Hjólreiðar njóta sífellt meiri vinsælda hérlendis – bæði sem heilsusamleg afþreying og vistvænn ferðamáti til og frá vinnu. Þessi þróun kallar á bætta aðstöðu fyrir geymslu reiðhjóla, bæði heimafyrir og á vinnustöðum.

Segja má að tiltekt og umgengi um hjólageymslu sé fastur liður á dagskrá aðalfunda fjölbýlishúsa undir önnur mál. Umkvörtunarefnið er jafnan að hjólageymslan sé full af hjólum, sem hrúgað er þar inn án nokkurs skipulags, eða hjólum sem hafa dagað þar uppi þegar eigendur þeirra fluttu sig um set.

Betri plássnýting og nútímaleg rekkakerfi

Lausnin er oftast að fela stjórn húsfélagsins að koma betri skikk á hjólageymsluna og er þá gjarnan gripið til þess ráðs að gefa eða fjarlæga á kostnað húsfélagsins þau hjól sem enginn kannast við að eiga og leita síðan leiða til að betrumbæta fyrirkomulagið í hjólageymslunni.

Oft eru settir upp hjólarekkar – annað hvort standandi á gólfi, hengdir á veggi eða í loft, til að nýta betur pláss í hjólageymslum. Þá eru fyrirtæki hérlendis farin að bjóða upp á tveggja hæða hjólarekka, sem geta hentað vel í stærri fjölbýlishúsum og atvinnuhúsum þar sem hugsað hefur verið fyrir rúmgóðum hjólageymslum. Svona hjólarekkarnir eru notendavænir, með útdraganlega braut í efri rekkanum ásamt þar til gerðum búnaði til að auðvelda upplyftu hjóla í efri rekka.

Eignaumsjón getur aðstoðað stjórnir húsfélaga við að afla tilboða í bæði faglega þjónustu og rekkakerfi fyrir hjólageymslur. Áhugasamir geta haft samband við þjónustuverið okkar í síma 585-4800, eða í netspjalli eða tölvupósti á thjonusta@eignaumsjon.is