Mar 19, 2025 | Fréttir
Þrír nýir starfsmenn komu nýlega til liðs við Eignaumsjón til að mæta sívaxandi umsvifum í starfsemi fyrirtækisins. Þetta eru þjónustufulltrúarnir Svandís Unnur Þórsdóttir og Róbert Elvar Kristjánsson og Jónars Heiðar, sem sinnir Húsumsjón.
Jónas vann við smíðar og múrverk hjá eigin fyrirtæki í 20 ár, aðallega fyrir tryggingarfélög og leigufélög, áður en hann kom til starfa hjá Eignaumsjón. Hann er með framhaldsskólapróf frá Fjölbrautarskólanum í Breiðholti.
Róbert Elvar starfaði vel á annan áratug sem sérfræðingur á sölusviði Símans áður en hann hóf störf hjá Eignaumsjón. Hann er með stúdentspróf af viðskipta- og verslunarbraut Fjölbrautarskóla Suðurlands og hefur lagt stund á nám í viðskiptafræði við HA og HÍ.
Svandís Unnur er með stúdentspróf af viðskipta- og hagfræðibraut menntaskólans við Sund. Hún starfaði sem þjónustufulltrúi í einstaklingsþjónustu hjá sölu- og síðar sem ráðgjafi á fyrirtækjasviði þjónustusviðs Sýnar hf., áður en hún byrjaði að vinna hjá Eignaumsjón.
Um Eignaumsjón
Eignaumsjón býr að 25 ára þekkingu og reynslu í þjónustu við húsfélög og rekstrarfélög atvinnuhúsnæðis. Félagið þjónar í dag á annað þúsund hús- og rekstrarfélögum með um 26.500 íbúðum/eignum. Áhersla er lögð á hlutlausa nálgun, öryggi, gæðamál og skýra verkferla til að gera rekstur fasteigna markvissari og ódýrari, auka upplýsingaflæði til eigenda og auðvelda störf stjórna.
Feb 28, 2025 | Fréttir
Fimm ár eru um þessar mundir frá því að fyrstu lóðirnar voru auglýstar til sölu í Breiðumýri, sem er miðsvæðis á Álftanesi, en þar eiga að rísa vel á þriðja hundrað íbúðir við göturnar Grásteinsmýri, Hestamýri og Lambamýri.
Byggingafélagið Þingvangur hefur nú lokið framkvæmdum að mestu við sex fjölbýlishús sem standa á sameiginlegri lóð við Lambamýri 1-6 og eru með sameiginlegan bílakjallara og bílastæði. Hönnuðir húsanna eru Arkþing Nordic arkitektar.
Alls eru 84 íbúðir í húsunum og er þegar flutt inn í margar þeirra. Gert er ráð fyrir verslunarrekstri og þjónustu á jarðhæðum tveggja húsanna og þar mun annars vegar vera horft til reksturs matvöruverslunar og hins vegar þjónustu fyrir aldraða á vegum Garðabæjar.
Ein samfélagsleg heild
„Það var ánægjulegt að koma að stofnun húsfélags fyrir þessi nýju fjölbýlishús á Álftanesinu,“ segir Hallur Guðjónsson, sölufulltrúi hjá Eignaumsjón, en heildarskipulag svæðisins miðar að því að nýja byggðin verði í sem bestu samræmi við umhverfið og taki mið af hugmyndum um Álftanes sem „sveit í borg“.
„Umhverfi er friðsælt og húsin mynda eina samfélagslega heild á sameiginlegri lóð með bílastæðum og bílakjallara, enda eru þau skilgreind sem eitt mannvirki með sjö matshlutum í eignaskiptasamningi. Það lá því beint við að stofna þar deildaskipt heildarhúsfélag fyrir alla matshlutana. Húsfélagið samanstendur af 86 eignarhlutum (84 íbúðir og 2 atvinnubil) sem eiga og lóðina og bílakjallarann sem er með beinu aðgengi inn í öll húsin,“ útskýrir Hallur.
Fjármál og fundir
Húsfélagið var stofnað vorið 2024 þegar byrjað var að afhenda íbúðir í þeim matshlutum sem voru fyrst tilbúnir. Fleiri matshlutar bættust svo við, eftir því sem framkvæmdum miðaði áfram og nú er starfsemi húsfélagsins komin í fulla virkni.
Húsfélagið Lambamýri 1-6 er í þjónustuleið Þ-2 hjá Eignaumsjón. Í því felst m.a. umsjón með fjármálum húsfélagsins, bæði innheimtu og greiðslu reikninga, færslu bókhalds og gerð rekstrar-, efnahags- og ársreikninga. Þjónustuleið Þ-2 felur líka í sér undirbúning aðalfunda með stjórn húsfélags, fundarstjórn og -ritun, ásamt gerð kostnaðar- og húsgjaldaáætlana þar sem rétt skipting húsgjalda samkvæmt lögum um fjöleignarhús er tryggð.
