Árnason, framkvæmdastjóri Eignaumsjónar.
Ábyrgð gagnvart umhverfinu
Eignaumsjón vill sem fyrirtæki vera ábyrgt gagnvart umhverfinu og hefur sett sér markmið um að draga úr kolefnisspori starfsemi sinnar. Kaupin á nýju bílunum er skref í þá átt en þeir leysa af hólmi tvo eldri dísil- og bensínbíla félagsins. Þá gekk Eignaumsjón fyrr á árinu til liðs við Grænni byggð, áður Vistbyggðarráð, sem er vettvangur um vistvæna þróun byggðar. Grænni byggð starfrækir faghópa á meðal aðildarfélaga og skipuleggur einnig fræðsluviðburði, gefur út fræðsluefni og tekur þátt í rannsóknar- og þróunarverkefnum með umhverfisábyrgð að leiðarljósi.
Um Eignaumsjón
Eignaumsjón sérhæfir sig í þjónustu við húsfélög og rekstrarfélög atvinnuhúsnæðis með það að markmiði að gera rekstur fasteigna bæði markvissari og ódýrari, auka upplýsingaflæði til eigenda og hússtjórna og auðvelda störf þeirra. Skrifstofa Eignaumsjónar er að Suðurlandsbraut 30 í Reykjavík, síminn er 585-4800 og netfangið er thjonusta@eignaumsjon.is.
Recent Comments