Vegna hertra samkomutakmarkana sem tekið hafa gildi út af COVID-19 hefur boðuðum aðalfundum hús- og rekstrarfélaga hjá Eignaumsjón verið frestað um óákveðinn tíma.
Nýju sóttvarnarreglurnar tóku gildi frá miðnætti aðfararnótt 25. mars 2021 og gilda í þrjár vikur. og mun Eignaumsjón endurskoða stöðuna í samvinnu við stjórnir hús- og rekstrarfélaga strax og tækifæri gefst. Tilkynningar um þróun mála verða birtar jafnóðum á heimasíðu Eignaumsjónar, á fésbók félagsins og í Húsbókinni á www.eignaumsjon.is.
Hertar öryggisreglur á skrifstofu Eignaumsjónar
Í ljósi hertra sóttvarnaraðgerða verða aðeins 10 starfsmenn með viðveru á hverjum tíma á skrifstofu Eignaumsjónar, frá deginum í dag að telja en annað starfsfólk sinnir sínum störfum í fjarvinnu. Jafnframt hefur verið hert enn frekar á öllum öryggisráðstöfunum hjá Eignaumsjón, s.s. varðandi handþvott, sprittun og grímunotkun.
Með þessum ráðstöfunum er verið að reyna að tryggja að dagleg starfsemi Eignaumsjónar haldist gangandi fyrir þau fjölmörgu hús- og rekstrarfélög sem eru í þjónustu hjá félaginu, komi upp smit á skrifstofunni, þó svo að kappkostað sé að sjálfsögðu fylgja í öllu þeim sóttvarnartilmælum sem yfirvöld gefa út á hverjum tíma.
Ekki hægt að halda rafræna hús- og aðalfundi
Ekki er verið að halda hús- og aðalfundi á meðan hertar sóttvarnarreglur eru í gildi. Því miður er ekki heldur hægt að halda rafræna aðalfundi og húsfundi þar sem breytingar á fjöleignarhúsalögunum, sem stefnt er að, hafa ekki enn verið afgreiddar frá Alþingi.
Eignaumsjón fer þess jafnframt á leit við viðskiptavini að þeir takmarki, eins og hægt er, heimsóknir í þjónustuver og skrifstofu félagsins á Suðurlandsbraut 30 á meðan hertar samkomutakmarkanir eru í gildi. Áfram er þó tekið á móti gögnum á skrifstofutíma og þau afhent en við hvetjum eindregið til þess að allar almennar fyrirspurnir og samskipti fari fram með tölvupósti á netfangið thjonusta@eignaumsjon.is. Einnig er hægt að hafa samband við þjónustuverið í netspjalli á heimasíðunni, www.eignaumsjon.is, eða með því að hringja í síma 585-4800. Enn fremur skal áréttað að þeir sem svo kjósa geta skilað inn gögnum í póstkassa Eignaumsjónar, sem er við inngang á suðurhlið/bakhlið Suðurlandsbrautar 30.
Recent Comments