,

Fólkið okkar – Halla Mjöll

Halla Mjöll Stefánsdóttir er hluti af öflugu þjónustuteymi Eignaumsjónar og sinnir hinum ýmsu verkefnum, enda í mörg horn að líta hjá fyrirtækinu sem hefur verið brautryðjandi hérlendis í 20 ár í þjónustu við húsfélög og rekstrarfélög fasteigna.

Halla er Skagfirðingur, fædd og uppalin á Sauðárkróki. Hún er með BA gráðu í fjölmiðlafræði frá Háskólanum á Akureyri og starfaði m.a. sem sölu- og þjónustufulltrúi áður en hún hóf störf hjá Eignaumsjón.

Lifandi og krefjandi vinnustaður

„Ég hef starfað hér í tæp tvö ár, frá haustinu 2018 og líkar bara vel. Vinnustaðurinn er lifandi og skemmtilegur, enda konur í miklum meirihluta,“ segir Halla og hlær sínum smitandi hlátri, sem laðar alltaf fram brosið hjá vinnufélögum hennar í dagsins önn.

„Mín daglegu verkefni eru bæði fjölbreytileg og krefjandi. Við í þjónustuverinu skiptum á milli okkar að svara netspjalli og símtölum frá viðskiptavinum vegna hinna ýmsu mála sem leysa þarf svo fljótt sem auðið er. Skemmtilegast finnst mér að leysa úr flóknum verkefnum, í samstarfi við vinnufélagana og viðskiptavini.

Húsfélagayfirlýsingar og fundarstjórn

Ég sé líka um að gefa út yfirlýsingar húsfélaga vegna sölu á íbúðum og er þar af leiðandi í miklum samskiptum við hina ýmsu fasteignasala, sem lífgar nú oftar en ekki upp á daginn hjá mér,“ segir Halla, sem er að eðlisfari jákvæð og bætir við að þessi samskipti falli klárlega undir helstu áskoranir í starfi því sumir þeirra eigi til að vera ansi óþreyjufullir og ýtnir!

Halla er einnig í fundarstjórateymi Eignaumsjónar, sem annast fundarstjórn og -ritun á aðal- og húsfundum hjá þeim um 600 húsfélögum í atvinnu- og íbúðarhúsum sem eru í þjónustu hjá félaginu. „Fundavertíðin“ er frá áramótum til aprílloka en eins og í flestu öðru hefur kórónaveiran sett strik í reikninginn varðandi aðalfundi húsfélaga hjá Eignaumsjón. Enn er eftir að halda tæplega 100 fundi og er stefnt að því að taka upp þráðinn í fundarhöldum eftir sumarfrí.

Norður í land í sumarfríinu

Aðspurð um sumarfrí segist Halla ætla að njóta veðurblíðunnar norður í landi og ferðast einnig vítt og breitt um landið, eins og svo margir Íslendingar ætli að gera í sumar. „Mér finnst mjög gaman af því að kanna nýjar slóðir og spóka mig um í náttúrunni, hvort sem um er að ræða útihlaup eða fjallgöngur,“ en Halla fer reglulega í ræktina eða út að hlaupa til að hugsa um heilsuna.

„Útvist, ferðalög og íþróttir eru mín helstu áhugamál, ásamt eldamennsku og félagsstörfum, þannig að mér mun ekki leiðast í sumarfríinu!“